Yoshlar, startap va innovatsiyalar: Farg‘onada agrar g‘oyalar ko‘rgazmasi
2026-03-06 12:05:00 / Yangiliklar
Institut hududida qishloq xo‘jaligi va oziq-ovqat sanoati yo‘nalishida ko‘rgazma tashkil etildi. Unda ta’lim muassasasining istiqbolli yo‘nalishlari, ilmiy izlanishlari, rivojlanish strategiyasi hamda talabalar tayyorlash jarayonida qo‘llanilayotgan zamonaviy yondashuvlar namoyish etildi.
Ko‘rgazmada go‘sht, sut, non va boshqa oziq-ovqat mahsulotlari ishlab chiqaruvchi qator mahalliy korxonalar ham o‘z mahsulotlari bilan ishtirok etdi. Ushbu korxonalarda institut talabalari dual ta’lim tizimi asosida amaliyot o‘tamoqda. Bu esa yosh mutaxassislarning nazariy bilimlarini ishlab chiqarish jarayonida mustahkamlab, ularning bozorga tayyor kadr sifatida shakllanishiga xizmat qilmoqda.
Ko‘rgazma doirasida vazirga talaba va yosh tadqiqotchilar tomonidan ishlab chiqilgan bir qator startap loyihalar taqdim etildi. Jumladan, mineral o‘g‘itlar ishlab chiqarish, tomchilatib sug‘orish texnologiyalarini mahalliy sharoitda ishlab chiqish va joriy etish, qishloq xo‘jaligida samaradorlikni oshirishga qaratilgan innovatsion g‘oyalar namoyish qilindi.
Vazir taqdim etilgan loyihalar bilan tanishib, yoshlarning ilmiy izlanishlari va tashabbuslarini yuqori baholadi. Ibrohim Abdurahmonov yosh tadqiqotchilarni qo‘llab-quvvatlash hamda ularning innovatsion g‘oyalarini amaliyotga joriy etish uchun zarur sharoit yaratish muhimligini ta’kidladi. Shuningdek, mas’ullarga ushbu loyihalarni grant mablag‘lari orqali rag‘batlantirish va moliyaviy qo‘llab-quvvatlash bo‘yicha topshiriqlar berdi.
Ta’kidlanganidek, bunday qo‘llab-quvvatlash mexanizmlari yoshlarning ilm-fan va innovatsiyaga qiziqishini oshirib, ularning g‘oyalarini real loyihalarga aylantirishga xizmat qiladi.
Shundan so‘ng vazir va yoshlar o‘rtasida ochiq muloqot tashkil etildi. Prezident Shavkat Mirziyoyev tomonidan ilgari surilgan muhim tashabbuslardan biri — rahbarlarning joylarga borib yoshlar bilan uchrashishi, ularning fikr va takliflarini tinglashi hamda tashabbuskor yoshlarni qo‘llab-quvvatlashdir.
Uchrashuv davomida mamlakatimizda ilm-fan va ta’lim sohasiga qaratilayotgan e’tibor, yosh olimlar va talabalar uchun yaratilayotgan imkoniyatlar haqida fikr almashildi.
Tadbir yakunida vazir HECI yondashuvlari jamlangan o‘quv qo‘llanmaning institutga bosma va elektron nusxalarini taqdim etdi. Qayd etilganidek, agrar sohada zamonaviy bilim va texnologiyalarni puxta egallagan yuqori malakali mutaxassislarni tayyorlash ustuvor vazifalardan biri hisoblanadi.