Koreyaga ishlash uchun borgan bakalavr diplomiga ega yurtdoshlarimiz magistratura bosqichida imtiyozli o'qishi va stipendiya olishi mumkin
2024-03-05 15:35:00 / Vazirlik yangiliklari
Bu haqda, Kambag‘allikni qisqartirish va bandlik vazirligi huzuridagi Tashqi mehnat migratsiyasi agentligi delegatsiyasi a'zolari hamda Seul Milliy fan va texnologiya universiteti vitse-prezidenti Yong Ju Choy o‘rtasida imzolangan memorandumda qayd etilgan.
Bugun Seul shahrida bo'lib o'tgan uchrashuvda, Koreya Respublikasida ishlash istagida bo‘lgan fuqarolarni koreys tili va madaniyatiga o‘qitishni tashkil etish, shuningdek, Tashqi mehnat migratsiyasi agentligi tomonidan ishga yuborilgan, bakalavr diplomiga ega ishchilarni IT va boshqa zamonaviy kasblar bo‘yicha o‘qitib malakali mutaxassislar tayyorlash bo‘yicha hamkorlikda amalga oshiriladigan yangi loyihalar muhokama qilindi.
Uchrashuvda “Seul Milliy Fan va texnologiya universiteti”ning tashkil etilishi va faoliyati yuzasidan taqdimot tinglandi.
Ushbu taʼlim dargohi 1995 yili tashkil topgan bo‘lib bugungi kunda 1000 nafar talabalar asosan IT sohasi, menejment kabi zamonaviy yo‘nalishlarida magistratura bosqichida taʼlim olmoqda.
Universitet huzurida koreys tili va madaniyatini o‘qitish markazi faoliyati yo‘lga qo‘yilgan.
O‘tgan davr mobaynida universitetni 6 ming nafardan ortiq talabalar bitirib, hozirda SAMSUNG, LG, NAVER, Google, FEDEX, iNtube, baikal.ai kabi taniqli kompaniyalarda malakali mutaxassis sifatida faoliyat olib bormoqda.
Muassasada “onlayn” va “offlayn” o‘quv dasturlari faoliyati yo‘lga qo‘yilgan bo‘lib, nomzodlar ish joyidan ajralmagan holda magistratura bosqichida taʼlim olishlari uchun imkoniyat yaratilgan.
Kelgusida Tashqi mehnat migratsiyasi agentligi bilan hamkorlikda Koreya Respublikasida ishlash istagida bo‘lgan fuqarolar va ayni paytda Koreyada mehnat faoliyatini amalga oshirayotgan ishchilarni koreys tili va mutaxassislik bo‘yicha o‘qitish yuzasidan takliflar bildirdi.
Uchrashuvda yakunida Tashqi mehnat migratsiyasi agentligi hamda “Seul Milliy Fan va Texnologiya Universiteti” o‘rtasida quyidagi masalalarni o‘z ichiga olgan ikki tomonlama hamkorlik Memorandumi imzolandi:
1. O‘zbekistonda Koreys tili o‘qituvchilarini tayyorlash loyihasini amalga oshirish.
2. Tashqi mehnat migratsiyasi agentligi tomonidan ishga yuborilgan, bakalavr diplomiga ega fuqarolar uchun imtiyozli (“onlayn”, stipendiya to‘lanadigan) magistratura o‘quv bosqichini tashkil etish.
3. O‘zbekistonda koreys tili va IT sohasi mutaxassisligi bo‘yicha maxsus kurslar tashkil etish.
4. Koreya Respublikasiga malakali ishchilarni (E-7 viza asosida) tayyorlash bo‘yicha maxsus o‘quv dasturlarini ishlab chiqish va malakali mutaxassislikni tayyorlash.