O‘zbekiston Respublikasi Qishloq хo‘jаligi vаzirligi

Davlatimiz rahbarining bir qator Farmon va Qarorlarida bu borada amalga oshirishimiz kerak bo‘lgan ishlar, amalga oshirilishi kerak bo‘lgan chora-tadbirlar aniq qilib belgilab qo‘yilgan. Ayniqsa, O‘zbekiston Respublikasi Prezidenti Shavkat Mirziyoyevning Oliy Majlis va O‘zbekiston xalqiga Murojaatnomasida hamda 2026-yil 16-fevraldagi “Mamlakat taraqqiyotining 2030-yilgacha mo‘ljallangan ustuvor yo‘nalishlari doirasida islohotlarni izchil davom ettirish va yangi bosqichga olib chiqishning qo‘shimcha chora-tadbirlari to‘g‘risida” PF-21-son Farmoni bilan belgilangan ulkan va sharafli vazifalarni bajarish mas’uliyati zimmamizda turibdi.

Jumladan, joriy yilda yalpi mahsulot ishlab chiqarish hajmini 571 trillion so‘mga, o‘sish sur’atini 106 foizga yetkazishimiz lozim. Buning 262,9 trln so‘mligi (108,1%) dehqonchilik va 275,9 trln so‘mligi (103,9 %) chorvachilik mahsulotlari ulushiga to‘g‘ri keladi.

Yil yakunigacha 555 mln dollarlik investitsiyalar o‘zlashtirilishi rejalashtirilgan (2025-yildan 61,5 mln doll. ko‘p). Tarmoqda eksport hajmi 4,5 mlrd dollarga yetkaziladi (2025-yilga nisbatan 1,3 mlrd doll. ko‘p). 

Paxtachilikda 4,5 mln tonna (o‘tgan yildagidan 500 ming tonna ko‘p) mahsulot yetishtiriladi. G‘allachilikda esa hosil salmog‘ini 10 mln tonnaga yetkazish vazifasi qo‘yilgan.

Qishloq xo‘jaligini zamonaviy texnika vositalari bilan ta’minlash, yangi yerlarni o‘zlashtirish, sohaga suvni tejaydigan texnologiyalarni olib kirish va boshqa sohalarda bir qancha vazifalar kun tartibida turibdi.

Bu vazifalarning salmog‘i naqadar katta ekanligini respublika qishloq xo‘jaligi tarmog‘i rahbar va xodimlari, har birimiz yurakdan chuqur his qilgan holda ishimizni tashkil qilishimiz, zammamizga yuklatilgan vazifaga avvalgidan ikki-uch hissa ko‘p mas’uliyat va qunt bilan yondashmog‘imiz talab etiladi. Buning uchun ilm-fan yutuqlarini, innovatsiyalarni tarmoqqa izchillik bilan joriy qilishimiz va shu orqali hosildorlik va samaradorlik ko‘rsatkichlarini yuqori darajaga ko‘tarishimiz zarur.

Bugun shiddat bilan globallashib borayotgan dunyoda yuz berayotgan siyosiy-iqtisodiy tanglik, bir qator davlatlar o‘rtasidagi munosabatlarning tobora taranglashib, urush olovi avj olib turgan bir vaziyatda zimmamizga yuklatilgan vazifalarning so‘zsiz bajarilishini ta’minlash ona vatanimiz va xalqimiz uchun nechog‘li muhim ekanligini har qachongidan ko‘ra teranroq anglab yetishimiz zarur. Iqtisodiyotimiz baquvvat, bozorlarimiz to‘kin-sochin, mahsulotlarimizning arzon va sifatli bo‘lishi bunday nozik geosiyosiy vaziyatda davlatimiz, xalqimiz tinch, osoyishta hayot kechirishi uchun juda muhim!
 

Bunday natijaga erishish uchun tizim tashkilotlarida xizmat qilayotgan rahbarlar, egallab turgan lavozimi, mavqeidan qat’iy nazar, har bir mas’ul xodim, avvalo, halol, o‘z vazifasiga katta mas’uliyat bilan yondashadigan, zamonaviy ilm-fan natijalarini, innovatsion ishlanmalarni o‘zi mas’ul bo‘lgan joyda hayotga joriy qila olish salohiyatiga ega, har bir ishga ijodiy munosabatda bo‘ladigan, kuyunchak, vatan va xalq taraqqiyotiga daxldorlik hissini yuragiga mahkam bog‘lagan xodim bo‘lishi zarur!
 

Mamlakatimizda Yangi O‘zbekiston poydevorini barpo etish uchun shiddatli jarayonlar yuz berayotgan bugungi kunda soha tashkilot va muassasalarda yangi davr talablariga to‘liq javob bera olmaydigan, egallagan lavozimi doirasida mas’uliyatni to‘liq his qilmaydigan, yaqin o‘tmishdagi singari yuqori tashkilotlarga yolg‘on ma’lumotlar beradigan rahbar va xodimlar bo‘lmasligi kerak! Qishloq xo‘jaligi vazirligi tizimidagi, huzuridagi tashkilot va muassasalarda bunday rahbar va xodimlarga o‘rin yo‘q! Yolg‘on ma’lumot sohada belgilangan vazifalar ijrosini tashkil qilishda boshqaruvni, rejalashtirish ishlarini chalg‘itishga sabab bo‘ladi, ko‘zlangan natijalarga erishishda jiddiy to‘sqinlik qiladi!

 

Yolg‘on ma’lumot berish – mas’uliyatdan qochishdir, u korrupsiya botqog‘ini chuqurlashtirishga xizmat qiladi!

Tizimdagi ishlarni belgilangan vaqtda tezkor va to‘g‘ri tashkil qilish uchun, avvalo, rahbariyatni bajarilgan ishlar bo‘yicha haqqoniy ma’lumot bilan ta’minlash belgilangan natijalarga erishishda bosh omillardan biri hisoblanadi. Shu bois barcha tashkilot va muassasalar rahbarlari hamda mas’ul xodimlardan yuqori turuvchi idoralarga to‘g‘ri ma’lumot kiritish talab etiladi! Hurmatli rahbarlar va mas’ul xodimlar!

Joriy yilda O‘zbekiston Respublikasi Prezidenti tomonidan oldimizga qo‘yilgan vazifalarni talab darajasida bajarish, yilni yorug‘ yuz bilan yakunlash uchun har bir topshiriq ijrosi va masala-muammolar yechimiga sidqidildan kirishish, joylarda barcha kuch va imkoniyatlarni safarbar qilish, vaqt bilan hisoblashmay, ishga ilmiy-ijodiy yondashish talab etiladi! Bu borada barchalaringizga kuch-quvvat, bukilmas iroda, o‘tkir ijodiy tafakkur tilaymiz!

O‘zbekiston Respublikasi Qishloq xo‘jaligi vazirligi