Qonunga koʻra, Yer kodeksiga qishloq xoʻjaligiga moʻljallangan yer uchastkasining ijarachisi yer uchastkalaridan biri yoki bir nechtasi boʻyicha oʻz huquq va majburiyatlarini boshqa shaxsga oʻtkazishi mumkinligini nazarda tutuvchi qoʻshimchalar kiritildi.

Ushbu oʻzgarishlar qishloq xoʻjaligiga moʻljallangan yer uchastkalaridan foydalanish samaradorligini oshirishga qaratilgan.

1. Ijaraga oluvchi yer uchastkasiga boʻlgan huquq va majburiyatlarini boshqa shaxsga oʻtkazishi (qayta ijaraga berishi) mumkin. Bunda qayta ijaraga beriladigan va ijaraga oluvchining oʻzida qoladigan yer uchastkalari maydoni ushbu Kodeksning 46¹-moddasida belgilangan oʻlchamlardan kam boʻlmasligi, yer tuzish loyihasiga muvofiq konturlar yaxlitligi saqlab qolinishi kerak.

2. Fermer xoʻjaligi boshligʻi tadbirkorlik faoliyati bilan shugʻullanishga yoʻl qoʻyilmaydigan ishga qabul qilingan taqdirda yer uchastkasini ijaraga olish huquqini oʻz oila aʼzolaridan biriga berishi mumkin boʻladi.

Mazkur oʻzgarishlar qishloq xoʻjaligi yerlaridan foydalanishning samaradorligini oshirish, fermer xoʻjaliklarining barqaror faoliyatini taʼminlash hamda yer munosabatlarini yanada liberallashtirishga xizmat qiladi.

Iqtisodiyot va moliya vazirligi

Axborot xizmati va kommunikatsiyalar boshqarmasi