Chorvachilikda raqamli transformatsiya: O‘zbekiston – Koreya hamkorligi yangi bosqichda
2026-02-23 17:30:00 / Rahbariyatning bayonotlari va nutqlari
Muloqot chog‘ida O‘zbekistonda chorvachilik sohasini raqamlashtirishga qaratilgan loyiha samaradorligi muhokama qilindi.
2026–2028-yillarga mo‘ljallangan mazkur loyiha chorva mollarini individual identifikatsiya qilish, yagona ma’lumotlar bazasini shakllantirish va real vaqt rejimida ma’lumot almashinuvini yo‘lga qo‘yishni nazarda tutadi. Shu orqali naslchilik, mahsuldorlik va kasallik tarixi bo‘yicha ma’lumotlar raqamlashtirilib, sun’iy intellekt asosida tahlil qilinadi.
Bugungi kunda mamlakatimizda go‘sht yo‘nalishidagi qoramollarning o‘rtacha kunlik vazn qo‘shimchasi 0,4–0,5 kgni tashkil etsa, Koreyada bu ko‘rsatkich 1,0–1,2 kgga yetadi. Yillik sut hosildorligi ham Koreyaga nisbatan bir necha barobar past. Loyiha aynan shu farqni qisqartirishga qaratilgani bilan ham ahamiyatlidir.
Shuningdek, iqlimga mos, uglerod chiqindilarini kamaytiruvchi model joriy etilib, karbon kreditlari orqali qo‘shimcha daromad manbalari yaratish rejalashtirilgan.
Mazkur tashabbus amalga oshirilsa, chorvachilikda samaradorlik va shaffoflikni ta’minlash, mahsuldorlikni oshirish hamda tarmoqni raqamli asosda rivojlantirishga xizmat qiladi.