Xonqada yoshlar bilan samimiy muloqot
2026-03-12 18:45:00 / Rahbariyatning bayonotlari va nutqlari
Mazkur muloqot Prezident Shavkat Mirziyoyev tomonidan ilgari surilgan tashabbus — rahbarlarning joylarga borib yoshlar bilan uchrashishi, ularning fikr va takliflarini tinglashi hamda tashabbuskor yoshlarni qo‘llab-quvvatlash tamoyiliga muvofiq tashkil etildi.
Suhbat avvalida vazir yoshlarning jamiyatdagi o‘rni, zamonaviy O‘zbekiston yoshlarining dunyoqarashi, to‘g‘ri kasb tanlash va ilmga qiziqishni kuchaytirish masalalari haqida fikr bildirdi. Shuningdek, yoshlarning tashabbuslarini qo‘llab-quvvatlash va ularni kelajakka dadil qadam tashlashga undash muhim ekanini ta’kidladi.
Muloqot davomida Ibrohim Abdurahmonov o‘zining hayotiy yo‘li haqida ham so‘zlab berdi. U o‘quvchilik va talabalik davrida duch kelgan qiyinchiliklar, ilm yo‘lida tinimsiz izlanish, mehnat va qat’iyatning ahamiyati haqida gapirib, har qanday vaziyatda taslim bo‘lmaslik kerakligini ta’kidladi. Hayotiy tajribalar bilan boyitilgan fikrlar yoshlar uchun kuchli motivatsiya bo‘ldi.
Dastlab yoshlar orasida biroz hayajon sezilgan bo‘lsa-da, vazirning samimiy va ochiq muloqoti muhitni tezda erkinlashtirdi. Suhbat samimiy ruhda davom etdi. Yoshlar ilm olish, kasb tanlash va o‘z tashabbuslarini amalga oshirish borasidagi savol va takliflarini bemalol bildirdilar.
Samimiy ruhda o‘tgan uchrashuv yoshlarning kelajakka bo‘lgan ishonchini yanada mustahkamlab, oldiga aniq maqsadlar qo‘yishiga turtki bo‘ldi.