Bugun ijtimoiy tarmoqlarda Yuridik universiteti asosiy binosining (sobiq Markaziy ofitserlar saroyi binosi) orqa tomonidagi yashil maydonda transformator yongani haqida xabar tarqaldi.

Shuni maʼlum qilamizki, bu xabar haqiqatga toʻgʻri kelmaydi. 2024-yil 28-noyabr kuni soat 22:59 da Yunusobod tumani, “Qashqar“ MFY, “Markaz-4” kvartali, Istiqlol koʻchasida joylashgan Toshkent shahar Markaziy maydonlarini Obodonlashtirishga ixtisoslashtirilgan Boshqarmasiga qarashli ishchilarning kundalik jihozlari (ust-boshi, supurgisi, chelak, latta va boshqa buyumlar) saqlanadigan konteynerda yongʻin chiqqan. Oqibatda uning taxminan 20 kvadrat metr ichki qismi maydoni yongan.

Yongʻin oʻt oʻchiruvchilar tomonidan soat 23:07 da qurshab olinib, soat 23:08 da oʻchirilgan. Yongʻin oqibatida tan jarohati olganlar yoʻq.

Biz ijtimoiy tarmoq foydalanuvchilari va koʻp sonli obunachilarga ega kanallardan har bir xabarning toʻgʻri ekanligiga ishonch hosil qilgach, tarqatishlarini soʻraymiz. Zero, yolgʻon va tasdiqlanmagan xabar eng avvalo ularning oʻziga nisbatan ishonch pasayishiga sabab boʻladi.