Qishloq xo‘jaligi vazirligi “O‘zbekiston–Niderlandiya” qishloq xo‘jaligi simpoziumi PRESS-RELIZ
2026-04-13 07:00:00 / Press-relizlar
Simpozium O‘zbekiston Respublikasi delegatsiyasining Niderlandiya Qirolligiga amalga oshirgan tashrifi davomida erishilgan kelishuvlar ijrosining amaliy ifodasi bo‘lib, o‘zaro ishonch va manfaatlarga asoslangan strategik sheriklikni yanada mustahkamlashga xizmat qildi.
Tadbirda Niderlandiya Qirolligi Karantin agentligi direktori o‘rinbosari Lianna Kersbergen boshchiligidagi delegatsiya, shuningdek, ikki mamlakatning vazirlik va idoralari, ilmiy-tadqiqot institutlari, oliy ta’lim muassasalari, yetakchi kompaniyalari, xalqaro tashkilotlar hamda ishbilarmon doira vakillari ishtirok etdi.
Tadbir davomida qishloq xo‘jaligini modernizatsiya qilish, ishlab chiqarish samaradorligini oshirish, resurs tejovchi texnologiyalarni joriy etish, ilm-fan va amaliyot integratsiyasini kuchaytirish, shuningdek, yangi investitsion loyihalarni shakllantirish masalalari atroflicha muhokama qilindi. Tadbir o‘zaro tajriba almashish, ilg‘or yechimlarni muhokama qilish va hamkorlikning yangi yo‘nalishlarini belgilash uchun samarali platformaga aylandi.
Tadbirda so‘zga chiqqanlar mazkur hamkorlik uzoq muddatli va strategik ahamiyatga ega ekanini alohida ta’kidladilar. Mutaxassislar fikricha, ushbu hamkorlik Markaziy Osiyoda agrar innovatsiyalarni joriy etishda muhim o‘rin tutadi.
Alohida qayd etilganidek, Niderlandiya qishloq xo‘jaligida innovatsion yondashuvlar va yuqori samaradorlik bo‘yicha jahonda yetakchi davlatlardan biri hisoblanadi. O‘zbekiston esa boy agrar salohiyati va keng imkoniyatlari bilan mazkur tajribani samarali o‘zlashtirish uchun mustahkam zamin yaratmoqda.
Shu nuqtayi nazardan, fitosanitar xavfsizlikni ta’minlash, urug‘chilik tizimini rivojlantirish, issiqxona xo‘jaliklarini modernizatsiya qilish, meva-sabzavotchilikni rivojlantirish, agrotexnologiyalarni keng joriy etish hamda qishloq xo‘jaligi ta’limi va ilm-fan yo‘nalishlarida hamkorlikni kengaytirish ustuvor vazifalar sifatida belgilandi.
Ta’kidlanganidek, O‘zbekistonda so‘nggi yillarda qishloq xo‘jaligini tubdan isloh qilish, yuqori qo‘shilgan qiymatli mahsulotlar ishlab chiqarishni kengaytirish, eksport salohiyatini oshirish hamda zamonaviy agrotexnologiyalarni joriy etish borasida keng ko‘lamli ishlar amalga oshirilmoqda. Bu jarayonda xalqaro hamkorlik, xususan Niderlandiya bilan aloqalarni mustahkamlash muhim ahamiyat kasb etmoqda.
So‘nggi yillarda O‘zbekistonda qishloq xo‘jaligini modernizatsiya qilish, yuqori qo‘shilgan qiymatli mahsulotlar ishlab chiqarish hamda eksport salohiyatini oshirish borasida keng ko‘lamli islohotlar amalga oshirilmoqda. Mazkur jarayonda Niderlandiya bilan hamkorlik aloqalarini kengaytirish alohida ahamiyat kasb etayotgani ta’kidlandi.
Raqamlar ham hamkorlikning ijobiy dinamikasini yaqqol tasdiqlaydi: 2024-yilda o‘zaro savdo hajmi 3,2 million AQSH dollarini tashkil etgan bo‘lsa, 2025-yilda bu ko‘rsatkich 8,3 million dollarga yetdi.
Simpozium doirasida qator muhim kelishuv va memorandumlarni imzolash rejalashtirilgani, shuningdek, aniq loyihalar bo‘yicha hamkorlikni yo‘lga qo‘yish yuzasidan kelishuvlarga erishilgani tomonlar o‘rtasidagi aloqalarni sifat jihatidan yangi bosqichga olib chiqishga xizmat qilishi qayd etildi.
Tadbir doirasida o‘tkazilgan B2B uchrashuvlar, taqdimotlar va muzokaralar natijasida yangi qo‘shma loyihalarni shakllantirish, to‘g‘ridan to‘g‘ri investitsiyalarni jalb etish hamda ilg‘or texnologiyalarni amaliyotga keng joriy etish uchun mustahkam zamin yaratildi.
Mazkur hamkorlik loyihalari natijasida qishloq xo‘jaligi mahsulotlari yetishtirish samaradorligini oshirish, suv va yer resurslaridan oqilona foydalanish, eksport hajmini kengaytirish hamda oziq-ovqat xavfsizligini mustahkamlashga erishish kutilmoqda.
Kelgusida ushbu yo‘nalishdagi hamkorlikni yanada kengaytirish, ilmiy va innovatsion loyihalarni qo‘llab-quvvatlash hamda yangi qo‘shma tashabbuslarni amalga oshirish bo‘yicha tizimli ishlar izchil davom ettiriladi.
Mazkur xalqaro simpozium O‘zbekiston va Niderlandiya o‘rtasidagi ishonchli va uzoq muddatli hamkorlikni yanada mustahkamlab, agrar sohada innovatsion rivojlanish uchun mustahkam poydevor yaratgan muhim voqea sifatida baholandi.