Ilm va amaliyot uyg‘unligi: Toshkent davlat agrar universitetida qishloq xo’jaligi ko‘rgazmasi tashkil etildi
2025-11-12 18:00:00 / Ommaviy tadbirlar
Ko‘rgazmada mamlakatimizning barcha hududlaridan kelgan fermer xo‘jaliklari, ishlab chiqaruvchilar, ilmiy-tadqiqot markazlari va talabalar o‘z yutuq va ishlanmalarini namoyish etishdi.
Stendlarda yangi urug‘ navlari, suv tejovchi texnologiyalar, organik o‘g‘itlar, zamonaviy texnika namunalari, qayta ishlash mahsulotlari hamda yosh mutaxassislarning innovatsion loyihalari taqdim etildi. Vazir jarayonlarni kuzatar ekan, viloyatlar o‘rtasida tajriba almashinuvini kengaytirish, mahsulotlarni qayta ishlashni rivojlantirish hamda yoshlarning ilmiy ishlanmalarini tijoratlashtirish zarurligini ta’kidladi.
Shuningdek, vazir universitet hududida yangidan foydalanishga topshirilgan “Renessans” ma’ruzalar zalini ham ko‘zdan kechirdi.
Mazkur zamonaviy bino — ilm, ta’lim va innovatsiyalar uyg‘unlashgan yangi markaz sifatida qad rostlagan.
Zalda interaktiv texnologiyalar, qulay o‘quv auditoriyalari, videokonferensiyalar uchun zarur sharoitlar yaratilgan.
Vazir yangi binodagi imkoniyatlarni yuqori baholab, uni yoshlar uchun ijod va ilm markaziga aylantirish, xalqaro tadbirlar va startap loyihalarni o‘tkazish uchun faol foydalanish bo‘yicha tavsiyalar berdi.