Qoraqalpog‘iston dalalarida yangicha qarash, zamonaviy yondashuv
2025-07-04 09:30:00 / Yangiliklar
Tashrif dasturining ilk lokatsiyasi bo‘yicha Xo‘jayli tumanidagi Shukurullayeva To‘lg‘anoy fermer xo‘jaligi dala maydonida bo‘ldi.
Dala hududida tashkil etilgan tashrif doirasida vazir, eng avvalo, g‘alladan bo‘shagan yer maydonlariga takroriy ekin sifatida ekilgan kunjut va mosh ekinlari holatini ko‘zdan kechirdi. Shu bilan birga, g‘o‘za maydonlarida amalga oshirilayotgan agrotexnik tadbirlar, ularning sifati va muddati bilan tanishib, ushbu jarayonlarga doir dolzarb masalalarga e’tibor qaratdi.
Qayd etish lozimki, mazkur xo‘jalikda 6 gektar yer maydoniga S-4728 paxta navi yakkaqator qilib ekilgan bo‘lib, bu navi o‘zining sho‘rga chidamliligi, issiq iqlimga moslashuvchanligi va hosildorligi bilan ajralib turadi. Bu borada amalga oshirilayotgan tajribalar, ayniqsa, Qoraqalpog‘iston kabi murakkab agroiqlimiy hududlar uchun g‘oyat dolzarb ahamiyat kasb etadi.
Vazir Ibrohim Abdurahmonov ushbu yerda bo‘lib, g‘o‘zaning o‘sish bosqichiga ko‘mak beruvchi “Sajem” preparatini qo‘llash bo‘yicha tavsiyalar berdi. U, shuningdek, o‘simliklar vegetatsiyasini faollashtirish, sho‘rlangan yerlarda hosildorlikni oshirish, suv resurslaridan oqilona foydalanish masalalariga ham alohida e’tibor qaratdi.
Aytish kerak, hozirgi kunda Qoraqalpog‘istonda iqlim sharoitiga mos, sho‘rga chidamli, hosildorligi yuqori bo‘lgan paxta navlarini yaratish va amaliyotga tatbiq etish borasida tizimli ishlar olib borilmoqda. S-4728 navi esa bu yo‘nalishdagi ilm-fan, tajriba va amaliyot uyg‘unligining yorqin namunasi bo‘lib xizmat qilmoqda.
Qoraqalpog‘iston kabi tabiati qiyin, resurslari cheklangan hududlarda ham zamonaviy yondashuvlar va ilmiy asoslangan tajribalarning keng joriy etilayotgani mamlakatimiz agrar siyosatining puxta va uzoqni ko‘zlagan strategiyasidan dalolat beradi.
Bu esa nafaqat bugungi hosil, balki ertangi oziq-ovqat xavfsizligi, eksport salohiyati va dehqon manfaatining ishonchli kafolatidir.