O‘zbekiston Respublikasi Qishloq хo‘jаligi vаzirligi

 Shu bois O‘zbekiston va Qozog‘iston yaqin qo‘shni, ishonchli hamkor va yonma-yon joylashgan qardosh davlatlardir.  Ikki davlat xalqlari o‘rtasidagi o‘zaro aloqalar, birodarlik rishtalari esa uzoq tarixga ega. So‘nggi yillarda ikki davlat o‘rtasida hamkorlikning yangi davri boshlanib, siyosiy, savdo-iqtisodiy, madaniy-gumanitar va boshqa sohalarda o‘zaro manfaatli munosabatlar jadal rivojlanib bormoqda.

Ana shunday mustahkam hamkorlik aloqalarining natijasi o‘laroq, Qozog‘iston Respublikasi Ostona shahrida “O‘zbekiston-Qozog‘iston” biznes forumi o‘tkazilmoqda.

 Davlatimiz rahbarining Qozog‘iston Respublikasiga rasmiy davlat tashrifi doirasida mazkur biznes-forumining tashkil etilishi ham yangidan yangi hamkorlik va investitsion loyihalarni jalb qilishga qaratilgani, o‘zbek va qozoq agrar soha vakillari uchun ham o‘z yo‘nalishida hamkorlik loyihalarini amalga oshirishda yana bir imkoniyatlar eshigi bo‘lib xizmat qilayotgani rost.

Bugungi kunda dunyo mamlakatlarida kuzatilayotgan turli xil iqtisodiy masalalar hamkorlar bilan yanada ishonchli aloqalarni mustahkamlashni taqozo etadi. Qozog‘iston azaldan yon qo‘shni va ishonchli do‘st sifatida o‘zini namoyon qila olgan. Biznes forum esa ushbu maqsadlarni yanada mushtarak ekanini isbotladi.

Bu safar bir davrada, bir stolda agrobiznes mutasaddilari va ishtirokchilari jam bo‘lishdi. O‘zbek zaminida yetilgan barcha sarxil mahsulot bovurlarimiz dasturxoniga taqdim etishga shayligimiz shu yerda basma-bas imzolangan shartnomalarda ham zohir bo‘ldi.

Yon qo‘shnimizda ham niyatlar jiddiy: bepoyon yerlarni o‘zlashtirish, hosil yetishtirishda qardoshlarining yordamidan umidvor. Go‘sht va undan tayyorlanadigan mahsulotlar ham o‘zbek dasturxonini bezashiga tayyorlar. 

Quvonarli jihati shundaki, sarmoya bilan birgalikda eng so‘nggi ishlanma, ilmiy izlanish natijalari hamda bilim hosilalarini ayni qardosh do‘stlari bilan istiqbolli sanayotgan kompaniya vakillari bilan “B2B” uchrashuvlar doirasida investitsion hamkorlik shartnomalari imzolandi. 

Suv tejovchi texnologiyalar, chorvachilik, mahsulotlarni qayta ishlash, mevali ko‘chatlar yetishtirish, innovatsion laboratoriyalar tashkil etish, qishloq xojaligi mahsulotlarning yangi avlodini yetishtirishda yerdan unumli foydalanish loyihalari. Bular ayni uchrashuv doirasida muhokama qilingan hamda qog‘ozdan amaliyotga ko‘chayotgan kelishuvlar.

Mamlakatimiz qishloq xo‘jaligida hali ishga solinmagan imkoniyatlar bisyor. Shu bois so‘nggi yillarda agrar soha rivojiga davlat siyosati darajasida e’tibor qaratilmoqda. Ushbu e’tibor samarasi o‘laroq. O‘zbekiston qishloq xo‘jaligi ichki bozorni sara meva-sabzavotlar bilan to‘ldiribgina qolmay, qo‘shni va uzoq xorij mamlakatlari bozorlarini ham egallamoqda.

Jumladan, O‘zbekiston va Qozog‘istonning qishloq xo‘jaligi bo‘yicha Qo‘shma ishchi guruhi ikki mamlakat o‘rtasida qishloq xo‘jaligi sohasidagi hamkorlik doirasidagi dolzarb vazifalarni amalga oshirish ustida izchil ishlar olib bormoqda.

Zero, qardosh mamlakatlar o‘rtasidagi yaqin  va har tomonlama manfaatli hamkorlik hamda sohadagi bugungi islohotlar, aholini sifatli oziq-ovqat mahsulotlari bilan ta’minlash, qo‘shilgan qiymat zanjirni yaratishda muhim rol o‘ynaydi.