Yangi O‘zbekiston agrar ta’lim tizimida yangi imkoniyatlar
2025-12-24 09:35:00 / Yangiliklar
Tadbirda universitet rektori N. Oblomuradov boshchiligida prorektorlar, fakultet dekanlari, kafedra mudirlari hamda professor-o‘qituvchilar ishtirok etdi. Rektor o‘z nutqida zamonaviy laboratoriyalar va xalqaro hamkorliklar ta’lim sifati, talabalarning bilim va amaliy ko‘nikmalarini oshirishda muhim omil ekanini ta’kidladi.
Fakultet kirish qismida tashkil etilgan tuproq eksponatlari ko‘rgazmasida cho‘l, tog‘ oldi va tog‘ mintaqalariga xos 22 xil tuproq namunalari namoyish etilib, ularning ilmiy va amaliy ahamiyati yoritildi.
Jarayon doirasida Janubiy Koreya Respublikasining Chungnam National University bilan hamkorlikda amalga oshirilayotgan “O‘zbekistonda qishloq xo‘jaligi muhitini yaxshilash va professional kadrlar tayyorlash” loyihasi asosida tashkil etilgan zamonaviy ilmiy laboratoriya faoliyati bilan tanishildi. Shuningdek, O‘zbekiston–Xitoy tuproq, o‘simlik va o‘g‘itlar tahlili laboratoriyasi ko‘zdan kechirildi.
Seminar davomida A. Rasulov nomidagi o‘quv-amaliyot xonasi hamda O‘simliklarni kimyoviy himoya qilish laboratoriyasi faoliyati taqdim etilib, olimlar va yosh tadqiqotchilar tomonidan olib borilayotgan ilmiy tadqiqotlarning amaliy ahamiyati yuzasidan fikr almashildi.
Ta’kidlash joizki, mazkur fakultet bugungi kunda respublika agrar sohasi uchun yuqori malakali kadrlar tayyorlash, ilmiy-tadqiqot ishlarini xalqaro standartlar asosida olib borish va innovatsion texnologiyalarni amaliyotga joriy etishda muhim o‘rin tutmoqda.
Mazkur tadbir agrar ta’lim va ilm-fan integratsiyasini mustahkamlash, xalqaro hamkorlikni kengaytirish hamda “Yangi O‘zbekiston” taraqqiyotida agrar sohaning salohiyatini oshirishga xizmat qilishi bilan ahamiyatlidir.