Zarafshon daryosi havzasida suv boshqaruvida ayollar ishtiroki kengaymoqda
2026-02-04 21:05:00 / Yangiliklar
Tadbir Zarafshon daryosi havzasida suv resurslarini boshqarish jarayonlarida xotin-qizlarning faol ishtirokini oshirishga qaratildi.
Seminar davomida iqlim o‘zgarishi, qurg‘oqchilik va suv tanqisligi kabi dolzarb muammolar muhokama qilinib, ularning Markaziy Osiyo, xususan O‘zbekiston uchun qanday xavf-xatarlar keltirib chiqarayotgani ta’kidlandi.
Ma’lumki, mamlakatimizda suv resurslarining qariyb 80 foizi transchegaraviy hisoblanadi. Shu bois suvdan samarali foydalanish va uni adolatli boshqarish barqaror rivojlanishning muhim omiliga aylanmoqda.
Mazkur muammolarni hal etish maqsadida Zarafshon daryosi havzasida Shveysariya hukumati tomonidan moliyalashtirilayotgan, Shveysariya Taraqqiyot va Hamkorlik Agentligi (SDC) ko‘magida Karitas Shveysariya va Markaziy Osiyo Mintaqaviy Atrof-muhit Markazi (CAREC) tomonidan amalga oshirilayotgan “Zarafshon daryosi havzasida iqlimga chidamli integratsiyalashgan suv resurslarini boshqarish” loyihasi izchil tatbiq etilmoqda.
Loyiha doirasida suvni tejash texnologiyalarini joriy etish, avtomatlashtirilgan monitoring tizimlari, iqlim kuzatuv stansiyalari hamda tuproq va yer osti suvlarini nazorat qilish uchun zamonaviy quduqlar o‘rnatish rejalashtirilgan. Shu bilan birga, mahalliy aholining, ayniqsa ayollarning bilim va ko‘nikmalarini oshirishga qaratilgan o‘quv tadbirlariga alohida e’tibor qaratilmoqda.
Oqdaryo tumanida bo‘lib o‘tgan seminarda suv resurslarini kompleks boshqarishda gender yondashuvini qo‘llash masalalari muhokama qilindi. Tadbirda fermer ayollar, mahalla fuqarolar yig‘ini vakillari hamda soha mutaxassislari ishtirok etdi.
Muhokamalarda ayollarning iqlim o‘zgarishiga moslashishdagi o‘rni, shuningdek, mahalliy darajada inklyuziv suv boshqaruvi mexanizmlarini joriy etishning ahamiyati qayd etildi.