O‘zbekiston Respublikasi Qishloq хo‘jаligi vаzirligi

Uchrashuv davomida Bunyod Mamarahimov O‘zbekiston va Xitoy o‘rtasidagi uzoq yillik qishloq xo‘jaligi sohasidagi hamkorlikni e’tirof etib, amaliy hamkorlik ilm-fan va iqtisodiyotga katta foyda keltirayotganini ta’kidladi.

O‘tgan yili O‘zbekiston Respublikasi Prezidentining qaroriga muvofiq, mamlakatimizda jami paxta ekiladigan maydonning 10% qismida xorijiy g‘o‘za navlari ekilib, Shinjon agrotexnologiyasi asosida yetishtirildi. Shuningdek, yana 10% maydonda mahalliy navlarimiz Shinjon uslubida ekilib, natijalar oldingi yil ko‘rsatkichlari bilan qiyosiy tahlil qilindi.

Joriy yilda esa mahalliy g‘o‘za navlari hamda ko‘sak qurtiga chidamlilikni ta’minlovchi Bt geni mavjud xorijiy g‘o‘za navlari urug‘chiligini yo‘lga qo‘yish bo‘yicha Xitoy bilan ilmiy hamkorlik istiqbollari muhokama qilindi. Ushbu reja haqida Bunyod Mamarahimov o‘z taqdimotida batafsil ma’lumot berdi.

Ma’lumot uchun:  Bt g‘o‘za – genetik jihatdan o‘zgartirilgan nav bo‘lib, o‘simlik genomiga ko‘sak qurti zararkunandasi uchun zararli bo‘lgan oqsillarni sintezlovchi CRY1Ab, CRY1Ac va CRY2Ab genlari kiritilgan.

Ko‘sak qurtiga chidamlilik Bacillus thuringiensis (Bt) tuproq bakteriyasining genetik materialini o‘simlikka o‘tkazish orqali erishiladi. Ushbu genetik material faqat hasharot va zararkunandalarga toksik ta’sir ko‘rsatib, sutemizuvchilar va boshqa organizmlarga zarar yetkazmaydi.