Ijtimoiy tarmoqlarda mamlakatimizda kartoshka narxi oshishi mumkinligi yuzasidan tarqalayotgan xabarlar yuzasidan Qishloq xo‘jaligi vazirligining rasmiy munosabati
2025-01-21 11:00:00 / Rahbariyatning bayonotlari va nutqlari
Mazkur xabarlar yuzasidan O‘zbekiston Respublikasi Qishloq xo‘jaligi vazirligi shuni ma’lum qiladiki, mamlakatimiz aholisining kartoshkaga bo‘lgan yillik talabi 4 mln tonnani tashkil etadi.
2024-yilda mamlakatimizda jami 3,7 mln tonna, shundan asosiy maydonda 2,7 mln tonna va takroriy ekin sifatida 1 mln tonna kartoshka yetishtirilgan.
Odatda yetishtirilgan kartoshkaning 3 mln tonnasi, shundan asosiy maydon hosilidan 2 mln 250 ming tonna 2024-yil aprel-oktyabrda va takroriy maydon hosilidan 750 ming tonnasi 2024-yil noyabrdan 2025-yil aprelgacha ichki iste’molga yo‘naltiriladi.
Joriy yil 20-yanvar holatiga mahalliy hokimliklar tomonidan jalb qilingan tayyorlov korxonalari tomonidan jami 6,3 ming tonna kartoshka ichki bozorlarga savdoga chiqarilgan. 2024-yilda 703 ming tonna, shundan dekabr oyida 74,4 ming tonna kartoshka import qilingan.
Shuni alohida ta’kidlash kerakki, mamlakatimizga kartoshka importi faqat Qozog‘iston Respublikasiga bog‘lanib qolmagan. Mamlakatimizda qishloq xo‘jaligi mahsulotlarini diversifikatsiya qilish, oziq-ovqat xavfsizligini ta’minlash yuzasidan olib borilayotgan ishlar samarasi tufayli ayni paytda qo‘shni Qozog‘istondan tashqari Pokiston, Qirg‘iz Respublikasi va Afg‘on Islom Respublikalaridan ham kartoshka import qilish yo‘lga qo‘yilgan.
Xususan, mamlakatimizda kartoshka yetishmovchiligining oldini olish va o‘z vaqtida zarur chora-tadbirlar ko‘rish uchun 2024-yil 6-11-dekabr kunlari Qishloq xo‘jaligi vazirligi huzuridagi O‘simliklar karantini va himoyasi agentligi rahbari I. Ergashev rahbarligida O‘zbekiston delegatsiyasi Eron va Pokistonga yuborildi.
Tashrif davomida erishilgan kelishuvga muvofiq, 2025-yil yanvar – may oylarida mamlakatimizga Erondan 100 ming tonna va Pokistondan 100 ming tonna jami 200 ming tonna kartoshka yetkazib beriladi.
Bundan tashqari, Surxondaryo viloyatidagi dala maydonlarida yetishtirilayotgan kartoshka hosili mart oyining ikkinchi yarmi va aprel oylarida to‘liq mamlakatimiz bozorlariga chiqariladi.
Ichki bozorni kartoshka bilan ta’minlash hamda narx barqarorligini saqlash uchun quyidagilar amalga oshiriladi:
- Iqtisodiyot va moliya vazirligi, Qishloq xo‘jaligi vazirligi, Qoraqalpog‘iston Respublikasi Vazirlar kengashi va viloyatlar hokimliklari bilan birga tayyorlov korxonalarida zaxira qilingan kartoshka hisobidan 239,2 ming tonna mahsulotni grafik asosida har 10 kunda 15-25 ming tonnagacha miqdorda ichki bozorga tizimli chiqariladi;
- Karantin agentligi tomonidan importyor tadbirkorlar bilan Pokistondan va Erondan 100 ming tonnadan hamda Afg‘onistondan fitosanitar talablarga muvofiq qo‘shimcha kartoshka olib kelish tashkil etiladi;
- Surxondaryo viloyatida yanvar oyida 7,5 ming gektar hamda fevral oyida barcha viloyatlarda (Qoraqalpog‘iston Respublikasi va Xorazm viloyatidan tashqari) 28,5 ming gektar maydonda kartoshka ekilib, aprel oyida 70 ming tonna, may oyida 450 ming tonna hosil yetishtirilib, ichki bozorga yo‘naltiriladi va aholi talabi to‘liq ta’minlanadi.
Yuqoridagilardan kelib chiqib, yurtdoshlarimizdan mamlakatimizda kartoshka narxi oshishi haqidagi bir tomonlama olingan ma’lumotlardan foydalangan holda tarqatilayotgan xabarlarga aldanib qolmasliklarini, jurnalistlar ijtimoiy tarmoqlar faollari va blogerlardan esa bu kabi xabarlarni tayyorlashda asosli ma’lumotlardan foydalanishlarini so‘raymiz.