O‘zbekiston Respublikasi Qishloq хo‘jаligi vаzirligi

Tadbirda Qishloq xo‘jaligi vazirligining departament va boshqarma rahbarlari, Toshkent viloyatining bir qator tumanlarida faoliyat yuritayotgan fermer xo‘jaliklari rahbarlari, klasterlar vakillari, agronomlar, olimlar hamda soha mutasaddilari ishtirok etdi.

 

Seminarning nazariy qismida Germaniyaning “BIZPANDO” kompaniyasi vakillari “Biochar” texnologiyasining ilmiy asoslari, uni samarali qo‘llash usullari hamda agroekotizim barqarorligidagi o‘rniga oid batafsil ma’lumotlar taqdim etdilar.

 

Shuningdek, “Biochar” orqali carbon market (karbon bozori) tizimiga kirish jarayoni, “Bizpando” platformasidan foydalanish bo‘yicha ko‘nikmalarni oshirish, ro‘yxatdan o‘tish tartibi va mahsulotga oid ma’lumotlarni elektron tizimga kiritish bo‘yicha batafsil ko‘rsatmalar berildi.

 

Amaliy qism Toshkent viloyatining O‘rta Chirchiq tumanidagi “Istiqlol” fermer xo‘jaligi dalasida bo‘lib o‘tdi. Unda ishtirokchilarga “Biochar” tayyorlash jarayoni, uni dalaga qo‘llash tartibi va texnologik talablari amaliy tarzda bosqichma-bosqich ko‘rsatib o‘tildi.

 

“Biochar” — yog‘och, o‘simlik qoldiqlari, g‘o‘zapoya, chorva mollari go‘ngi, maishiy va boshqa organik chiqindilarni kislorodsiz muhitda kuydirish natijasida olinadigan tabiiy mahsulot. U tuproqning organik moddalarga boyligini oshiradi, ozuqa elementlarini ko‘paytiradi, namlikni uzoq muddat saqlaydi, mikroorganizmlar faolligi va xilma-xilligini kuchaytiradi.

 

Bundan tashqari, biocharning g‘ovak tuzilishi tuproqning havodorligini yaxshilaydi, suvni ushlab turish qobiliyatini oshiradi va tuproq strukturasini mustahkamlaydi. Seminar davomida ushbu afzalliklar fermerlarga batafsil tushuntirildi hamda texnologiyani mamlakatning barcha hududlarida keng joriy etish zarurligi ta’kidlandi.