O‘zbekiston-Xitoy: agrar yo‘nalishdagi ilmiy hamkorlik rivojlanmoqda
2025-11-18 17:00:00 / Rahbariyatning bayonotlari va nutqlari
Muzokaralarda o‘simlik genetikasi, molekulyar seleksiya va biotexnologiyalar yo‘nalishlarida qo‘shma ilmiy tadqiqotlar boshlash, paxta hamda sabzavot-poliz ekinlari bo‘yicha yangi seleksiya dasturlarini ishlab chiqish masalalari muhokama qilindi. Shuningdek, yosh olimlarning Xitoy ilmiy markazlarida malaka oshirish imkoniyatlarini kengaytirish haqida kelishuvga erishildi.
Tomonlar zamonaviy paxtachilik texnologiyalarini tatbiq etish, O‘zbekiston agroiqlim sharoitiga mos yuqori hosilli navlarni yaratish, qo‘shma dala tajribalari va ilmiy-demonstratsiya uchastkalarini tashkil etishga doir rejalarni belgilab oldi.
Uchrashuvda Xitoydan olib kiriladigan urug‘lar sifati ustidan ilmiy nazoratni kuchaytirish, qo‘shma ekspert komissiyasini tuzish taklifi ilgari surildi. Kelgusida urug‘ importi bo‘yicha qarorlar yuqori malakali mutaxassislar xulosalari asosida qabul qilinadi.
Suhbat davomida suv tejovchi uslublar, aqlli qishloq xo‘jaligi tizimlari, dronlardan foydalanish, raqamli monitoring va mexanizatsiya bo‘yicha qo‘shma loyihalar istiqbollari ham ko‘rib chiqildi.
Tadbir yakunida Xitoyning ikki yirik ilmiy instituti va O‘zbekistonning Qishloq xo‘jaligida bilim va innovatsiyalar milliy markazi o‘rtasida Anglashuv Memorandumi (MoU) imzolandi.
Mazkur kelishuvlar ikki davlat o‘rtasidagi agrar ilm-fan aloqalarini mustahkamlab, seleksiya va urug‘chilik sohalarida innovatsion rivojlanish jarayonini jadallashtirishi kutilmoqda.