Agrar sohada raqamlashtirish va paxtachilik samaradorligi – ustuvor vazifa
2025-12-23 14:00:00 / Rahbariyatning bayonotlari va nutqlari
Yig‘ilishda 2025-yil paxta mavsumida yuqori hosildorlikka erishgan va innovatsion texnologiyalarni o‘z dalalarida muvaffaqiyatli joriy etgan fermerlar tajribasini ommalashtirish masalasiga alohida e’tibor qaratildi.
Xususan, hosildorligi 30 sentnerdan past bo‘lgan fermer xo‘jaliklariga ilg‘or tajribaga ega “ustoz” klaster va fermerlarni biriktirish mexanizmini “Raqamli qishloq xo‘jaligi” platformasida joriy qilish holati muhokama qilindi.
Agrotexnik tadbirlarni bajarishga ko‘maklashish va “Agromonitoring” tizimida monitoring qilish, “Ustoz-shogird” an’anasi asosida bilim va ko‘nikmalar almashinuvini yo‘lga qo‘yish orqali paxtadan yuqori hosil olish imkoniyatlarini kengaytirish va mavsum yakunida shogirdi 50 sentnerdan oshgan “ustoz”larni rag‘batlantirish jarayonlarini raqamlashtirishga alohida e’tibor qaratildi.
Shuningdek, olimlar va fermerlarning o‘zaro hamkorligini kuchaytirish, ilmiy yondashuvni amaliyot bilan uyg‘unlashtirish masalasi kelgusi yil mavsumida muhim omil bo‘lishi qayd etildi.
Bu borada ilmiy tavsiyalarni dalalarda sinovdan o‘tkazish va ularning natijadorligini oshirish ustuvor vazifalardan biri sifatida belgilandi.
Yig‘ilishda paxta mavsumida yuqori hosil olishda agrotexnik tadbirlarni o‘z vaqtida va sifatli bajarish, xususan, desikatsiya va defoliatsiya jarayonlarini to‘g‘ri tashkil etishda ham “Ustoz-shogird” an’anasining muhim o‘rni borligi alohida qayd etildi.