O‘zbekiston Respublikasi Qishloq хo‘jаligi vаzirligi

Video-konferens-aloqa shaklida o‘tkazilgan yig‘ilishda vazirlik rahbariyati, hududiy boshqarmalar boshliqlari, tizim tashkilotlari rahbarlari hamda vazirlik departamenti va boshqarmalari mutasaddilari ishtirok etdi.

Dastlab, yig‘ilish kun tartibidan o‘rin olgan  2024-yil 1-yarim yilligi uchun belgilangan  investitsiya dasturi ijrosining joriy holati,  Buyuk ipak yo‘lining qishloq xo‘jaligi ta’lim va tadqiqot, innovatsiyalar Alyansining poytaxtimizda o‘tkaziladigan 9 yillik anjumaniga tayyorgarlik ishlari, hamda  agrar sohada kechiktirib bo‘lmaydigan bir qancha  muhim masalalar  bo‘yicha   mutasaddilarning hisoboti tinglandi. 

Shundan so‘ng xorijiy investitsiyalarni jalb etish masalasiga to‘xtalgan vazir Ibrohim Abdurahmonov,  bu bo‘yicha olib borilayotgan ishlar  qoniqarli emasligi, to‘g‘ridan-to‘g‘ri investitsiyalarni jalb etish rejasi 6 % ni ham tashkil etmayotganiga e’tibor qaratar ekan, vazirlik boshqarmalari boshliqlari quyi tashkilotlar bilan samarali faoliyat olib bormayotganini tanqid qildi. Jumladan kichik agrologistik markazlar tashkil etish bo‘yicha 65 mln AQSH dollarlik  investitsiya mablag‘i uchun shu paytgacha loyihalar ishlab chiqilmaganini ta’kidlab o‘tdi.   

Davlatimiz rahbarining xorijiy mamlakatlarga rasmiy tashriflari doirasida agrar sohada erishilgan kelishuvlar bo‘yicha olib borilayotgan ishlarni jadallashtirish zarurligiga alohida e’tibor qaratildi.   Shuningdek  bugun  nafaqat vazirlik yoki tizim tashkilotlari   rahbarlari balki hududiy boshqarmalar  va tuman bo‘limlari rahbarlari ham  agrar sohaga  investitsiya kiritishga alohida e’tibor qaratishi lozimligi, bunda esa  hech bo‘lmaganda o‘zi rahbarlik qiladigan hududda istiqomat qiladigan aholi jon boshiga 1 dollardan  investitsiya jalb qilishi lozimligi  aytib o‘tildi.  

Bugun  mamlakatimizdagi agrologistik markazlarda mahsulotlarni  tegishli talablar asosida qabul qilib oluvchi,  qadoqlovchi, logistika hujjatlari bo‘yicha ishlovchi  kadrlarga bo‘lgan ehtiyojni bartaraf etish, buning uchun esa, rivojlangan davlatlar tajribasi asosida o‘quv seminarlari tashkil etish bo‘yicha mutasaddilarga topshiriqlar berildi.  

Shuningdek, yig‘ilishda Buyuk ipak yo‘li qishloq xo‘jaligi ta’lim va tadqiqot, innovatsiyalar Alyansining poytaxtimizda o‘tkaziladigan 9 yillik anjumaniga tayyorgarlik ishlari ham ko‘rib chiqilib,   mazkur tadbirni yuksak darajada o‘tkazish uchun  mas’ullarga tegishli ko‘rsatmalar berildi.  

Shundan so‘ng, kun tartibidan  o‘rin olgan navbatdagi masala “Xonadonbay usul”da  nafaqat  qishloq xo‘jaligi mahsulotlarini yetishtirish, balki bir vaqtning o‘zida  ilmiy tadqiqotlar olib borish  bo‘yicha  amalga oshirilgan ishlarning joriy holati ko‘rib chiqildi.  Bu usulning  ilmiy-tadqiqot institutlari  olimlari bilan bir qatorda nafaqat xonadon egalari, balki  mahalla ahli uchun keltiradigan foydalariga ham e’tibor qaratilib,  bu bo‘yicha  olib borilayotgan ishlarni jadallashtirish zarurligi ta’kidlandi.   

Qishloq xo‘jaligi fundamental tadqiqotlar  markazini tashkil etish hamda Toshkent davlat agrar universiteti va Akademik M.Mirzayev nomidagi bog‘dorchilik, uzumchilik va vinochilik ilmiy-tadqiqot institutida amalga oshirilayotgan loyihalar  va laboratoriyalar tashkil etish, shuningdek, qishloq xo‘jaligi texnikasi va texnologiyalarini sertifikatlash va sinash davlat markazida texnopark va sinov treklarini tashkil etish bo‘yicha amalga oshirilayotgan ishlar holati tahlil qilinar ekan, vazir Ibrohim Abdurahmonov, mazkur tizim tashkilotlaridagi ish jarayoni bugun qoniqarli emasligi, mavjud vaziyatni tubdan o‘zgartirish uchun barcha imkoniyatlarni ishga solish lozimligiga e’tibor qaratdi.

Tizim tashkilotlarida bugun   zararkunandalardan holi ko‘chatlarni yetishtirishga ixtisoslashgan In-Vitro laboratoriyalari mavjud bo‘la turib, Qishloq xo‘jaligida xizmatlar ko‘rsatish agentligi bugun 13,500 gektar maydonda bog‘lar tashkil qilish, mevali daraxt ko‘chatlarini  xorijdan xarid qilishini hech narsa bilan oqlab bo‘lmasligiga e’tibor qaratar ekan, mas’ullarga ishga vijdonan yondashishlarini  aytib o‘tdi.  

Ayni paytda mamlakatimizda g‘alla yig‘im-terimi   uyushqoqlik bilan  olib borilayotgani bois,  mutasaddilarning bu bo‘yicha  hisoboti ham tinglandi.  Vazir Ibrohim Abdurahmonov hisobotlarni tayyorlashda vijdon amriga quloq tutishni ta’kidlar ekan,  tashkiliy ishlar to‘g‘ri yo‘lga qo‘yilmagani bois, hali ayrim tumanlarda g‘alla yig‘im terimi boshlanmaganini, bu esa, nafaqat tayyor baraka hosilining  nobud bo‘lishiga, balki takroriy ekinlar ekishning kechikib ketishiga sabab bo‘lishini tushuntirib o‘tdi.  

Qishloq xo‘jaligi mahsulotlari mamlakatimizda g‘arq pishgan  ayni pallada  meva-sabzavotlar eksporti bo‘yicha  ko‘rsatkichlar ham qoniqarsiz ahvolda ekani aytib o‘tildi. 2024-yilda 3,5 mlrd dollarlik  meva-sabzavotlar eksport qilinishi ko‘zda tutilgan bo‘lib, ayni  paytda bu ko‘rsatkich  970 mln dollarni tashkil qilgani ham  mutasaddilarning e’tiborsizligidan. Shu bois, yuqoridagi barcha masalalar yuzasidan   kamchiliklarga yo‘l qo‘ygan mutasaddilarga ogohlantirish berilib, ishni to‘g‘ri yo‘lga qo‘yish yuzasidan tegishli ko‘rsatmalar berildi. 

Yig‘ilishni yakunlar ekan, vazir Ibrohim Abdurahmonov,  mana shu Ona Vatanda yashar ekanmiz mamlakatimiz  taraqqiyoti uchun hamma og‘izbirlik asosida ish olib borishi, mamlakat manfaati yo‘lida  tinimsiz mehnat qilishi lozimligini aytib o‘tdi.