O‘zbekiston Respublikasi Qishloq хo‘jаligi vаzirligi

Muloqot chog‘ida, dastlab, ikki davlat o‘rtasidagi agrar sohadagi hamkorlikni yanada mustahkamlash hamda yangi loyihalarni amaliy bosqichga olib chiqish masalalari muhokama qilindi.

Shuningdek, tomonlar O‘zbekiston Respublikasi Prezidentining Xitoy Xalq Respublikasiga rasmiy tashrifi davomida imzolangan bitimlar ijrosini ta’minlash maqsadida ishlab chiqilgan “Yo‘l xaritasi”ning amalga oshirilish holati yuzasidan fikr almashdilar.

Uchrashuv davomida zamonaviy qishloq xo‘jaligini rivojlantirishni strategik rejalashtirish, raqamli agrar siyosatni takomillashtirish, qishloq xo‘jaligida sun’iy intellekt texnologiyalarini joriy etish, shuningdek, agrar fan va texnologiyalar sohasidagi hamkorlikni yangi bosqichga olib chiqish masalalari atroflicha ko‘rib chiqildi.

Muhokamalar doirasida agrar kasb-hunar ta’limi tizimini rivojlantirish, qishloq xo‘jaligi uchun malakali kadrlarni qo‘shma tayyorlash, o‘qituvchilar almashinuvi hamda texnik treninglar tashkil etish yo‘nalishlariga alohida e’tibor qaratildi.

Mazkur tashabbuslarning asosiy maqsadi “agrar texnologiyalar + agrar ta’lim” modelini birlashtiruvchi muvofiqlashtirilgan hamkorlik mexanizmini shakllantirishdan iborat. Shuningdek, suhbat asnosida ipakchilik yo‘nalishida istiqbolli loyihalarni o‘zaro hamkorlik asosida joriy etish bo‘yicha takliflar ham ko‘rib chiqildi.

Muloqot yakunida ushbu loyihalarni bosqichma-bosqich amalga oshirish, ilmiy va texnologik almashinuvni kengaytirish hamda qishloq xo‘jaligi sohasida innovatsion yondashuvlarni joriy etish har ikki tomon uchun manfaatli ekani alohida ta’kidlandi.