Sirdaryo: ekologiya va salomatlikni uyg‘unlashtirgan yangi loyiha
2025-12-24 19:05:00 / Rahbariyatning bayonotlari va nutqlari
Mazkur hududda yer resurslaridan samarali foydalanish va ekologik barqarorlikni ta’minlash maqsadida yomg‘irlatib sug‘orish tizimini joriy etish rejalashtirilgan. Loyiha doirasida beda ekinlari yetishtirish, ikki qatorli gujum daraxtlari oralig‘ida achchiq olcha ko‘chatlari ekish, shuningdek, aholi uchun qulay salomatlik yo‘lagi barpo etish ko‘zda tutilgan.
Ta’kidlanishicha, ushbu yondashuv nafaqat qishloq xo‘jaligi samaradorligini oshirish, balki hududning ekologik holatini yaxshilash, chang va shamol ta’sirini kamaytirishga xizmat qiladi.
Vazir o‘z navbatida, loyihani kompleks tarzda amalga oshirish, sug‘orish texnologiyalarini to‘liq ishga tushirish va ko‘chatlarni hudud iqlimiga mos holda joylashtirish bo‘yicha qator amaliy takliflarni ilgari surdi. Shuningdek, yashil hududlarni parvarishlashda mahalliy aholi va yoshlarni faol jalb etish, ularning mas’uliyatini oshirish muhimligini qayd etdi.
Mazkur loyiha natijasida 12 kilometr masofada uzluksiz yashil hudud shakllantirilib, u aholining dam olishi, sog‘lom turmush tarzini qo‘llab-quvvatlash hamda atrof-muhitni muhofaza qilishga xizmat qilishi kutilmoqda.
Zero, bugun barpo etilayotgan yashil hududlar — ertangi kun ekologiyasi va aholi farovonligining mustahkam poydevoridir.