O‘zbekiston Respublikasi Oila va xotin-qizlar qo‘mitasi

Milliy o‘zligimizni anglash va anglatishga qaratilgan mazkur majmuada tashkil etiladigan “Islomdan avvalgi sivilizatsiyalar”, “Birinchi Renessans davri”, “Ikkinchi Renessans davri”, “O‘zbekiston XX asrda”, “Yangi O‘zbekiston -  yangi Renessans” kabi bo‘limlar tashrif buyuruvchilarda juda katta taassurot qoldirdi. 

Ayniqsa, ilm-fan va san’atga homiylik qilgan o‘tmishning yetuk ayollari - Bibixonim, Xonzodabegim, Gavharshodbegim, Gulbadan, Nodirabegim, Uvaysiy, Anbar Otin kabilarga alohida bo‘lim bag‘ishlanganligi ayollar qalbida o‘tmish momolarimiz bilan faxrlanish tuyg‘ularini yanada yuksaltirdi. 
Ayni shu bo‘limda Bosh vazir o‘rinbosari va mas’ullar tomonidan  “Ayol ma’rifati” jamoatchilik kengashi vakillari orqali o‘tmish madaniy va adabiy merosimizni yanada chuqurroq tadqiq qilish, madrasalar barpo etgan, yirik podsholarni tarbiyalagan ulug‘ onalar siymosini kelajak avlodga yetkazish borasida fikr-mulohazalar bildirildi.  
🔹 Davlatimiz Rahbari kuni kecha ta’kidlaganlaridek, «Islom sivilizatsiyasining, islom ta’limotining zamini — aslida ilm-fan, madaniyat, ta’lim va tarbiyadir. Biz barpo etayotgan markazning bosh g‘oyasi, asosi ham shu. Eng muhim tomoni — yurtimizdagi islom madaniyati bilan bog‘liq bir necha ming yillik qadimiy o‘tmish bir joyda — mana shu majmuada mujassam bo‘ladi. Markaz bilan tanishgan odam ana shu tarixni yaqqol ko‘rib, islom dini, bu avvalo, tinchlik, taraqqiyot va bag‘rikenglik dini ekanini, o‘zbek xalqining dunyo tamadduniga qo‘shgan buyuk hissasini anglaydi».