O‘zbekiston Respublikasi Oila va xotin-qizlar qo‘mitasi to‘g‘risida

NIZOM

1-bob. Umumiy qoidalar

1. Ushbu Nizom O‘zbekiston Respublikasi Oila va xotin-qizlar qo‘mitasining (keyingi o‘rinlarda — Qo‘mita) maqomi, asosiy vazifalari va funksiyalari, huquqlari va javobgarligini, shuningdek, faoliyatini tashkil etish va hisobot berish tartibini belgilaydi.

2. Qo‘mita oila va xotin-qizlarni qo‘llab-quvvatlash, ularning huquq va qonuniy manfaatlarini himoya qilish sohasidagi yagona davlat siyosatini yuritadigan alohida maqomga ega respublika ijro etuvchi hokimiyat organi hisoblanadi hamda o‘z faoliyatida O‘zbekiston Respublikasi Vazirlar Mahkamasiga (keyingi o‘rinlarda — Vazirlar Mahkamasi) bo‘ysunadi.

3. Qo‘mita o‘z faoliyatida O‘zbekiston Respublikasi Konstitutsiyasi va qonunlariga, O‘zbekiston Respublikasi Oliy Majlisi palatalarining qarorlariga, O‘zbekiston Respublikasi Prezidentining farmonlari, qarorlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga, ushbu Nizomga va boshqa qonunchilik hujjatlariga amal qiladi.

4. Qo‘mita o‘z faoliyatini respublika va mahalliy ijro etuvchi hokimiyat organlari, xo‘jalik birlashmalari va boshqa tashkilotlar bilan hamkorlikda amalga oshiradi.

5. Qo‘mitaning o‘z vakolatlari doirasida qabul qilgan qarorlari davlat organlari, mahalliy ijro etuvchi hokimiyat organlari, boshqa tashkilotlar va ularning mansabdor shaxslari, shuningdek, fuqarolar tomonidan bajarilishi majburiy hisoblanadi.

6. Qo‘mita, Qoraqalpog‘iston Respublikasi Oila va xotin-qizlar qo‘mitasi, viloyatlar va Toshkent shahar oila va xotin-qizlar boshqarmalari yuridik shaxs hisoblanadi, O‘zbekiston Respublikasi Davlat gerbi tasviri tushirilgan muhrga va blankalarga, o‘z logotipiga, mustaqil balansiga, O‘zbekiston Respublikasi Iqtisodiyot va moliya vazirligi huzuridagi G‘aznachilik xizmati qo‘mitasida milliy va xorijiy valyutalarda shaxsiy g‘azna hisobvaraqlariga ega bo‘ladi.

Qo‘mitaning tuman (shahar) bo‘limlari Qoraqalpog‘iston Respublikasi Oila va xotin-qizlar qo‘mitasi, viloyatlar va Toshkent shahar oila va xotin-qizlar boshqarmalari orqali markazlashgan tarzda moliyalashtiriladi.

7. Qo‘mitaning rasmiy nomi:

a) davlat tilida:

to‘liq nomi — O‘zbekiston Respublikasi Oila va xotin-qizlar qo‘mitasi, qisqartirilgan nomi — Oila va xotin-qizlar qo‘mitasi;

b) rus tilida:

to‘liq nomi — Komitet semi i jenshin Respubliki Uzbekistan, qisqartirilgan nomi — Komitet semi i jenshin;

v) ingliz tilida:

to‘liq nomi — The Committee on Family and Women of the Republic of Uzbekistan, qisqartirilgan nomi — The Committee on Family and Women.

8. Qo‘mitaning joylashgan joyi (pochta manzili): 100000, Toshkent shahri, Mirzo Ulug‘bek tumani, Ismoiliy ko‘chasi, 1 G-uy.

2-bob. Qo‘mitaning tuzilmasi

9. Qo‘mita tizimiga quyidagilar kiradi:

Qo‘mitaning markaziy apparati;

Qoraqalpog‘iston Respublikasi Oila va xotin-qizlar qo‘mitasi, viloyatlar hamda Toshkent shahar oila va xotin-qizlar boshqarmalari (keyingi o‘rinlarda — hududiy boshqarmalar);

tuman (shahar) oila va xotin-qizlar bo‘limlari (keyingi o‘rinlarda — tuman (shahar) bo‘limlari);

Oila va gender ilmiy-tadqiqot instituti;

Oila va xotin-qizlarni qo‘llab-quvvatlash davlat maqsadli jamg‘armasi;

respublika va hududiy “Xotin-qizlar tadbirkorlik markazlari”;

Zulfiya nomidagi Davlat mukofoti komissiyasi;

mahalladagi xotin-qizlar faollari;

“Olima ayollar” jamiyati;

“Saodat” jurnali, “Markaziy Osiyoda jamiyat, gender va oila” xalqaro ilmiy jurnali tahririyati.

10. Hududiy boshqarmalar Qo‘mitaga hamda tegishlicha Qoraqalpog‘iston Respublikasi Vazirlar Kengashiga, viloyatlar va Toshkent shahar hokimliklariga hisobot beradi.

Tuman (shahar) bo‘limlari tegishli hududiy boshqarmalar va tuman (shahar) hokimliklariga hisobot beradi.

Oila va gender ilmiy-tadqiqot instituti, Oila va xotin-qizlarni qo‘llab-quvvatlash davlat maqsadli jamg‘armasi, respublika va hududiy “Xotin-qizlar tadbirkorlik markazlari”, Zulfiya nomidagi Davlat mukofoti komissiyasi, “Saodat” jurnali, “Markaziy Osiyoda jamiyat, gender va oila” xalqaro ilmiy jurnali tahririyati Qo‘mitaga hisobot beradi.

Qo‘mita iqtidorli xotin-qizlarni qo‘llab-quvvatlash masalasida “Olima ayollar” jamiyati bilan o‘zaro hamkorlik qiladi.

3-bob. Qo‘mita va uning hududiy bo‘linmalarining asosiy vazifalari va funksiyalari

11. Quyidagilar Qo‘mitaning asosiy vazifalari hisoblanadi:

xotin-qizlarni qo‘llab-quvvatlash tizimini kuchaytirish, ularning ijtimoiy-siyosiy faolligini oshirish, huquqlarini himoya qilish va qonuniy manfaatlarini ifodalash;

erkaklar va xotin-qizlarning teng huquq hamda imkoniyatlarini ta’minlash, xotin-qizlar va oilani har tomonlama qo‘llab-quvvatlashga oid qonunchilik hujjatlarini takomillashtirish bo‘yicha takliflar ishlab chiqish;

davlat xizmati, ta’lim, ilm-fan va innovatsiya, sport, sog‘liqni saqlash hamda boshqa ijtimoiy-iqtisodiy sohalarda xotin-qizlarni qo‘llab-quvvatlash bo‘yicha chora-tadbirlarni ishlab chiqish va amalga oshirish;

iqtidorli xotin-qizlarni aniqlash va qo‘llab-quvvatlash tizimini takomillashtirish;

xotin-qizlarning kasbiy ko‘nikmalarini oshirish, munosib ish topishiga ko‘maklashish, tadbirkorligini rivojlantirish;

oila a’zolarining huquqiy madaniyatini oshirish, ular o‘rtasida huquqbuzarliklarning oldini olish, ijtimoiy xodim va boshqa davlat xizmatchilari bilan hamkorlikda xotin-qizlarni tazyiq va zo‘ravonliklardan himoya qilish;

oilalarda sog‘lom turmush tarzini shakllantirish, sog‘lom ovqatlanish hamda reproduktiv salomatlik qoidalarini ommalashtirish;

oila institutini mustahkamlash, ijtimoiy-ma’naviy muhit barqarorligini ta’minlash, umuminsoniy va milliy qadriyatlarni targ‘ib qilish;

migratsiyadan qaytgan, jazoni ijro etish muassasalaridan ozod etilgan, og‘ir ijtimoiy vaziyatga tushib qolgan xotin-qizlarning ijtimoiy moslashuviga, ular bilan manzilli ishlash orqali zarur yordamlar olishlariga ko‘maklashish;

keys menejmentni qo‘llagan holda, ijtimoiy himoyaga muhtoj xotin-qizlarni aniqlash hamda ular bilan manzilli ishlash;

o‘ziga yuklangan vazifalarni o‘z vaqtida va sifatli amalga oshirish uchun davlat tashkilotlari, xalqaro moliya institutlari hamda fuqarolik jamiyati institutlari bilan yaqindan hamkorlik o‘rnatish;

mahallalardagi xotin-qizlar faollari faoliyatini muvofiqlashtirish va ularga biriktirilgan jamoatchilik tuzilmalari bilan hamkorlikni ta’minlash.

12. Qo‘mita o‘ziga yuklangan vazifalarga muvofiq quyidagi funksiyalarni amalga oshiradi:

a) xotin-qizlarni qo‘llab-quvvatlash tizimini kuchaytirish, ularning ijtimoiy-siyosiy faolligini oshirish, huquqlarini himoya qilish va qonuniy manfaatlarini ifodalash sohasida:

xotin-qizlarni qo‘llab-quvvatlashga doir davlat siyosatining samarali ijrosini ta’minlash, ularning huquqlari va qonuniy manfaatlarini himoya qilish hamda xotin-qizlarning ijtimoiy-siyosiy hayotdagi roli va faolligini oshirish bo‘yicha takliflar ishlab chiqadi va tegishli chora-tadbirlarni amalga oshiradi;

xotin-qizlarni oila, mahalla va mehnat jamoalarida ijtimoiy-huquqiy jihatdan qo‘llab-quvvatlash, ularning ijtimoiy-siyosiy faolligini oshirish bo‘yicha maqsadli chora-tadbirlarni amalga oshirishda Qo‘mitaning hududiy bo‘linmalari ishini samarali tashkil etish choralarini ko‘radi;

xotin-qizlarning ijtimoiy-siyosiy faolligini oshirish, ularni qo‘llab-quvvatlashga doir islohotlarning mazmun-mohiyati va ahamiyatini aholi o‘rtasida keng targ‘ib qiladi;

oilalar va xotin-qizlar, ayniqsa, og‘ir ijtimoiy ahvolga tushib qolgan oilalar va xotin-qizlarni ijtimoiy hamda moddiy qo‘llab-quvvatlash, shuningdek, ularning ta’lim olish imkoniyatlarini kengaytirish va ehtiyojlari qondirilishida har tomonlama yordam berishni tashkil etadi;

xotin-qizlar huquqlari va qonuniy manfaatlarini ko‘zlab, sudlarga ariza (shikoyat) va da’volarni kiritadi;

xotin-qizlar huquqlarini himoya qilish sohasida ijtimoiy sheriklik tizimini rivojlantirishga, respublika va mahalliy ijro etuvchi hokimiyat organlari bilan hamkorlik tamoyillarining amalga oshirilishiga ko‘maklashadi;

jamiyat va davlat hayotida faollik va tashabbuskorlik ko‘rsatgan, o‘zining samarali mehnati bilan oilaning totuvligi va farovonligi mustahkamlanishiga, onalik va bolalik muhofazasiga munosib hissa qo‘shgan, shuningdek, sog‘lom va barkamol avlodni voyaga yetkazish, Vatanga sadoqat ruhida tarbiyalash, joylarda ma’naviy-axloqiy muhitni sog‘lomlashtirish va milliy qadriyatlarni keng targ‘ib etish borasida ibratli faoliyat olib borayotgan xotin-qizlarni “Mo‘tabar ayol” ko‘krak nishoni bilan taqdirlash ishlarini tashkil etadi;

xotin-qizlar o‘rtasida har yili ularning mamlakat ijtimoiy-siyosiy hayotidagi o‘rni va faolligini oshirishga qaratilgan turli ko‘rik-tanlovlarni tashkil etadi;

idoraviy mansub tashkilotlar faoliyatiga umumiy rahbarlik qiladi, ularning faoliyatini tahlil qiladi, muvofiqlashtiradi, mazkur tashkilotlar rahbarlari bilan hamkorlikda ularning samarali ishlashini ta’minlaydi;

O‘zbekiston Respublikasi Prezidenti va Vazirlar Mahkamasi topshiriqlariga binoan hamda o‘z tashabbusiga ko‘ra normativ-huquqiy hujjatlar loyihalarini ishlab chiqadi va belgilangan tartibda ko‘rib chiqish uchun kiritadi;

faoliyatning belgilangan sohasiga tegishli masalalar bo‘yicha hujjatlar qabul qiladi;

O‘zbekiston Respublikasi Oliy Majlisi Qonunchilik palatasi va Senati, O‘zbekiston Respublikasi Prezidenti Administratsiyasi, Vazirlar Mahkamasiga xotin-qizlarni qo‘llab-quvvatlash tizimini kuchaytirish, ularning ijtimoiy-siyosiy faolligini oshirish, huquqlarini himoya qilish va qonuniy manfaatlarini ifodalash bilan bog‘liq normativ-huquqiy bazani takomillashtirish bo‘yicha takliflarni ko‘rib chiqish uchun kiritadi;

vazirliklar va idoralar, xo‘jalik birlashmalarining oila va xotin-qizlar masalalari bilan bog‘liq munosabatlarni tartibga soluvchi normativ-huquqiy hujjatlari, rivojlantirish dasturlari loyihalarini kelishadi;

o‘z vakolati doirasida respublikani ijtimoiy-iqtisodiy rivojlantirish dasturlari loyihalarini ishlab chiqishda ishtirok etadi;

b) erkaklar va xotin-qizlarning teng huquq hamda imkoniyatlarini ta’minlash, xotin-qizlar va oilani har tomonlama qo‘llab-quvvatlashga oid qonunchilik hujjatlarini takomillashtirish bo‘yicha takliflar ishlab chiqish sohasida:

jamiyat hayotining barcha sohalarida xotin-qizlar va erkaklar uchun teng huquq hamda imkoniyatlarga erishishga qaratilgan yagona davlat siyosati amalga oshirilishini ta’minlashda ishtirok etadi;

qonunchilikda belgilangan xotin-qizlar va erkaklar uchun teng huquq hamda imkoniyatlar kafolatlarini ta’minlash choralarini ko‘radi;

xotin-qizlar va erkaklar uchun teng huquq hamda imkoniyatlarni ta’minlash sohasidagi davlat dasturlarini, milliy harakatlar rejalarini va strategiyalarni ishlab chiqish hamda amalga oshirishda ishtirok etadi;

qonunchilikda belgilangan xotin-qizlar va erkaklar uchun teng huquq hamda imkoniyatlar kafolatlarini berish to‘g‘risidagi statistika ma’lumotlari va axborotlarni to‘plash hamda tahlil qilishni tashkil etadi;

respublika ijro etuvchi hokimiyat organlariga, tashkilotlarga va ularning mansabdor shaxslariga xotin-qizlar va erkaklar uchun teng huquq hamda imkoniyatlar kafolatlari to‘g‘risidagi qonunchilikning buzilishlari, shuningdek, ularni keltirib chiqaruvchi sabablar va shart-sharoitlarni bartaraf etish yuzasidan choralar ko‘rish haqida ko‘rib chiqilishi majburiy bo‘lgan taqdimnomalar kiritadi;

qonunchilikda belgilangan xotin-qizlar va erkaklar uchun teng huquq hamda imkoniyatlarni ta’minlash bo‘yicha takliflar ishlab chiqadi;

zarur hollarda, xotin-qizlar va erkaklar uchun teng huquq hamda imkoniyatlarni ta’minlash masalalari bo‘yicha davlat organlari, ilmiy muassasalar va boshqa tashkilotlarning rahbarlari hamda mutaxassislarini jalb qiladi, ishchi guruhlar tuzadi va tegishli chora-tadbirlar ishlab chiqadi;

O‘zbekiston Respublikasi tomonidan xotin-qizlar huquqlariga oid xalqaro hujjatlarning muhokama qilinishida, shuningdek, gender tenglik, ayollar masalalari bilan shug‘ullanuvchi tashkilotlarning huquqlari va faoliyatining kafolatlarini kengaytirish, yoshlarga va ijtimoiy sohalarga oid boshqa masalalar yuzasidan normativ-huquqiy hujjatlarning ishlab chiqilishida ishtirok etadi;

v) davlat xizmati, ta’lim, ilm-fan va innovatsiya, sport, sog‘liqni saqlash hamda boshqa ijtimoiy-iqtisodiy sohalarda xotin-qizlarni qo‘llab-quvvatlash bo‘yicha chora-tadbirlarni ishlab chiqish va amalga oshirish sohasida:

oliy ta’lim va ilmiy-tadqiqot muassasalari bilan hamkorlikda xotin-qizlarni ilm-fanga keng jalb etish, ular o‘rtasida innovatsiyalarni rivojlantirishga oid chora-tadbirlarni amalga oshiradi;

uzluksiz ta’lim tizimini rivojlantirish, xotin-qizlar va erkaklarni butun umr davomida o‘qishga bo‘lgan imkoniyatlarini rag‘batlantirish, ijtimoiy himoyaga muhtoj xotin-qizlarni oliy ta’lim bilan qamrab olishni kengaytirishga ko‘maklashadi;

xotin-qizlarni ilmiy faoliyatga keng jalb qilish, ularning zamonaviy axborot-kommunikatsiya texnologiyalariga asoslangan dasturiy ishlanmalarini, innovatsion g‘oyalarini, ixtirochilik, ratsionalizatorlik faoliyatini qo‘llab-quvvatlashga qaratilgan tadbirlarni amalga oshiradi;

maktabgacha ta’lim, umumiy o‘rta ta’lim, sog‘liqni saqlash hamda erkaklar ulushi kam bo‘lgan boshqa sohalarga ayollar bilan teng ravishda erkaklarni jalb qilishga doir faoliyatni qo‘llab-quvvatlash borasida takliflar ishlab chiqadi;

xotin-qizlar tomonidan yaratilgan innovatsion g‘oyalar, texnologiyalar va ishlanmalarni keng targ‘ib qilish maqsadida xalqaro va respublika miqyosidagi forum, konferensiya, simpozium, seminar, tanlov va ko‘rgazmalar tashkil qilish hamda ularda xotin-qizlarning o‘z innovatsion loyihalari natijalari bilan ishtirok etish chora-tadbirlarini amalga oshiradi;

davlat organlari, xalqaro donorlar, yirik korxona va boshqa tashkilotlar tomonidan dolzarb mavzulardagi loyihalarni moliyalashtirish maqsadida o‘tkaziladigan tanlovlarda xotin-qizlarning o‘z loyihalari bilan ishtirok etishlarini targ‘ib qiladi;

olima, tadqiqotchi, ixtirochi va tadbirkor xotin-qizlar tomonidan amalga oshirilayotgan ishlar natijalari yuzasidan keng ommani xabardorligini oshirish bo‘yicha turli tadbirlar tashkil etadi;

g) iqtidorli xotin-qizlarni aniqlash va qo‘llab-quvvatlash tizimini takomillashtirish sohasida:

iqtidorli xotin-qizlarni aniqlash, ularning qobiliyatlarini to‘g‘ri yo‘naltirish bo‘yicha oila, mahalla, ta’lim muassasalari hamda mehnat jamoalari bilan o‘zaro hamkorlik mexanizmini yo‘lga qo‘yadi;

iqtidorli xotin-qizlarni aniqlash, ular bilan manzilli ishlash, qobiliyatlarini to‘g‘ri yo‘naltirish va rag‘batlantirishga, siyosiy, huquqiy va kasbiy bilimlarini, boshqaruv ko‘nikmalari va liderlik sifatlarini rivojlantirishga qaratilgan o‘quvlar tashkil etadi;

xotin-qizlarning ijtimoiy faolligini oshirish, “Qizlarjon” va boshqa jamoatchilik tuzilmalarini qo‘llab-quvvatlashga qaratilgan chora-tadbirlarni amalga oshiradi;

iqtidorli xotin-qizlarni rahbarlik lavozimlariga tayyorlash va tavsiya etishga ko‘maklashadi;

iqtidorli qizlarni a’lo xulqi, noyob iste’dodi, zukkoligi, tashabbuskorligi va o‘qishdagi muvaffaqiyatlari asosida belgilangan tartibda Zulfiya nomidagi Davlat mukofoti bilan taqdirlash ishlarini tashkil etadi;

mamlakatimizda xotin-qizlar ta’limini qo‘llab-quvvatlash bo‘yicha berilgan imtiyoz va imkoniyatlar haqida targ‘ibot tadbirlarini tashkil qiladi;

mahallalardagi xotin-qizlar faollari tomonidan ta’lim muassasalaridagi o‘quvchi qizlar bilan ularning ta’lim olishga qiziqtirishga qaratilgan tadbirlarni tashkil etishiga ko‘maklashadi;

d) xotin-qizlarning kasbiy ko‘nikmalarini oshirish va munosib ish topishiga ko‘maklashish, tadbirkorligini rivojlantirish sohasida:

xotin-qizlar, xususan, ishsiz va ijtimoiy faol bo‘lmagan xotin-qizlarning kasbiy ko‘nikmalarni oshirish, ularni mehnat bozorida raqobatbardosh kasb-hunarlarga o‘qitish va munosib ish topishiga ko‘maklashadi;

xotin-qizlarning iqtisodiy imkoniyatlarini kengaytirish, bandligini ta’minlash, tadbirkorlikka jalb qilish, kasanachilik va hunarmandchilikni rivojlantirish borasidagi ishlar samaradorligini oshirish choralarini ko‘radi;

xotin-qizlarning mehnat sharoitlarini yaxshilash bo‘yicha ish beruvchilarga takliflar kiritib boradi;

mahallalarda xotin-qizlarni kasbga o‘qitish, ularning moliyaviy savodxonligini oshirish, ularda tadbirkorlik bilan shug‘ullanish hissini uyg‘otish bo‘yicha takliflar ishlab chiqadi va tegishli chora-tadbirlarni amalga oshiradi;

tadbirkorlik faoliyatini yuritayotgan va yo‘lga qo‘yish istagida bo‘lgan xotin-qizlarga tijorat banklari tomonidan belgilangan tartibda kreditlar, Oila va xotin-qizlarni qo‘llab-quvvatlash davlat maqsadli jamg‘armasi mablag‘lari hisobidan grantlar ajratilishiga ko‘maklashadi;

mahallalardagi xotin-qizlar faollarining hududdagi tadbirkorlikni rivojlantirish masalalari bo‘yicha tuman (shahar) hokimlari yordamchilari bilan hamkorlikda xotin-qizlarning tadbirkorlik g‘oyalarini amalga oshirish, ular faoliyatiga kredit, subsidiya va boshqa yordam choralarini jalb qilish ishlarini tashkil etish yuzasidan uslubiy va amaliy tavsiyalar beradi;

joylarda xotin-qizlarning bandligini ta’minlash, ular o‘rtasida tadbirkorlikni, hunarmandchilikni rivojlantirish bo‘yicha ko‘rilayotgan amaliy choralar samaradorligini monitoring qiladi;

respublika va hududiy “Xotin-qizlar tadbirkorlik markazlari” faoliyati samarali tashkil etilishiga ko‘maklashadi;

xotin-qizlarni hunarmandchilik, oilaviy tadbirkorlik, kasanachilikka jalb qilish bo‘yicha nodavlat notijorat tashkilotlari bilan hamkorlik qiladi;

e) oila a’zolarining huquqiy madaniyatini oshirish, ular o‘rtasida huquqbuzarliklarning oldini olish, ijtimoiy xodim va boshqa davlat xizmatchilari bilan hamkorlikda xotin-qizlarni tazyiq va zo‘ravonliklardan himoya qilish sohasida:

oila a’zolarining huquqiy madaniyatini oshirish, ularning huquqlari va qonuniy manfaatlarini himoya qilishga ko‘maklashish, xotin-qizlar o‘rtasida huquqbuzarliklarning oldini olishga doir chora-tadbirlarni amalga oshiradi;

xotin-qizlarni qo‘llab-quvvatlashga doir davlat siyosatining samarali ijrosini ta’minlash, ularning huquqlari va qonuniy manfaatlarini himoya qilish bo‘yicha takliflar ishlab chiqadi va tegishli chora-tadbirlarni amalga oshiradi;

davlat va jamoat tashkilotlari bilan hamkorlikda ta’lim muassasalari, mehnat jamoalari va mahallalarda huquqiy madaniyatni, shu jumladan, xotin-qizlar va erkaklarning teng huquqliligiga oid tushunchalarni singdirish, zo‘ravonlikka murosasizlik hissini shakllantirishga qaratilgan targ‘ibot ishlarini tashkil etadi;

xotin-qizlarga nisbatan zo‘ravonlikning oldini olish borasida amaliy targ‘ibot va turkum tadbirlarni tashkil etadi;

xotin-qizlarni tazyiq va zo‘ravonlikdan himoya qilish sohasidagi davlat dasturlarini, hududiy dasturlarni va qonunchilik hujjatlarini ishlab chiqish hamda amalga oshirishda ishtirok etadi;

xotin-qizlarga nisbatan tazyiq va zo‘ravonlik holatlariga olib keladigan sabablar hamda shart-sharoitlarni aniqlash bo‘yicha tadbirlarni tashkil etadi va bunday holatlarni bartaraf etish yuzasidan amaliy choralar ko‘radi;

xotin-qizlarga nisbatan tazyiq o‘tkazganligi va zo‘ravonlik sodir etganligi uchun profilaktik hisobda turadigan shaxslar bilan yakka tartibdagi profilaktika tadbirlarini o‘tkazishda ishtirok etadi;

nizoli vaziyatlarning, tazyiq va zo‘ravonlikning oldini olishga doir dasturlar hamda uslubiy tavsiyalarni ishlab chiqadi va amalga oshiradi;

xotin-qizlarni tazyiq va zo‘ravonlikdan himoya qiladigan tegishli vakolatli organlar va tashkilotlar bilan hamkorlik qiladi;

tazyiq va zo‘ravonlikdan jabr ko‘rgan xotin-qizlar va bolalarni qo‘llab-quvvatlash hamda ularga amaliy yordam ko‘rsatish yo‘nalishida faoliyat yuritayotgan nodavlat notijorat tashkilotlari bilan o‘zaro hamkorlik qiladi;

zo‘ravonlikning oldini olish, tazyiq va zo‘ravonlikdan jabrlangan yoki o‘z joniga suiqasd qilgan yoxud suiqasd qilishga moyil bo‘lgan xotin-qizlarni qo‘llab-quvvatlash bo‘yicha xalqaro va xorijiy tashkilotlar, ilmiy-tadqiqot muassasalari bilan hamkorlik qiladi hamda ushbu yo‘nalishda ilg‘or xorijiy davlatlarning ijobiy tajribasini joriy etish choralarini ko‘radi;

xotin-qizlar o‘rtasida turli salbiy ijtimoiy harakatlar, ayniqsa, o‘z joniga qasd qilish, fohishabozlik kabi holatlarning sabablarini o‘rganish hamda natijalari bo‘yicha mahallalar, mahalliy ijro etuvchi hokimiyat organlari, huquqni muhofaza qiluvchi organlar va tegishli tashkilotlar bilan hamkorlikda profilaktika chora-tadbirlari amalga oshirilishini tashkil etadi;

mahallalardagi xotin-qizlar faollari tomonidan xotin-qizlar o‘rtasida ijtimoiy profilaktika va moslashtirish ishlarida hamkorlik qilish, tazyiq va zo‘ravonlikka nisbatan murosasizlik muhitini yaratish, xotin-qizlarga nisbatan tazyiq va zo‘ravonlik holatlarini aniqlash ishlarini profilaktika inspektori bilan hamkorlikda tashkil etishga uslubiy va amaliy ko‘maklashadi;

j) oilalarda sog‘lom turmush tarzini shakllantirish, sog‘lom ovqatlanish hamda reproduktiv salomatlik qoidalarini ommalashtirish sohasida:

“Sog‘lom ona — sog‘lom bola” shiori ostida tegishli davlat va jamoat tashkilotlari, keng jamoatchilik bilan birgalikda sog‘lom turmush tarzini qaror toptirish, reproduktiv salomatlik qoidalarini targ‘ib etish, erta tug‘ruq va yaqin qarindoshlar o‘rtasidagi nikohning kelajak avlod salomatligiga salbiy ta’sirlari hamda nogiron bolalar tug‘ilishi xavfi yuzasidan targ‘ibot ishlarini olib boradi;

“To‘g‘ri ovqatlanish va sog‘lom turmush tarzi” umummilliy harakati dasturida belgilangan vazifalarni amalga oshirishga ko‘maklashadi;

mahallalardagi “Salomatlik maktablari” samarali faoliyat yuritishga ko‘maklashadi, “Salomatlik maktabi” a’zolarini jalb etgan holda aholi orasida, oila va xonadonlarda sog‘lom ovqatlanish asoslari, jismoniy faollik, shaxsiy gigiyena qoidalariga rioya qilish bo‘yicha seminarlar va amaliy targ‘ibot tadbirlarini tashkil etadi;

oilalarda xonadon gigiyenasiga rioya etilishi borasida targ‘ibot ishlarini tashkil etadi;

mahallalarda xotin-qizlar uchun ularning yoshini hisobga olgan holda, turli ijtimoiy-madaniy va sog‘lomlashtirish tadbirlari, maxsus sport musobaqalarini tashkil etadi;

mehnat jamoalarida mehnat qilayotgan xotin-qizlar o‘rtasida sportning ommaviy turlari hamda velosport bo‘yicha sport musobaqalari o‘tkazilishini tashkil etadi;

xotin-qizlarni sog‘lomlashtirish, madaniyat, turizm, bolalarni sog‘lomlashtirish va ularning dam olishi masalalarida davlat organlari, mahallalar, ish beruvchilar, nodavlat notijorat tashkilotlari va fuqarolik jamiyatining boshqa institutlari bilan hamkorlikni amalga oshiradi;

z) oila institutini mustahkamlash, ijtimoiy-ma’naviy muhit barqarorligini ta’minlash, umuminsoniy va milliy qadriyatlarni targ‘ib qilish sohasida:

oilaning tarbiyaviy-ta’lim salohiyatini mustahkamlash, oilalarda ma’naviy-axloqiy muhitni yaxshilash, ota-onaning farzand tarbiyasidagi mas’uliyati va javobgarligini oshirish, oilaning jamiyat hayotidagi ahamiyatini keng targ‘ib etishga qaratilgan chora-tadbirlarni amalga oshiradi;

oila institutini mustahkamlash, “Sog‘lom oila — sog‘lom jamiyat” g‘oyasini ijtimoiy hayotga tatbiq etish choralarini ko‘radi;

zamonaviy oilani rivojlantirish, oilaning ichki munosabatlari, shaxslararo munosabatlar, yaxshi qo‘shnichilik munosabatlari, boy madaniy, tarixiy meros va an’anaviy oilaviy qadriyatlar asosida oila institutini mustahkamlash bo‘yicha takliflar ishlab chiqadi va tegishli chora-tadbirlarni amalga oshiradi;

oila-nikoh munosabatlari sohasidagi amaliyotni o‘rganish hamda tajriba almashish borasida xalqaro va xorijiy tashkilotlar, ilmiy-tadqiqot muassasalari bilan hamkorlik qiladi;

oilalarga ta’sirchan metodik, konsultativ va amaliy yordam ko‘rsatishning samarali tizimini yaratish, mediatorlik institutining rolini kuchaytirishda davlat va jamoat tashkilotlari bilan hamkorlikda chora-tadbirlarni amalga oshiradi;

nikohlanuvchilarni oilaviy hayotga tayyorlash, ularga oiladagi nizoli holatlarni hal qilishning huquqiy va psixologik asoslarini o‘rgatish, oilalarni mustahkamlash, erta nikoh va oilaviy ajralishlarning oldini olish bo‘yicha takliflar ishlab chiqadi va tegishli chora-tadbirlarni amalga oshiradi;

farovon va barqaror oilalarning hayotiy tajribasini ommalashtirish maqsadida oila institutini mustahkamlash, oilaviy qadriyatlarni saqlash va rivojlantirishga munosib hissa qo‘shgan oilalarni “Ibratli oila” ko‘krak nishoni bilan taqdirlash ishlarini tashkil etadi;

“Sog‘lom oila — sog‘lom turmush tarzi” tamoyilini targ‘ib qilish maqsadida “oila-mahalla-ta’lim” ijtimoiy-tarbiyaviy tizimi asosida targ‘ibot tadbirlarini amalga oshiradi;

milliy va umuminsoniy qadriyatlarni asrab-avaylash, mazmunan boyitish, ularning farzand tarbiyasidagi rolini oshirish, oilalarda targ‘ib qilishga qaratilgan chora-tadbirlarni ishlab chiqadi va amalga oshiradi;

mahallalarda xotin-qizlarning ma’naviyati va madaniyatini yuksaltirish, ijtimoiy faolliklarini oshirishga qaratilgan tadbirlarni amalga oshiradi, yozuvchilar, san’atkorlar, rassomlar va boshqa ijodkorlarni taklif etgan holda ijodiy kechalar va kitobxonlik tadbirlarini tashkil etadi;

mahallalardagi oila institutini mustahkamlash, xotin-qizlar o‘rtasida ma’naviy-ma’rifiy ishlarni amalga oshirishga mas’ul bo‘lgan jamoatchilik tuzilmalari ishini muvofiqlashtiradi;

o‘quv-tarbiya muassasalarida tarbiyalanayotgan, vasiylikka, homiylikka va oilaga tarbiyaga olingan (patronat) qizlarning ijtimoiy holatini o‘rganib boradi, ularning muammolarini joyida hal qilishga hamda o‘quv-tarbiya muassasalaridan keyin hayotda o‘z o‘rnini topishiga ko‘maklashadi;

mahallalardagi xotin-qizlar faollarining oilalardagi ijtimoiy-ma’naviy muhitni o‘rganish hamda sog‘lomlashtirishga qaratilgan chora-tadbirlarni amalga oshirishda davlat va jamoat tashkilotlari bilan o‘zaro hamkorlikdagi faoliyatini ta’minlashga hamda oilaviy qadriyatlarni targ‘ib etish, nizoli oilalarni sog‘lom turmush tarziga qaytarish va oilaning qonuniy asoslarini mustahkamlash borasidagi targ‘ibot ishlarini tashkil etishga uslubiy-amaliy ko‘maklashadi;

k) migratsiyadan qaytgan, jazoni ijro etish muassasalaridan ozod etilgan, og‘ir ijtimoiy vaziyatga tushib qolgan xotin-qizlarning ijtimoiy moslashuviga, ular bilan manzilli ishlash orqali zarur yordamlar olishlariga ko‘maklashish sohasida:

migratsiyadan qaytgan, jazoni ijro etish muassasalaridan ozod etilgan, og‘ir ijtimoiy vaziyatga tushib qolgan xotin-qizlarning huquqlari va qonuniy manfaatlarini ta’minlash hamda ularning oilalaridagi ijtimoiy-ma’naviy muhitni shakllantirishda davlat va jamoat tashkilotlari bilan hamkorlikda chora-tadbirlarni amalga oshiradi;

migratsiyadan qaytgan, jazoni ijro etish muassasalaridan ozod etilgan xotin-qizlarni mehnat bozorida raqobatbardosh kasb-hunar turlariga o‘qitish orqali bandligini ta’minlash, salomatligini tiklashga hamda jamiyat hayotiga moslashuviga ko‘maklashadi;

mehnat faoliyatini amalga oshirish uchun xorijga chiqib ketgan xotin-qizlarning huquqlari va qonuniy manfaatlarini himoya qilish tizimini takomillashtirish choralarini ko‘radi;

mehnat faoliyatini amalga oshirish uchun xorijga chiqib ketgan shaxslarning uyda qolgan voyaga yetmagan farzandlari turmush tarzini o‘rganish va qo‘llab-quvvatlashda davlat va jamoat tashkilotlari bilan hamkorlikda choralarni ko‘radi;

O‘zbekistonlik vatandosh xotin-qizlar kengashi orqali xorijda murakkab hayotiy vaziyatga tushib qolgan xotin-qizlarni moddiy va ijtimoiy qo‘llab-quvvatlash, ularga axborot jihatidan va huquqiy yordam ko‘rsatish ishlarini tashkil etadi;

l) keys menejmentni qo‘llagan holda, ijtimoiy himoyaga muhtoj xotin-qizlarni aniqlash hamda ular bilan manzilli ishlash sohasida:

uyma-uy yurish orqali xotin-qizlarning muammolarini, xususan, ijtimoiy xizmatlarga bo‘lgan ehtiyojini aniqlab, keys menejment asosida muammolarni hal etish chora-tadbirlarini amalga oshiradi, ushbu yo‘nalishda mahallalardagi xotin-qizlar faollarining ishini muvofiqlashtirib boradi;

“Ayollar daftari”ga kiritilgan xotin-qizlar bilan manzilli ishlashda hududlarni ijtimoiy-iqtisodiy rivojlantirish bo‘yicha sektorlar (keyingi o‘rinlarda — sektorlar), mutasaddi davlat va jamoat tashkilotlari tomonidan ayollar muammolarining hal etilishi yuzasidan monitoring yuritadi va ko‘maklashadi;

mahallalardagi xotin-qizlar faollariga xotin-qizlarning muammolarini o‘z vaqtida aniqlash va bartaraf etishda, ularni og‘ir ijtimoiy ahvoldan chiqarishda uslubiy va amaliy ko‘maklashadi;

og‘ir ijtimoiy ahvolga tushib qolgan xotin-qizlarga, shu jumladan, nogironligi bo‘lgan xotin-qizlarga ijtimoiy-huquqiy, psixologik va moddiy yordam ko‘rsatish tizimini shakllantirish, ularning iqtisodiy barqarorligini ta’minlash bo‘yicha takliflar ishlab chiqadi va tegishli chora-tadbirlarni amalga oshiradi;

uy-joyga muhtoj, og‘ir ijtimoiy ahvolga tushib qolgan, Ijtimoiy himoya reyestriga kiritilgan hamda nogironligi bo‘lgan xotin-qizlarning ro‘yxatini tuzish, zarur hujjatlarni rasmiylashtirish, Oila va xotin-qizlarni qo‘llab-quvvatlash davlat maqsadli jamg‘armasi hisobidan boshlang‘ich badalni to‘lab berish orqali ularni arzon uy-joylar bilan ta’minlashda ko‘maklashadi;

og‘ir ijtimoiy vaziyatga tushib qolgan, shu jumladan, nogironligi bo‘lgan kam ta’minlangan oilalardagi xotin-qizlar va ularning voyaga yetmagan farzandlarini jarrohlik yo‘li orqali sog‘lom hayotga qaytarish, reabilitatsiya vositalari bilan ta’minlash choralarini ko‘radi;

xotin-qizlar muammolari bilan ishlash tizimini raqamlashtirish orqali xotin-qizlarning muammolarini o‘rganish va ularni tizimli ravishda hal etish yuzasidan axborot-kommunikatsiya texnologiyalarini keng joriy etish choralarini ko‘radi;

mahallalardagi xotin-qizlar faollari tomonidan xotin-qizlarning muammolarini o‘z vaqtida aniqlash, ushbu muammolar yuzasidan davlat organlari va tashkilotlarga murojaat qilish, yordamga muhtoj bo‘lgan va og‘ir ijtimoiy ahvolga tushib qolgan xotin-qizlarga ijtimoiy-huquqiy, psixologik va moddiy yordam ko‘rsatish ishlarini ijtimoiy xodim bilan birgalikda tashkil etishga ko‘maklashadi;

mahallalardagi xotin-qizlar faollarining asosiy vazifalari bajarilishini monitoring qilish va mahallalarda hal etilmagan tizimli muammolarini yuqori turuvchi idoralarga kiritib boradi;

ijtimoiy himoyaga muhtoj xotin-qizlarni qo‘llab-quvvatlab kelayotgan nodavlat notijorat tashkilotlari bilan samarali hamkorlikni yo‘lga qo‘yadi;

m) davlat tashkilotlari, xalqaro moliya institutlari hamda fuqarolik jamiyati institutlari bilan yaqindan hamkorlik o‘rnatish sohasida:

Qo‘mita tizimida davlat tashkilotlari, fuqarolik jamiyati institutlari bilan aloqalarni rivojlantirish maqsadida hamkorlik chora-tadbirlarini ishlab chiqadi va amalga oshiradi;

xotin-qizlarning huquq va qonuniy manfaatlarini himoya qilish, ularning mamlakat ijtimoiy-siyosiy hayotidagi o‘rni va faolligini oshirish, gender tenglik kafolatlarini ta’minlash sohalarida nodavlat notijorat tashkilotlariga ko‘maklashadi;

xotin-qizlar yo‘nalishidagi nodavlat notijorat tashkilotlari tomonidan ishlab chiqilgan istiqbolli loyihalarni amalga oshirishda ko‘maklashish choralarini ko‘radi;

xotin-qizlarning huquq va qonuniy manfaatlarini ta’minlash, kam ta’minlangan va ijtimoiy himoyaga muhtoj oilalarni ehtiyojmandlik darajasidan chiqarish bo‘yicha jamoatchilik nazoratini ta’minlashda nodavlat notijorat tashkilotlarini jalb etish ishlarini tashkil etadi;

nodavlat notijorat tashkilotlari bilan hamkorlikda xotin-qizlarning mamlakatimizni rivojlantirishga bo‘lgan daxldorlik hissini kuchaytirish, ro‘y berayotgan jarayonlarni anglash va muhokama qilishga jalb etish, shuningdek, ularni faol fuqarolik pozitsiyasiga ega bo‘lishlariga undaydigan tadbirlarni tashkil etadi;

zaruratga ko‘ra xotin-qizlarning huquq va qonuniy manfaatlarini himoya qilish hamda ijtimoiy masalalarni hal qilish jarayonlariga fuqarolik jamiyati institutlari vakillari, ekspertlar hamda olimlarni jalb etadi;

n) mahallalardagi xotin-qizlar faollari faoliyatini muvofiqlashtirish va ularga biriktirilgan jamoatchilik tuzilmalari bilan hamkorlikni ta’minlash sohasida:

xotin-qizlarni oila, mahalla va mehnat jamoalarida ijtimoiy-huquqiy jihatdan qo‘llab-quvvatlash, ijtimoiy-siyosiy faolligini oshirish, ma’naviyatini yuksaltirish, yoshlarni oilaviy hayotga tayyorlash, zamonaviy namunali oilani shakllantirish, uning ma’naviy-axloqiy muhitini va an’anaviy oilaviy qadriyatlarni mustahkamlash bo‘yicha maqsadli chora-tadbirlarni amalga oshiradi;

xotin-qizlar bilan ishlash bo‘yicha komissiya hamda “Ota-onalar universiteti” jamoatchilik tuzilmasining faoliyatini tashkil etish va muvofiqlashtiradi;

jamoatchilik tuzilmalari tarkibiga faol, fidoyi, salohiyatli, shaxsiy sifatlari bilan mahallada obro‘-e’tiborga ega bo‘lgan aholi vakillarini jalb etadi;

oilaviy qadriyatlarni mustahkamlash, erta nikoh va ajrashishlarning oldini olish bo‘yicha samarali choralarni ko‘rish, oilaviy hayot mas’uliyati, er-xotin, qaynona-kelin munosabatlari haqida tushuntirish ishlarini olib boradi;

xotin-qizlarni ishga joylashtirish, haq to‘lanadigan jamoat ishlariga, kooperativlarga, tadbirkorlikka yo‘naltirish, kasb-hunarga va tadbirkorlikka o‘qitish, o‘zini o‘zi mustaqil ravishda band qilishni rivojlantirishga doir faoliyatni tashkil etishga mas’ul idoralarga ko‘maklashadi;

tuman (shahar) oila va xotin-qizlar bo‘limlari boshliqlari, hokim yordamchilari bilan birgalikda muvofiqlashtirish.

notinch va muammoli oilalarda xotin-qizlar bilan sog‘lomlashtirish va nizoli holatlarni bartaraf etish bo‘yicha amaliy ishlar olib borish, oila a’zolari va qarindoshlar o‘rtasidagi oilaviy munosabatlarni yaxshilashga qaratilgan tushuntirish ishlarini tashkil etadi;

xotin-qizlarga nisbatan jismoniy yoki ruhiy zo‘rlik ishlatish ehtimoli mavjud oilalarda tushuntirish ishlarini olib borish, bunday holatlar aniqlanganda xotin-qizlarning huquqlari va qonuniy manfaatlarini himoya qilishga ko‘maklashadi;

og‘ir ijtimoiy ahvolga tushib qolgan xotin-qizlar, shu jumladan, nogironligi bo‘lgan ayollar bilan yakka tartibda ishlarni olib borishda tegishli idoralar bilan hamkorlik aloqalarini o‘rnatish va ular bilan doimiy ravishda axborot almashadi.

Qo‘mita qonunchilik hujjatlariga muvofiq boshqa funksiyalarni ham amalga oshirishi mumkin.

4-bob. Qo‘mita va uning hududiy bo‘linmalarining huquqlari va majburiyatlari

1-§. Qo‘mitaning huquqlari va majburiyatlari

13. Qo‘mita o‘ziga yuklangan vazifa va funksiyalarni amalga oshirish uchun quyidagi huquqlarga ega:

Vazirlar Mahkamasiga va O‘zbekiston Respublikasi Prezidenti Administratsiyasiga normativ-huquqiy hujjatlar loyihalarini, shuningdek, Qo‘mitaga yuklangan vazifalar va funksiyalarni bajarish bilan bog‘liq boshqa hujjatlarni belgilangan tartibda kiritish;

respublika va mahalliy ijro etuvchi hokimiyat organlari, xo‘jalik birlashmalari, boshqa tashkilotlar va ularning mansabdor shaxslari, shuningdek, fuqarolar uchun bajarilishi majburiy bo‘lgan normativ-huquqiy hujjatlarni qabul qilish, zarur hollarda, boshqa vazirliklar va idoralar bilan birgalikda qo‘shma qarorlar va boshqa hujjatlarni qabul qilish;

Qo‘mitaning vakolatiga kiruvchi masalalarda respublika va mahalliy ijro etuvchi hokimiyat organlari, xo‘jalik birlashmalari faoliyatini muvofiqlashtirish;

xotin-qizlarning huquqlari va qonuniy manfaatlariga rioya etilishi bo‘yicha qonunchilik hujjatlari bajarilishini zarur hollarda, huquqni muhofaza qiluvchi va nazorat organlari xodimlari ishtirokida o‘rganish;

Qo‘mitaga tegishli vazifalarni amalga oshirish uchun zarur hollarda, davlat organlari, ilmiy muassasalar va boshqa tashkilotlarning rahbarlari hamda mutaxassislarini jalb qilish, ishchi guruhlar tuzish;

o‘z vakolatlariga kiruvchi masalalar yuzasidan davlat organlari va tashkilotlaridan statistika, tahliliy materiallar, xulosalar va boshqa ma’lumotlarni so‘rash va olish;

davlat organlari va tashkilotlari rahbarlariga xotin-qizlar huquqlari va qonuniy manfaatlarini ta’minlash hamda oilani mustahkamlash borasidagi qonunchilik hujjatlari buzilishi, ularni keltirib chiqaruvchi sabablar va shart-sharoitlarni bartaraf etish bo‘yicha ko‘rib chiqilishi majburiy bo‘lgan taqdimnomalar kiritish;

Qo‘mitaning vakolatiga kiruvchi masalalarda, shuningdek, xotin-qizlar huquqlari va qonuniy manfaatlarini ko‘zlab, sudlarga ariza (shikoyat) va da’volarni kiritish;

xotin-qizlarning huquqlari va qonuniy manfaatlarini ta’minlash, oilani mustahkamlashga doir tashabbuslar bilan chiqish hamda takliflar kiritish;

oilalarni mustahkamlash va xotin-qizlarni qo‘llab-quvvatlash sohasida ilmiy va amaliy tadqiqotlar hamda ishlanmalarni amalga oshirish bo‘yicha loyihalarni saralab olish uchun tanlovlar e’lon qilish va tanlov komissiyalarini tuzish;

o‘zining tashkiliy tuzilmasi doirasida Qo‘mita va uning idoraviy tuzilmalariga tegishli davlat mulkini belgilangan tartibda tekin foydalanish huquqi asosida bir hududiy bo‘linmadan boshqasiga berish;

Qo‘mita xodimlari hamda uning hududiy boshqarmalari va tumanlar (shaharlar) bo‘limlari tomonidan faoliyat samaradorligining maqsadli ko‘rsatkichlari (KPI) bajarilishini hisobga olgan holda moddiy rag‘batlantirish tartibini, miqdorini va shartlarini belgilash;

Qo‘mita vakolatiga kiruvchi masalalar bo‘yicha takliflarni O‘zbekiston Respublikasi Prezidenti Administratsiyasiga, Vazirlar Mahkamasiga, respublika va mahalliy ijro etuvchi hokimiyat organlari hamda xo‘jalik birlashmalariga ko‘rib chiqish uchun kiritish;

davlat organlari va tashkilotlarining oilalarni mustahkamlash hamda xotin-qizlarni qo‘llab-quvvatlashga oid masalalarni ko‘rib chiqish bilan bog‘liq majlislari, yig‘ilishlari, shu jumladan, hay’at majlislarida ishtirok etish;

Qo‘mita vakolati doirasida xalqaro shartnomalar va idoralararo bitimlar tuzish, xalqaro, hukumatlararo bitimlar loyihalarini taqdim etish;

Qo‘mita vakolati doirasida O‘zbekiston Respublikasi manfaatlarini xalqaro miqyosda himoya qilish;

o‘ziga yuklangan vazifalar doirasida bevosita yoki Qo‘mitaning idoraviy mansub bo‘linmalari orqali xorijiy tarmoq tashkilotlari, ilmiy va ta’lim muassasalari bilan hamkorlik qilish;

Qo‘mitaning tarkibiy va hududiy bo‘linmalarida ichki nazorat, korrupsiyaga oid huquqbuzarliklar va qonunlarga zid boshqa harakatlar, shuningdek, Qo‘mita tizimi xodimlari tomonidan kasbiy axloq qoidalari buzilishining oldini olish;

boshqaruv xodimlarining belgilangan umumiy cheklangan soni doirasida Qo‘mita markaziy apparatining tasdiqlangan tuzilmasiga o‘zgartirishlar kiritish;

tarkibiy va hududiy bo‘linmalarning nizomlari hamda boshqa hujjatlari, smeta va shtat jadvallarini tasdiqlash;

Qo‘mita tizimida kadrlarni tanlash, tayyorlash, qayta tayyorlash va ularning malakasini oshirish, shuningdek, mahallalardagi xotin-qizlar faollarining malakasini oshirish jarayonlarini samarali tashkil etish;

Qo‘mita vakolatiga kiradigan masalalar bo‘yicha joriy va strategik vazifalarni yoritish uchun belgilangan tartibda noshirlik faoliyatini amalga oshirish, rasmiy veb-saytlar, ijtimoiy tarmoqlarda sahifalar ochish, konferensiyalar, seminarlar, simpoziumlar, ko‘rgazmalar, yarmarkalar o‘tkazish, shuningdek, metodik materiallar va tavsiyalar ishlab chiqish;

binolarga xizmat ko‘rsatish, jihoz va uskunalar, avtotransport, aloqa hamda hisoblash vositalari, kompyuter va tashkiliy texnika vositalarini saqlash va ishlatish bo‘yicha ishlarni bajarish, dasturiy ta’minotni sotib olish to‘g‘risida belgilangan tartibda shartnomalar tuzish;

Qo‘mita, uning hududiy bo‘linmalari hamda Qo‘mitaning idoraviy bo‘ysunuvidagi tashkilotlarning moddiy-texnik bazasini yaxshilash choralarini ko‘rish;

qonunchilik hujjatlariga muvofiq Qo‘mitaning ijtimoiy infratuzilmasini yaratish va takomillashtirish hamda Qo‘mita, uning tarkibiy va hududiy bo‘linmalari xodimlarini moddiy rag‘batlantirish va mukofotlashning yagona tizimini shakllantirish.

Qo‘mita qonunchilik hujjatlariga muvofiq boshqa huquqlarga ham ega bo‘lishi mumkin.

14. Qo‘mita:

o‘ziga yuklangan vazifalar va funksiyalarni samarali bajarish, shuningdek, oilalarni mustahkamlash va xotin-qizlarni qo‘llab-quvvatlash bo‘yicha davlat siyosatini samarali amalga oshirish;

o‘z faoliyati bilan bog‘liq prognoz ko‘rsatkichlarga so‘zsiz erishilishini ta’minlash;

O‘zbekiston Respublikasi Prezidenti Administratsiyasi va Vazirlar Mahkamasiga kiritilayotgan normativ-huquqiy hujjatlar loyihalari va boshqa hujjatlar, shuningdek, Qo‘mita tomonidan qabul qilinayotgan qarorlarning sifati, pirovard natijalari va amalga oshirilishi oqibatlari;

o‘z faoliyati sohasini rivojlantirish bo‘yicha dasturlar, tadbirlar rejalari, “yo‘l xaritalari” va boshqa dasturiy hujjatlarning samarali amalga oshirilishi;

fuqarolar va tadbirkorlik subyektlarining huquqlariga rioya etilishini va ularning qonuniy manfaatlari himoya qilinishini ta’minlash uchun javob beradi.

2-§. Qo‘mita hududiy bo‘linmalarining huquqlari va majburiyatlari

15. Qo‘mitaning hududiy bo‘linmalari quyidagi huquqlarga ega:

oilalarni mustahkamlash va xotin-qizlarni qo‘llab-quvvatlashga oid qonunchilik hujjatlarining ijro etilishini, shu jumladan, hududlarda xotin-qizlarning huquq va qonuniy manfaatlariga rioya etilishini o‘rganish va tahlil qilish;

o‘z vakolatlariga kiruvchi masalalar yuzasidan davlat organlari va tashkilotlarining hududiy bo‘linmalaridan statistika, tahliliy materiallar, xulosalar va boshqa ma’lumotlarni so‘rash va olish;

davlat organlari va tashkilotlari rahbarlariga xotin-qizlar huquqlari va qonuniy manfaatlarini ta’minlash hamda oilani mustahkamlash borasidagi qonunchilik hujjatlari buzilishi, ularni keltirib chiqaruvchi sabab va shart-sharoitlarni bartaraf etish bo‘yicha ko‘rib chiqilishi majburiy bo‘lgan taqdimnomalar kiritish;

vakolatiga kiruvchi masalalarda, shuningdek, xotin-qizlar huquqlari va qonuniy manfaatlarini ko‘zlab, sudlarga ariza (shikoyat) va da’volarni kiritish;

davlat organlari va tashkilotlari hududiy bo‘linmalarining oilalarni mustahkamlash va xotin-qizlarni qo‘llab-quvvatlashga oid masalalarni ko‘rib chiqish bilan bog‘liq majlislari, yig‘ilishlari, shu jumladan, hay’at majlislarida ishtirok etish;

axborot-tahliliy materiallarni tayyorlash va dasturiy hujjatlarni ishlab chiqish uchun respublika ijro etuvchi hokimiyat organlari va xo‘jalik birlashmalarining hududiy bo‘limlari, shuningdek, ilmiy tashkilotlarning yuqori malakali mutaxassislarini jalb qilish.

Qo‘mitaning hududiy bo‘linmalari o‘z vakolatlari doirasida o‘zlariga yuklangan vazifalardan kelib chiqqan holda boshqa huquqlarga ham ega bo‘lishi mumkin.

16. Qo‘mitaning hududiy bo‘linmalari:

o‘zlariga yuklangan vazifalar va funksiyalarning sifatli va o‘z vaqtida bajarilishini ta’minlash;

o‘z faoliyati bilan bog‘liq bo‘lgan maqsadli ko‘rsatkichlarga erishilishini ta’minlash;

Qo‘mitaga, mahalliy ijro etuvchi hokimiyat organlariga kiritilayotgan hujjatlar loyihalari va takliflar, shuningdek, Qo‘mitaning hududiy bo‘linmalari tomonidan qabul qilinayotgan qarorlarning sifati, pirovard natijalari va amalga oshirilishi oqibatlari;

o‘z faoliyati sohasini rivojlantirish, muammolarni hal qilish uchun dasturlarni, harakat rejalarini, “yo‘l xaritalari”ni va boshqa dasturiy hujjatlarning belgilangan tartibda ishlab chiqilishi hamda samarali amalga oshirilishi;

tegishli hududda oilalarni mustahkamlash va xotin-qizlarni qo‘llab-quvvatlash bo‘yicha davlat siyosatining samarali amalga oshirilishi holati to‘g‘risida Qo‘mitaga haqqoniy tahliliy va boshqa axborotning taqdim etilishi;

xotin-qizlarning huquqlari va qonuniy manfaatlariga rioya etilishini ta’minlash uchun javob beradi.

5-bob. Qo‘mita rahbarlarining asosiy funksional vazifalari

17. Quyidagilar Qo‘mita raisining asosiy funksional vazifalari hisoblanadi:

O‘zbekiston Respublikasi Konstitutsiyasi va qonunlariga, shuningdek, boshqa normativ-huquqiy hujjatlar talablariga rioya qilish;

Qo‘mita faoliyatiga umumiy rahbarlik qilish, Qo‘mitaga O‘zbekiston Respublikasi Prezidentining tegishli farmonlari, qarorlari va farmoyishlari, Vazirlar Mahkamasining qarorlari va farmoyishlari, boshqa qonunchilik hujjatlari bilan yuklangan vazifalar va funksiyalarning bajarilishini ta’minlash;

O‘zbekiston Respublikasi Prezidentining hujjatlari va Vazirlar Mahkamasining qarorlari bilan tasdiqlangan Qo‘mita faoliyatini yanada takomillashtirish bo‘yicha konsepsiyalar, kompleks dasturlar va chora-tadbirlarni amalga oshirish bo‘yicha tanqidiy va chuqur tahlillarni o‘tkazish;

Qo‘mitaning hududiy boshqarmalari hamda tarkibiy bo‘linmalari faoliyati bilan bog‘liq istiqboldagi ko‘rsatkichlarga erishishni ta’minlash bo‘yicha amaliy chora-tadbirlarni ishlab chiqish va qabul qilish;

O‘zbekiston Respublikasi Prezidenti Administratsiyasi va Vazirlar Mahkamasi, shuningdek, tegishli vazirliklar va idoralar bilan Qo‘mita faoliyatiga taalluqli bo‘lgan masalalar bo‘yicha o‘zaro hamkorlik qilish, Vazirlar Mahkamasi yig‘ilishlarida va uning Rayosati majlislarida ko‘rib chiqiladigan masalalar yuzasidan qatnashish;

O‘zbekiston Respublikasi Prezidenti, O‘zbekiston Respublikasining Bosh vaziri ko‘rsatmalarini bajarish;

o‘z o‘rinbosarlarining vakolatlarini belgilash, ular o‘rtasida majburiyatlarni taqsimlash, Qo‘mitaning boshqa mansabdor shaxslarining vakolatlarini belgilash, Qo‘mita faoliyatining ma’lum bir sohalarini boshqarishda o‘z o‘rinbosarlari va boshqa mansabdor shaxslarning shaxsiy javobgarlik darajasini belgilash;

Qo‘mitaning faoliyati rejalashtirilishini tashkil etish, davriy ish rejalarini tasdiqlash, ularning bajarilishi yuzasidan nazoratni ta’minlash;

boshqaruv lavozimlaridagi xotin-qizlar ulushini oshirish;

oliy ta’lim muassasalarida talabalar orasida xotin-qizlar ulushini oshirish;

xotin-qizlarning axborot-kommunikatsiya texnologiyalaridan faol foydalanish ko‘lamini oshirish;

ijtimoiy himoyaga muhtoj xotin-qizlarni manzilli qo‘llab-quvvatlash;

respublikada xotin-qizlarning iqtisodiy imkoniyatlarini kengaytirishga ko‘maklashish;

tadbirkor xotin-qizlarning loyihalarini qo‘llab-quvvatlash va yangi biznes g‘oyalariga yordam berish orqali yangi ish o‘rinlarini tashkil qilish;

hunarmandlarga ehtiyojmand, ishsiz xotin-qizlarni biriktirish orqali ularning bandligini ta’minlashga ko‘maklashish;

Xotin-qizlar bandligini ta’minlash va salomatligini mustahkamlash markazlarini tashkil etish;

Qo‘mita tizimida raqamlashtirishni joriy etish;

oila institutini mustahkamlash, ijtimoiy-ma’naviy muhit barqarorligini ta’minlash, mahallalarda nizolarni barvaqt aniqlash, nizoli oilalarni sog‘lom turmush tarziga qaytarish;

“Sog‘lom oila-sog‘lom jamiyat” shiori ostida oilalar farovonligi va barqarorligini ta’minlash, oilalarni mustahkamlash, mas’uliyatli ota-onalik g‘oyasini singdirish tadbirlarini tashkil etish;

davlat tomonidan ehtiyojmand xotin-qizlarga maxsus jarrohlik amaliyoti o‘tkazilishiga ko‘maklashish;

iqtidorli xotin-qizlarni aniqlash va qo‘llab-quvvatlash;

xotin-qizlar o‘rtasida ilm-fan va innovatsiyalarni rivojlantirish bo‘yicha tegishli vazirlik va idoralar bilan hamkorlikda maqsadli loyihalarni amalga oshirish, forum, konferensiya, tanlov, ko‘rgazma, seminarlar, davra suhbatlari, uchrashuvlar tashkil qilish;

og‘ir ijtimoiy ahvolga tushib qolgan va turar joyga muhtoj xotin-qizlarni uy-joy bilan ta’minlash;

migratsiyadan qaytgan, jazoni ijro etish muassasalaridan ozod etilgan, og‘ir ijtimoiy vaziyatga tushib qolgan xotin-qizlarning ijtimoiy moslashuviga, ular bilan manzilli ishlash orqali zarur yordamlar olishlariga ko‘maklashish;

jamiyatda xotin-qizlarga qaratilgan tazyiq va zo‘ravonlikka nisbatan targ‘ibot tadbirlari orqali murosasizlik muhitini yaratish;

xotin-qizlarning huquqlari va qonuniy manfaatlarini qo‘llab-quvvatlash, ularning ijtimoiy-iqtisodiy imkoniyatlarini oshirish bo‘yicha xalqaro tajribani o‘rganish;

Qo‘mita xodimlari, hududiy boshqarmalar va idoraviy mansub tashkilotlar xodimlarining malakasini oshirishni tashkil etish;

Qo‘mita tizimida xodimlarni tanlash va joy-joyiga qo‘yish, ularning samarali faoliyati uchun zarur shart-sharoitlar yaratish hamda hududiy boshqarmalar va idoraviy mansub tashkilotlar kadrlari zaxirasini shakllantirish;

O‘zbekiston Respublikasi Prezidenti, O‘zbekiston Respublikasi Prezidenti Administratsiyasi nomenklaturasiga kiradigan bo‘sh lavozimlarga taklif etilgan kadrlarning, shuningdek, Qo‘mitaga ishga qabul qilinayotgan boshqa kadrlarning professionalligi va o‘z ishini bilishi, yuksak darajadagi ishchanlik va ma’naviy-axloqiy fazilatlarga ega bo‘lishini ta’minlashga qaratilgan chora-tadbirlarni amalga oshirish;

O‘zbekiston Respublikasi Prezidenti, Vazirlar Mahkamasi topshiriqlari bo‘yicha normativ-huquqiy hujjatlar loyihalari sifatli ishlab chiqilishini, ular “Normativ-huquqiy hujjatlar to‘g‘risida”, “Qonunlar loyihalarini tayyorlash va ularni O‘zbekiston Respublikasi Oliy Majlisi Qonunchilik palatasiga kiritish tartibi to‘g‘risida”gi O‘zbekiston Respublikasi qonunlari, O‘zbekiston Respublikasi Prezidenti Administratsiyasining Reglamenti va Vazirlar Mahkamasining Reglamenti talablariga muvofiq ravishda o‘z vaqtida kiritilishini tashkil etish, ularning Vazirlar Mahkamasida puxta ishlanishida, Vazirlar Mahkamasi rahbariyati huzurida himoya qilinishi va O‘zbekiston Respublikasi Prezidenti Administratsiyasida ko‘rib chiqilishida ishtirok etish;

“Normativ-huquqiy hujjatlar to‘g‘risida”, “Qonunlar loyihalarini tayyorlash va ularni O‘zbekiston Respublikasi Oliy Majlisi Qonunchilik palatasiga kiritish tartibi to‘g‘risida”gi O‘zbekiston Respublikasi qonunlariga hamda Vazirlar Mahkamasining 2016-yil 17-oktabrdagi 345-son qarori bilan tasdiqlangan Davlat va xo‘jalik boshqaruvi organlari, mahalliy ijro etuvchi hokimiyat organlarining qonun loyihalariga doir faoliyatining namunaviy reglamentiga muvofiq Qo‘mitaning qonun loyihalarini tayyorlash faoliyatini tashkil etish;

Qo‘mita vakolatiga kiradigan masalalar bo‘yicha buyruqlar, farmoyishlar chiqarish, ko‘rsatmalar berish va normativ-huquqiy hujjatlarni qabul qilish, zarur bo‘lganda boshqa vazirliklar va idoralar bilan birgalikda tegishli qarorlar qabul qilish;

Qo‘mitaga taqdim etilgan takliflar va normativ-huquqiy hujjatlar loyihalarining to‘liq va har tomonlama ko‘rib chiqilishini ta’minlash, ularni puxta huquqiy, iqtisodiy, moliyaviy boshqa turdagi ekspertizadan o‘tkazish, shuningdek, O‘zbekiston Respublikasi Prezidenti Administratsiyasining Reglamenti va Vazirlar Mahkamasining Reglamentida belgilangan muddatlarda kelishish (viza qo‘yish);

Qo‘mita rahbarlari va xodimlarining xizmat safarlarini O‘zbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari to‘g‘risida” 2014-yil 5-martdagi PQ-2142-son hamda “Xorijiy xizmat safarlarida bo‘lishning samaradorligi va xorijiy delegatsiyalarning O‘zbekiston Respublikasiga tashrifini tashkil etish uchun mansabdor shaxslarning shaxsiy mas’uliyatini yanada oshirish chora-tadbirlari to‘g‘risida” 2017-yil 3-avgustdagi PQ-3137-son qarorlari talablariga muvofiq tashkil etish, xizmat safarlarining asoslanganligi, samaradorligi va natijadorligini, safar uchun ajratiladigan mablag‘lardan maqsadli va oqilona foydalanishni ta’minlash;

Qo‘mita raisining o‘rinbosarlari, hududiy boshqarmalar va tarkibiy bo‘linmalar rahbarlari faoliyatining samaradorligi va natijalarini tizimli ravishda tanqidiy tahlil qilish, Qo‘mita yig‘ilishlarida ularning shaxsiy hisobotlarini eshitish, natijalar asosida zarur choralar ko‘rish;

Qo‘mitaning hududiy boshqarmalari va idoraviy mansub tashkilotlarining rahbarlari faoliyatini muvofiqlashtirish va nazorat qilish;

Qo‘mita xodimlarini rag‘batlantirish yoki intizomiy javobgarlikka tortish masalalarini hal qilish, shu jumladan, egallab turgan lavozimlarda qolishining maqsadga muvofiqligi masalasini ko‘rib chiqish to‘g‘risida takliflar kiritish, ularning shaxsiy javobgarligini oshirish bo‘yicha tizimli chora-tadbirlarni amalga oshirish;

Qo‘mita xodimlari tomonidan Vazirlar Mahkamasining 2022-yil 14-oktabrdagi 595-son qarori bilan tasdiqlangan Davlat fuqarolik xizmatchilari odob-axloqining namunaviy qoidalari asosida tasdiqlangan Qo‘mita xodimlarining odob-axloq qoidalari talablariga rioya etilishini ta’minlash;

“Korrupsiyaga qarshi kurashish to‘g‘risida”gi O‘zbekiston Respublikasi Qonuni talablariga muvofiq Qo‘mita tizimida korrupsiya va boshqa qonunbuzarliklarning oldini olish bo‘yicha choralar ko‘rish, shuningdek, huquq amaliyoti va qonunchilikni takomillashtirish chora-tadbirlarini ishlab chiqish va amalga oshirish yo‘li bilan ularni aniqlash, tahlil qilish, yuzaga keltiruvchi sabablar va shart-sharoitlarni bartaraf etish;

Qo‘mita, hududiy boshqarmalar va idoraviy mansub tashkilotlarning ishlarini tashkil etishning zamonaviy shakllarini joriy etishni ta’minlash;

Qo‘mita xodimlari tomonidan manfaatlar to‘qnashuvi to‘g‘risidagi qonunchilikka rioya etilishini ta’minlash, jumladan ular tomonidan lavozim majburiyatlarini yoki xizmat vakolatlarini bajarish chog‘ida manfaatlar to‘qnashuviga olib keladigan yoki olib kelishi mumkin bo‘lgan shaxsiy manfaatdorlikka yo‘l qo‘ymaslik choralarini ko‘rish;

jismoniy va yuridik shaxslarning murojaatlarini ko‘rib chiqish ishlarini “Jismoniy va yuridik shaxslarning murojaatlari to‘g‘risida”gi O‘zbekiston Respublikasi Qonuni, Vazirlar Mahkamasining 2018-yil 7-maydagi 341-son qarori bilan tasdiqlangan Davlat organlarida, davlat muassasalarida va davlat ishtirokidagi tashkilotlarda jismoniy va yuridik shaxslarning murojaatlari bilan ishlash tartibi to‘g‘risidagi namunaviy nizomga muvofiq samarali tashkil etish, jamoatchilik bilan bevosita va ochiq muloqot o‘rnatish, shaxsan qabul qilishni muntazam ravishda o‘tkazish, shu jumladan, jismoniy va yuridik shaxslarning vakillarini belgilangan muddatlarda va tartibda joylarga borib qabul qilish;

O‘zbekiston Respublikasi Prezidentining Xalq qabulxonalari bilan samarali o‘zaro aloqani tashkil qilish, ularning faoliyatida Qo‘mita rahbariyati va xodimlarining faol ishtirokini, O‘zbekiston Respublikasi Prezidentining Virtual qabulxonasidan tushayotgan jismoniy va yuridik shaxslarning murojaatlari o‘z vaqtida va to‘liq ko‘rib chiqilishini ta’minlash;

davlat siri va maxfiy axborotni tashkil qilgan axborot bilan ishlashda qonunchilik talablariga rioya qilish;

davlat organlari va boshqa tashkilotlarda, O‘zbekiston Respublikasi sudlarida, shuningdek, xalqaro tashkilotlar va xorijiy davlat vakillari ishtirokida o‘tkaziladigan rasmiy tadbirlarda Qo‘mita nomidan ishtirok etish;

zarurat bo‘lganda, boshqaruv xodimlarining belgilangan umumiy cheklangan soni va mehnatga haq to‘lash fondi doirasida Qo‘mita markaziy apparati, hududiy boshqarmalari va idoraviy mansub tashkilotlarining tasdiqlangan tuzilmasiga o‘zgartirishlar kiritish;

Qo‘mita markaziy apparatining tarkibiy bo‘linmalari, shuningdek, Qo‘mitaning hududiy boshqarmalari va idoraviy mansub tashkilotlari to‘g‘risidagi nizomlarni hamda ustavlarni tasdiqlash;

Qo‘mita markaziy apparati xodimlari, hududiy boshqarmalari rahbarlari bilan qonunchilikda belgilangan tartibda mehnat shartnomalarini tuzish va bekor qilish;

Qo‘mita markaziy apparati, hududiy boshqarmalari va tumanlar (shaharlar) bo‘linmalari xodimlari bajarishi shart bo‘lgan buyruqlar va farmoyishlar chiqarish hamda ko‘rsatmalar berish;

Qo‘mita tizimida faoliyat yuritayotgan xodimlarni rag‘batlantirish va intizomiy javobgarlikka tortish masalalarini hal etish, alohida o‘rnak ko‘rsatgan xodimlarni O‘zbekiston Respublikasining Davlat mukofotlari bilan taqdirlashga taqdim etish, shuningdek, soha tarmoqlarini rivojlantirishda alohida o‘rnak ko‘rsatgan xodimlarni “Mo‘tabar ayol” ko‘krak nishoni, faxriy yorliqlar bilan taqdirlash hamda boshqa rag‘batlantirish choralarini ko‘rish;

Qo‘mita mol-mulkini qonunchilik hujjatlarida belgilangan tartibda boshqarish;

Qo‘mita xodimlarini hamda hududiy boshqarmalar va idoraviy mansub tashkilotlar xodimlarini tizimli ravishda tayyorlash va xorijiy davlatlarda ularning malakasini oshirishni tashkil etish;

Qo‘mita vakolatiga kiradigan masalalar yuzasidan O‘zbekiston Respublikasining xalqaro shartnomalarini imzolash;

O‘zbekiston Respublikasi Prezidenti va Vazirlar Mahkamasining qarorlari va topshiriqlari ijrosini tashkil etish va monitoringini yuritishning amaliy tizimini yaratish, Qo‘mitaning faoliyatida ijro intizomini mustahkamlash bo‘yicha kompleks amaliy chora-tadbirlarni bajarish, shuningdek, O‘zbekiston Respublikasi Prezidentining “Qonunchilik hujjatlari ijrosini samarali tashkil etishda respublika ijro etuvchi hokimiyat organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qo‘shimcha chora-tadbirlar to‘g‘risida” 2021-yil 10-fevraldagi PF-6166-son Farmoniga va “Ijro.gov.uz” ijro intizomi idoralararo yagona elektron tizimi samarali faoliyat ko‘rsatishini ta’minlashga qaratilgan qo‘shimcha chora-tadbirlar to‘g‘risida” 2021-yil 31-maydagi PQ-5132-son qaroriga muvofiq topshiriqlar o‘z vaqtida va sifatli ijro etilishi uchun tarkibiy va hududiy bo‘linmalar hamda idoraviy mansub tashkilotlar rahbarlarining shaxsiy mas’uliyatini oshirish choralarini ko‘rish.

18. Quyidagilar Qo‘mita raisi o‘rinbosarlarining asosiy funksional vazifalari hisoblanadi:

O‘zbekiston Respublikasi Konstitutsiyasi va qonunlari talablariga, shuningdek, boshqa normativ-huquqiy hujjatlarga rioya qilish;

Qo‘mita raisi vaqtincha bo‘lmaganda, tegishli buyruq asosida uning vazifalarini bajarish;

Qo‘mitaning o‘zi nazorat qiladigan idoraviy mansub tashkilotlari faoliyatini muvofiqlashtirish, nazorat qilish va ularga bevosita rahbarlik qilish, ularning xodimlari o‘rtasida vazifalarni taqsimlash;

Qo‘mita faoliyatining o‘zi nazorat qiladigan yo‘nalishlari bo‘yicha O‘zbekiston Respublikasi Prezidenti va Vazirlar Mahkamasining qarorlari bilan tasdiqlangan Qo‘mita faoliyatini yanada takomillashtirish bo‘yicha konsepsiyalar, kompleks dasturlar va tadbirlar ijrosini tanqidiy va chuqur tahlil qilish;

o‘zi nazorat qiladigan tarkibiy bo‘linmalar tomonidan maqsadli ko‘rsatkichlarga erishishni so‘zsiz ta’minlash choralarini ko‘rish, tarkibiy bo‘linmalar rahbarlarining hisobotlarini muntazam eshitish va ushbu ko‘rsatkichlarga erishish uchun ularning shaxsiy javobgarligini oshirish;

o‘zi nazorat qiladigan tarkibiy bo‘linmalarning rejalarini tasdiqlash, ularning bajarilishini nazorat qilishni ta’minlash;

O‘zbekiston Respublikasi Prezidenti va Vazirlar Mahkamasining qarorlari va topshiriqlari ijrosini tashkil etish va monitoringini yuritishning amaliy tizimini yaratish, Qo‘mita faoliyatida ijro intizomini mustahkamlash bo‘yicha kompleks amaliy chora-tadbirlarni bajarish, shuningdek, O‘zbekiston Respublikasi Prezidentining “Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qo‘shimcha chora-tadbirlar to‘g‘risida” 2021-yil 10-fevraldagi PF-6166-son Farmoniga va ““Ijro.gov.uz” ijro intizomi idoralararo yagona elektron tizimi samarali faoliyat ko‘rsatishini ta’minlashga qaratilgan qo‘shimcha chora-tadbirlar to‘g‘risida” 2021-yil 31-maydagi PQ-5132-son qaroriga muvofiq topshiriqlar o‘z vaqtida sifatli ijro etilishi uchun tarkibiy va hududiy bo‘linmalar hamda idoraviy mansub tashkilotlar rahbarlarining shaxsiy mas’uliyatini oshirish choralarini ko‘rish;

Qo‘mita hay’ati qarorlari, Qo‘mita raisining buyruqlari va topshiriqlari o‘z vaqtida va sifatli bajarilishini ta’minlash;

o‘zi nazorat qiladigan tarkibiy bo‘linmalarda kadrlarni tanlash va joy-joyiga qo‘yish bo‘yicha Qo‘mita raisiga takliflar taqdim etish, ularning professionalligi, o‘z ishini bilishi, yuksak darajadagi ishchanlik va ma’naviy-axloqiy fazilatlarga ega bo‘lishini ta’minlash, ularning kasbiy malakasini oshirish, mutasaddilik qilinadigan tarkibiy tuzilmalarda kadrlar zaxirasini shakllantirish choralarini ko‘rish;

o‘zi nazorat qiladigan tarkibiy bo‘linmalar tomonidan normativ-huquqiy hujjatlar loyihalarining to‘liq va sifatli ishlab chiqilishini tashkil etish, Qo‘mita tarkibiy bo‘linmalarida tayyorlangan hujjatlar loyihalari Qo‘mita raisi tomonidan ko‘rib chiqilishi va imzolanishi (viza qo‘yilishi) uchun ko‘rib chiqish va viza qo‘yish, ularni O‘zbekiston Respublikasi Prezidenti Administratsiyasining Reglamenti va Vazirlar Mahkamasining Reglamenti talablariga qat’iy rioya qilgan holda va o‘z vaqtida Vazirlar Mahkamasiga kiritilishini ta’minlash, shuningdek, normativ-huquqiy hujjatlar loyihalari Vazirlar Mahkamasida ko‘rib chiqilishida Qo‘mita raisining topshirig‘iga asosan ishtirok etish;

Qo‘mitaga taqdim etilgan takliflar va normativ-huquqiy hujjatlar loyihalari to‘liq va o‘z vaqtida ko‘rib chiqilishini ta’minlash, ularni puxta huquqiy, moliyaviy, iqtisodiy va boshqa ekspertizadan o‘tkazish;

xizmat safarlarini O‘zbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish chora-tadbirlari to‘g‘risida” 2014-yil 5-martdagi PQ-2142-son va “Xorijiy xizmat safarlarida bo‘lishning samaradorligi va xorijiy delegatsiyalarning O‘zbekiston Respublikasiga tashrifini tashkil etish uchun mansabdor shaxslarning shaxsiy mas’uliyatini yanada oshirish chora-tadbirlari to‘g‘risida” 2017-yil 3-avgustdagi PQ-3137-son qarorlari talablariga to‘liq muvofiq tashkil etish, xizmat safarlarining asoslanganligi, samaradorligi va natijadorligini, safar uchun ajratiladigan mablag‘lardan maqsadli va oqilona foydalanishni ta’minlash;

o‘zi nazorat qiladigan tarkibiy bo‘linmalar rahbarlari faoliyatining samaradorligi va natijadorligini muntazam tanqidiy tahlil qilish, Qo‘mita hay’ati majlislarida ularning shaxsiy hisobotlarini eshitish, ularning yakunlari bo‘yicha zarur chora-tadbirlarni amalga oshirish;

sohaga oid masalalar bo‘yicha Qo‘mita faoliyatini rivojlantirishga doir amaliy choralar ko‘rish, qonunchilik hujjatlarini takomillashtirish yuzasidan takliflar ishlab chiqish va ularni Qo‘mita raisiga kiritish;

o‘zi nazorat qiladigan tarkibiy bo‘linmalar rahbarlari va xodimlarini rag‘batlantirish va intizomiy javobgarlikka tortish, shu jumladan, ularning egallab turgan lavozimda qolishi maqsadga muvofiqligi masalasini ko‘rib chiqish bo‘yicha Qo‘mita raisiga taklif kiritish, funksional vazifalar va yuklangan vazifalar bajarilishi uchun ularning shaxsiy mas’uliyatini oshirish bo‘yicha tizimli choralar ko‘rish;

“Korrupsiyaga qarshi kurashish to‘g‘risida”gi O‘zbekiston Respublikasi Qonuni talablariga muvofiq tarkibiy bo‘linmalarda korrupsiya va boshqa huquqbuzarliklarning oldini olish choralarini ko‘rish, shuningdek, huquqni qo‘llash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga ko‘maklashuvchi sabablar va shart-sharoitlarni aniqlash, tahlil qilish, bartaraf etish;

Vazirlar Mahkamasining 2022-yil 14-oktabrdagi 595-son qarori bilan tasdiqlangan Davlat fuqarolik xizmatchilari odob-axloqining namunaviy qoidalari asosida tasdiqlangan Qo‘mita va uning hududiy boshqarmalari xodimlari, o‘zi nazorat qiladigan tarkibiy tuzilmalar rahbarlari va xodimlari tomonidan ushbu qoidalarga rioya etilishini ta’minlash;

davlat xizmatlari samaradorligini, ulardan erkin foydalanishni va ularni ko‘rsatish sifatini oshirish hamda “Elektron hukumat to‘g‘risida”gi O‘zbekiston Respublikasi Qonunini amalga oshirish doirasida zamonaviy axborot-kommunikatsiya texnologiyalaridan foydalanish;

jismoniy va yuridik shaxslarning murojaatlarini ko‘rib chiqish ishlarini “Jismoniy va yuridik shaxslarning murojaatlari to‘g‘risida”gi O‘zbekiston Respublikasi Qonuni, Vazirlar Mahkamasining 2018-yil 7-maydagi 341-son qarori bilan tasdiqlangan Davlat organlarida, davlat muassasalarida va davlat ishtirokidagi tashkilotlarda jismoniy va yuridik shaxslarning murojaatlari bilan ishlash tartibi to‘g‘risidagi namunaviy nizomga muvofiq samarali tashkil etish, jamoatchilik bilan bevosita va ochiq muloqot o‘rnatish, shaxsan qabul qilishni muntazam ravishda o‘tkazish, shu jumladan, jismoniy va yuridik shaxslarning vakillarini belgilangan muddatlarda va tartibda joylarga borib qabul qilish;

O‘zbekiston Respublikasi Prezidentining Xalq qabulxonalari bilan samarali hamkorlikni, O‘zbekiston Respublikasi Prezidentining “Jismoniy va yuridik shaxslarning murojaatlari bilan ishlash tizimini tubdan takomillashtirishga doir chora-tadbirlar to‘g‘risida” 2016-yil 28-dekabrdagi PF-4904-son Farmoniga muvofiq ularning faoliyatida faol ishtirok etishni, jismoniy va yuridik shaxslarning O‘zbekiston Respublikasi Prezidenti Virtual qabulxonasidan tushgan barcha murojaatlari o‘z vaqtida va to‘liq ko‘rib chiqilishini ta’minlash;

davlat siriga kiritilgan ma’lumotlar va maxfiy axborot bilan ishlashda qonun hujjatlari talablariga rioya qilish;

o‘z faoliyati sohasida malakali kadrlarni tayyorlash, kadrlarni, shu jumladan, xorijdagi ilg‘or ilmiy-tadqiqot muassasalari va ta’lim markazlarida qayta tayyorlash va malakasini oshirishni tashkil qilish;

o‘z faoliyati sohasida xorijiy davlatlar, xalqaro va xorijiy tashkilotlar bilan hamkorlik qilish;

Qo‘mita tizimining moliyaviy-iqtisodiy asoslarini hamda moddiy-texnik bazasini mustahkamlash va bu borada aniq chora-tadbirlarni amalga oshirish.

Jumladan, soha yo‘nalishlari bo‘yicha:

a) Qo‘mita raisi o‘rinbosarining asosiy vazifalari (xotin-qizlarning ijtimoiy-siyosiy faolligini oshirish, gender tenglikka erishish, bandlik va ijtimoiy himoya masalalari bo‘yicha):

xotin-qizlar o‘rtasida tadbirkorlikni rivojlantirish, ularning bandligini ta’minlashga ko‘maklashish, kasb-hunarga o‘qitishni tashkil etish;

respublika va hududiy “Xotin-qizlar tadbirkorlik markazlari” faoliyatini samarali tashkil etishida ko‘maklashish;

mahallalardagi xotin-qizlar faollari ishini muvofiqlashtirish;

ijtimoiy himoyaga muhtoj oilalar va “Ayollar daftari”ga kiritilgan xotin-qizlar bilan ishlash;

gender tenglikni ta’minlash;

xotin-qizlarning ijtimoiy-siyosiy faolligini oshirish, ularning bilim va ko‘nikmalarini rivojlantirish hamda ta’lim olish imkoniyatlarini kengaytirish;

xotin-qizlarga nisbatan zo‘ravonlikning oldini olish, shuningdek, zo‘ravonlikdan jabr ko‘rgan shaxslarga ijtimoiy, ma’naviy va huquqiy yordam berish ishlarini tashkil qilish;

boshqaruv lavozimlaridagi xotin-qizlar ulushini oshirish;

oliy ta’lim muassasalarida talabalar orasida xotin-qizlar ulushini oshirish;

xotin-qizlarning axborot-kommunikatsiya texnologiyalaridan faol foydalanishi ko‘lamini oshirish;

xotin-qizlar o‘rtasida ilm-fan va innovatsiyalarni rivojlantirish;

mahalliy Kengashlar deputatligiga o‘tkaziladigan saylov jarayonlarida nomzod xotin-qizlarning ulushini oshirish;

iqtidorli xotin-qizlarni aniqlash va qo‘llab-quvvatlash tizimini takomillashtirish;

xotin-qizlar o‘rtasida ilm-fan va innovatsiyalarni rivojlantirish bo‘yicha tegishli vazirlik va idoralar bilan hamkorlikda maqsadli loyihalarni amalga oshirish, forum, konferensiya, tanlov, ko‘rgazma, seminarlar, davra suhbatlari, uchrashuvlar tashkil qilish;

ijtimoiy himoyaga muhtoj xotin-qizlarni manzilli qo‘llab-quvvatlash;

davlat tomonidan ehtiyojmand xotin-qizlarni maxsus jarrohlik amaliyotini o‘tkazish;

respublikada xotin-qizlarning iqtisodiy imkoniyatlarini kengaytirishga ko‘maklashish;

xotin-qizlar eng ko‘p ishlashi mumkin bo‘lgan tarmoqlarda tegishli vazirlik va idoralarning mavjud ish o‘rinlariga bo‘lgan ehtiyojidan kelib chiqib, ishlash istagida bo‘lgan xotin-qizlarni ushbu ish o‘rinlariga jalb etish orqali bandligiga ko‘maklashish;

barcha hududlarda “yashil” iqtisodiyotni rivojlantirishga xotin-qizlarni, xususan, uy bekalarini jalb etish;

“Edo.ijro.uz” elektron ichki hujjatlar almashinuvi tizimi orqali hujjatlar ijrosining ta’minlanishini nazorat qilish;

“Ijro.gov.uz” ijro intizomi idoralararo yagona elektron tizimi orqali topshiriq va vazifalarning ijrosini ta’minlash hamda tashkiliy ishlarni muvofiqlashtirish;

O‘zbekiston Respublikasi Prezidenti va Vazirlar Mahkamasining qarorlari va topshiriqlari ijrosini tashkil etish va monitoringini yuritishning amaliy tizimini yaratish, Qo‘mita faoliyatida ijro intizomini mustahkamlash bo‘yicha kompleks amaliy chora-tadbirlarni bajarish, shuningdek, O‘zbekiston Respublikasi Prezidentining “Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qo‘shimcha chora-tadbirlar to‘g‘risida” 2021-yil 10-fevraldagi PF-6166-son Farmoniga va ““Ijro.gov.uz” ijro intizomi idoralararo yagona elektron tizimi samarali faoliyat ko‘rsatishini ta’minlashga qaratilgan qo‘shimcha chora-tadbirlar to‘g‘risida” 2021-yil 31-maydagi PQ-5132-son qaroriga muvofiq topshiriqlar o‘z vaqtida sifatli ijro etilishi uchun tarkibiy va hududiy bo‘linmalar hamda idoraviy mansub tashkilotlar rahbarlarining shaxsiy mas’uliyatini oshirish chora-tadbirlarini ko‘rish;

b) Qo‘mita raisi o‘rinbosarining asosiy vazifalari (oila institutini mustahkamlash, ijtimoiy-ma’naviy muhitni yaxshilash va migratsiya masalalari bo‘yicha):

“Sog‘lom oila-sog‘lom jamiyat” shiori ostida oilalar farovonligi va barqarorligini ta’minlash, oilalarni mustahkamlash, mas’uliyatli ota-onalik g‘oyasini singdirish tadbirlarini tashkil etish;

oila institutini mustahkamlash, ijtimoiy-ma’naviy muhit barqarorligini ta’minlash, mahallalarda nizolarni barvaqt aniqlash, nizoli oilalarni sog‘lom turmush tarziga qaytarish;

“Yoshlarni oilaviy hayotga tayyorlash markazlari”da nikohlanuvchi shaxslarni o‘qitish;

xotin-qizlar huquqlari va qonuniy manfaatlarini ko‘zlab, sudlarga ariza (shikoyat) va da’volarni kiritish;

noqonuniy nikoh asosida yashayotgan oilalarning nikohini qonuniy rasmiylashtirish choralarini ko‘rish;

xavfsiz migratsiyani tashkil qilish maqsadida hududlarda chet elga ishlash uchun chiqish istagidagi xotin-qizlar bilan suhbatlarni tizimli tashkil qilish;

og‘ir ijtimoiy ahvolga tushib qolgan va turar joyga muhtoj xotin-qizlarni uy-joy bilan ta’minlash;

migratsiyadan qaytgan, jazoni ijro etish muassasalaridan ozod etilgan, og‘ir ijtimoiy vaziyatga tushib qolgan xotin-qizlarning ijtimoiy moslashuviga, ular bilan manzilli ishlash orqali zarur yordamlar olishlariga ko‘maklashish;

jamiyatda xotin-qizlarga qaratilgan tazyiq va zo‘ravonlikka nisbatan murosasizlik muhitini yaratish;

hududlarda elektr energiyasini tejash maqsadida quyosh panellaridan foydalanishni targ‘ib qilish;

“Edo.ijro.uz” elektron ichki hujjatlar almashinuvi tizimi orqali hujjatlar ijrosining ta’minlanishini nazorat qilish;

“Ijro.gov.uz” ijro intizomi idoralararo yagona elektron tizimi orqali topshiriq va vazifalarning ijrosini ta’minlash hamda tashkiliy ishlarni muvofiqlashtirish;

xotin-qizlar masalalari bo‘yicha fuqarolik jamiyati institutlari bilan hamkorlik qilish;

xotin-qizlar masalalari bo‘yicha boshlang‘ich tashkilotlar faoliyatini samarali tashkil etish;

oilaviy, ma’naviy-axloqiy qadriyatlarni mustahkamlash;

“Ibratli oila”, “Mo‘tabar ayol” ko‘krak nishonlari bilan taqdirlashga oid chora-tadbirlarni tashkil qilish va amalga oshirish;

ijtimoiy reabilitatsiya ishlarini muvofiqlashtirish;

Qo‘mita tizimida axborot texnologiyalari va raqamlashtirishni joriy etish;

Zulfiya nomidagi Davlat mukofoti komissiyasi faoliyatini tashkil etishga oid chora-tadbirlarni samarali amalga oshirish;

O‘zbekiston Respublikasi Prezidenti va Vazirlar Mahkamasining qarorlari va topshiriqlari ijrosini tashkil etish va monitoringini yuritishning amaliy tizimini yaratish, Qo‘mita faoliyatida ijro intizomini mustahkamlash bo‘yicha kompleks amaliy chora-tadbirlarni bajarish, shuningdek, O‘zbekiston Respublikasi Prezidentining “Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qo‘shimcha chora-tadbirlar to‘g‘risida” 2021-yil 10-fevraldagi PF-6166-son Farmoniga va ““Ijro.gov.uz” ijro intizomi idoralararo yagona elektron tizimi samarali faoliyat ko‘rsatishini ta’minlashga qaratilgan qo‘shimcha chora-tadbirlar to‘g‘risida” 2021-yil 31-maydagi PQ-5132-son qaroriga muvofiq topshiriqlar o‘z vaqtida sifatli ijro etilishi uchun tarkibiy va hududiy bo‘linmalar hamda idoraviy mansub tashkilotlar rahbarlarining shaxsiy mas’uliyatini oshirish chora-tadbirlarini ko‘rish.

19. Quyidagilar Qo‘mita markaziy apparati tarkibiy tuzilmalari rahbarlarining asosiy funksional vazifalari hisoblanadi:

O‘zbekiston Respublikasi Konstitutsiyasi va qonunlari, shuningdek, boshqa normativ-huquqiy hujjatlar talablariga rioya qilish;

tegishli bo‘linma faoliyatiga bevosita rahbarlik qilish, ushbu bo‘linmaga yuklangan vazifalar va funksiyalarning bajarilishini tashkil etish;

Qo‘mitaning hududiy va tarkibiy bo‘linmalari faoliyatini o‘z vakolatlari doirasida muvofiqlashtirish;

prognoz ko‘rsatkichlarning bajarilishini muntazam tahlil qilish hamda Qo‘mitaning hududiy va tarkibiy bo‘linmalari ushbu ko‘rsatkichlarga so‘zsiz erishishini ta’minlashga qaratilgan qo‘shimcha chora-tadbirlarni amalga oshirish bo‘yicha takliflarni Qo‘mita raisining nazorat qiluvchi o‘rinbosarlariga kiritish;

O‘zbekiston Respublikasi Prezidenti va Vazirlar Mahkamasining qarorlari va topshiriqlari ijrosini tashkil etish va monitoringini olib borishning amaliy tizimini yaratish, Qo‘mita faoliyatida ijro intizomini mustahkamlash bo‘yicha kompleks amaliy chora-tadbirlarni bajarish, shuningdek, O‘zbekiston Respublikasi Prezidentining “Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qo‘shimcha chora-tadbirlar to‘g‘risida” 2021-yil 10-fevraldagi PF-6166-son Farmoniga, O‘zbekiston Respublikasi Prezidentining ““Ijro.gov.uz” ijro intizomi idoralararo yagona elektron tizimi samarali faoliyat ko‘rsatishini ta’minlashga qaratilgan qo‘shimcha chora-tadbirlar to‘g‘risida” 2021-yil 31-maydagi PQ-5132-son qaroriga muvofiq topshiriqlar o‘z vaqtida sifatli ijro etilishi uchun tarkibiy va hududiy bo‘linmalar hamda idoraviy mansub tashkilotlar rahbarlarining shaxsiy mas’uliyatini oshirish chora-tadbirlarini ko‘rish;

Qo‘mita hay’ati qarorlari, Qo‘mita raisining buyruqlari va farmoyishlari, uning o‘rinbosarlari ko‘rsatmalari hamda topshiriqlarining o‘z vaqtida va sifatli bajarilishini ta’minlash;

tarkibiy bo‘linmalarning har choraklik ish rejalari ishlab chiqilishini ta’minlash, ularni tasdiqlash uchun kiritish, ularda ko‘rsatilgan vazifalar va tadbirlar o‘z vaqtida va sifatli bajarilishini ta’minlash;

tarkibiy bo‘linmalarga yuklangan vazifalar bajarilishini nazorat qilish va muvofiqlashtirish, Qo‘mita hududiy boshqarmalari va idoraviy mansub tashkilotlar faoliyatiga amaliy va metodik yordam berish;

tarkibiy bo‘linmalar faoliyati sohalariga oid qonunchilik hujjatlari va huquqni qo‘llash amaliyotini takomillashtirish bo‘yicha takliflarni ishlab chiqish va ko‘rib chiqish uchun Qo‘mita rahbariyatiga kiritish;

tarkibiy bo‘linmalarda kadrlarni tanlash va joy-joyiga qo‘yishda Qo‘mita o‘rinbosarlariga takliflar taqdim etish, professionalligi, o‘z ishini bilishi, amaliy tajribaga, yuksak ishchanlik va ma’naviy-axloqiy fazilatlarga ega ekanligi kafolatini ta’minlash, ularning kasbiy malakasini oshirish choralarini ko‘rish, tarkibiy tuzilmalarda kadrlar zaxirasini shakllantirish;

tarkibiy bo‘linmalar tomonidan normativ-huquqiy hujjatlar loyihalarining sifatli ishlab chiqilishini tashkil etish, tarkibiy bo‘linmalarda tayyorlangan hujjatlar loyihalarini Qo‘mita raisi tomonidan ko‘rib chiqilishi va imzolanishi (viza qo‘yilishi) uchun ko‘rib chiqish va viza qo‘yish, ular O‘zbekiston Respublikasi Prezidenti Administratsiyasining Reglamenti va Vazirlar Mahkamasining Reglamenti talablariga qat’iy rioya qilgan holda va o‘z vaqtida Vazirlar Mahkamasiga kiritilishini ta’minlash, normativ-huquqiy hujjatlar loyihalari Vazirlar Mahkamasida ko‘rib chiqilishida Qo‘mita rahbariyati topshirig‘iga asosan ishtirok etish;

tarkibiy bo‘linmaga taqdim etilgan takliflar va normativ-huquqiy hujjatlar loyihalarini to‘liq va har tomonlama ko‘rib chiqish, ularni puxta huquqiy, moliyaviy, iqtisodiy va boshqa ekspertizadan o‘tkazish;

xizmat safarlarini O‘zbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish chora-tadbirlari to‘g‘risida” 2014-yil 5-martdagi PQ-2142-son va “Xorijiy xizmat safarlarida bo‘lishning samaradorligi va xorijiy delegatsiyalarning O‘zbekiston Respublikasiga tashrifini tashkil etish uchun mansabdor shaxslarning shaxsiy mas’uliyatini yanada oshirish chora-tadbirlari to‘g‘risida” 2017-yil 3-avgustdagi PQ-3137-son qarorlari talablariga to‘liq muvofiq tashkil etish, xizmat safarlarining asoslanganligi, samaradorligi va natijadorligini, safar uchun ajratiladigan mablag‘lardan maqsadli va oqilona foydalanishni ta’minlash;

tarkibiy bo‘linmalar xodimlari faoliyatining samaradorligi va natijadorligini muntazam ravishda tanqidiy tahlil qilish, yig‘ilishlarda ularning shaxsiy hisobotlarini eshitish, ularning yakunlari bo‘yicha zarur chora-tadbirlarni amalga oshirish;

Qo‘mita xodimlarining Qo‘mita va uning hududiy boshqarmalari xodimlari odob-axloq qoidalariga rioya etishini ta’minlash;

“Korrupsiyaga qarshi kurashish to‘g‘risida”gi O‘zbekiston Respublikasi Qonuni talablariga muvofiq tarkibiy bo‘linmalarda korrupsiya va boshqa huquqbuzarliklarning oldini olish choralarini ko‘rish, shuningdek, huquqni qo‘llash amaliyotini va qonunchilik hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga ko‘maklashuvchi sabablar va shart-sharoitlarni aniqlash, tahlil qilish, bartaraf etish;

jismoniy va yuridik shaxslarning murojaatlarini “Jismoniy va yuridik shaxslarning murojaatlari to‘g‘risida”gi O‘zbekiston Respublikasi Qonuni, Vazirlar Mahkamasining 2018-yil 7-maydagi 341-son qarori bilan tasdiqlangan Davlat organlarida, davlat muassasalarida va davlat ishtirokidagi tashkilotlarda jismoniy va yuridik shaxslarning murojaatlari bilan ishlash tartibi to‘g‘risidagi namunaviy nizomga muvofiq ko‘rib chiqish, jamoatchilik bilan bevosita va ochiq muloqot o‘rnatish, shaxsan qabul qilishni muntazam ravishda o‘tkazish, shu jumladan, jismoniy va yuridik shaxslarning vakillarini belgilangan muddatlarda va tartibda joylarga borib qabul qilish;

O‘zbekiston Respublikasi Prezidentining Xalq qabulxonalari bilan samarali hamkorlik qilish, O‘zbekiston Respublikasi Prezidentining “Jismoniy va yuridik shaxslarning murojaatlari bilan ishlash tizimini tubdan takomillashtirishga doir chora-tadbirlar to‘g‘risida” 2016-yil 28-dekabrdagi PF-4904-son Farmoniga muvofiq ularning faoliyatida faol ishtirok etish, jismoniy va yuridik shaxslarning O‘zbekiston Respublikasi Prezidentining Virtual qabulxonasidan tushgan murojaatlarini o‘z vaqtida va to‘laqonli ko‘rib chiqish;

davlat siriga kiritilgan ma’lumotlar va maxfiy axborot bilan ishlashda qonun hujjatlari talablariga rioya qilish;

ish yuritish sohasidagi namunali xodimlarni aniqlash va mukofotlash yuzasidan Qo‘mita rahbariyatiga takliflar kiritish.

20. Quyidagilar Qo‘mitaning hududiy boshqarmalari rahbarlarining asosiy funksional majburiyatlari hisoblanadi:

O‘zbekiston Respublikasi Konstitutsiyasi va qonunlari, shuningdek, boshqa normativ-huquqiy hujjatlar talablariga rioya qilish;

hududiy bo‘linmalar faoliyatiga umumiy rahbarlik qilish, O‘zbekiston Respublikasi Prezidentining farmonlari, qarorlari va farmoyishlari, Vazirlar Mahkamasining qarorlari va farmoyishlari, Qo‘mitaning, mahalliy ijro etuvchi hokimiyat organlarining normativ-huquqiy hujjatlari bilan ushbu boshqarmalarga yuklangan vazifalar va funksiyalar bajarilishini tashkil etish;

hududiy boshqarmalar va tumanlar (shaharlar) bo‘limlari faoliyati bilan bog‘liq prognoz ko‘rsatkichlarga erishishni so‘zsiz ta’minlash bo‘yicha amaliy chora-tadbirlarni ishlab chiqish va qabul qilish;

hududiy boshqarmalar va tumanlar (shaharlar) bo‘limlari faoliyatini nazorat qilish va muvofiqlashtirish;

hududiy boshqarmalar va tumanlar (shaharlar) bo‘limlari xodimlari tomonidan O‘zbekiston Respublikasi Prezidentining farmonlari, qarorlari va farmoyishlari, Vazirlar Mahkamasining qarorlari, farmoyishlari ijrosi ta’minlanishini, ijro intizomi mustahkamlanishi bo‘yicha kompleks amaliy chora-tadbirlar amalga oshirilishi, shuningdek, O‘zbekiston Respublikasi Prezidentining “Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qo‘shimcha chora-tadbirlar to‘g‘risida” 2021-yil 10-fevraldagi PF-6166-son Farmoniga va ““Ijro.gov.uz” ijro intizomi idoralararo yagona elektron tizimi samarali faoliyat ko‘rsatishini ta’minlashga qaratilgan qo‘shimcha chora-tadbirlar to‘g‘risida” 2021-yil 31-maydagi PQ-5132-son qaroriga muvofiq topshiriqlar o‘z vaqtida sifatli ijro etilishi uchun tarkibiy va hududiy bo‘linmalar hamda idoraviy mansub tashkilotlar rahbarlarining shaxsiy mas’uliyatini oshirish chora-tadbirlarini ko‘rish;

Qo‘mita hay’ati qarorlari, Qo‘mita raisining buyruqlari, farmoyishlari va uning o‘rinbosarlari ko‘rsatmalari hamda topshiriqlari o‘z vaqtida va sifatli bajarilishini ta’minlash;

Qo‘mita faoliyati sohasiga kiradigan masalalar yuzasidan mahalliy ijro etuvchi hokimiyat organlari va kompleks ijtimoiy-iqtisodiy rivojlantirish bo‘yicha sektorlar bilan hamkorlik qilish;

xodimlarning vakolatlarini belgilash, ular o‘rtasida majburiyatlarni taqsimlash, hududiy boshqarmalar va tumanlar (shaharlar) bo‘limlarini boshqarishda mansabdor shaxslarning javobgarligini belgilash;

hududiy boshqarmalar va tumanlar (shaharlar) bo‘limlari faoliyatini rejalashtirishni tashkil etish, har choraklik ish rejalarini tasdiqlash, ularning bajarilishi ustidan nazoratni ta’minlash;

hududiy boshqarmalarda va tumanlar (shaharlar) bo‘limlarida kadrlarni tanlash va joy-joyiga qo‘yish, ularning samarali faoliyat ko‘rsatishi uchun zarur shart-sharoitlar yaratish, hududiy boshqarma kadrlar zaxirasini shakllantirish;

Qo‘mita rahbari nomenklaturasiga kiradigan bo‘sh lavozimlarga taklif etilgan kadrlarning, shuningdek, hududiy boshqarmaga ishga qabul qilinayotgan boshqa kadrlarning professionalligi, o‘z ishini bilishi, amaliy tajribaga, yuksak darajada ishchanlik va ma’naviy-axloqiy fazilatlarga ega ekanligi kafolatini ta’minlash;

hududiy boshqarmalar xodimlarini rag‘batlantirish va intizomiy javobgarlikka tortish masalalarini hal qilish, shu jumladan, ular egallab turgan lavozimda qolishi maqsadga muvofiqligiga doir masalalarni ko‘rib chiqish, ularning shaxsiy mas’uliyatini oshirish bo‘yicha choralar ko‘rish;

hududiy boshqarmalar xodimlarining va tuman (shahar) bo‘limlari xodimlarining odob-axloq qoidalari talablariga rioya qilishini ta’minlash;

“Korrupsiyaga qarshi kurashish to‘g‘risida”gi O‘zbekiston Respublikasi Qonuni talablariga muvofiq hududiy bo‘linmalarda korrupsiya va boshqa huquqbuzarliklarning oldini olish choralarini ko‘rish, shuningdek, huquqni qo‘llash amaliyotini va qonunchilik hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga ko‘maklashuvchi sabablar va shart-sharoitlarni aniqlash, tahlil qilish, bartaraf etish;

prognoz ko‘rsatkichlarning bajarilishini muntazam tahlil qilish hamda Qo‘mitaning hududiy boshqarmalari va ularning bo‘linmalari ushbu ko‘rsatkichlarga so‘zsiz erishishini ta’minlashga qaratilgan qo‘shimcha choralar ko‘rish bo‘yicha takliflarni Qo‘mitaga kiritish;

hududiy boshqarmalar xodimlari va tuman (shahar) bo‘limlari rahbarlari faoliyati samaradorligi va natijadorligini tizimli ravishda tanqidiy tahlil qilish, yig‘ilishlarda ularning shaxsiy hisobotlarini eshitish, ularning yakunlari bo‘yicha zarur chora-tadbirlarni amalga oshirish;

hududiy boshqarmalar va ularning bo‘linmalari faoliyatiga oid masalalar bo‘yicha qonunchilik hujjatlarini takomillashtirish, shuningdek, davlat xizmatlari samaradorligi, sifatini oshirish va ulardan erkin foydalanish bo‘yicha takliflarni ishlab chiqish hamda ko‘rib chiqish uchun Qo‘mita rahbariyatiga kiritish;

jismoniy va yuridik shaxslarning murojaatlarini ko‘rib chiqish, aholi bilan to‘g‘ridan-to‘g‘ri va ochiq muloqotni yo‘lga qo‘yish, muntazam ravishda shaxsan qabul qilish, shu jumladan, sayyor qabullar o‘tkazish;

O‘zbekiston Respublikasi Prezidentining Xalq qabulxonalari bilan samarali hamkorlik qilish, O‘zbekiston Respublikasi Prezidentining “Jismoniy va yuridik shaxslarning murojaatlari bilan ishlash tizimini tubdan takomillashtirishga doir chora-tadbirlar to‘g‘risida” 2016-yil 28-dekabrdagi PF-4904-son Farmoniga muvofiq ularning faoliyatida faol ishtirok etish, jismoniy va yuridik shaxslarning O‘zbekiston Respublikasi. Prezidentining Virtual qabulxonasidan tushgan murojaatlarini o‘z vaqtida va to‘laqonli ko‘rib chiqish;

hududiy boshqarmalar xodimlarining lavozim maoshiga mukofotlar, ustamalar to‘lash, ularga moddiy yordam berish, ularni mukofotlash, rag‘batlantirish va ularga intizomiy chora qo‘llash to‘g‘risida qaror qabul qilish, ularni davlat mukofotlari va idoraviy mukofotlar bilan taqdirlash to‘g‘risida Qo‘mitaga takliflar kiritish;

davlat sirini yoki qonun bilan qo‘riqlanadigan boshqa sirni tashkil etuvchi ma’lumotlarning himoya qilinishini ta’minlash;

mahalliy ijro etuvchi hokimiyat organlarida, sudlarda va tashkilotlarda Qo‘mitaning hududiy boshqarmalari va ularning bo‘linmalari manfaatlarini ifoda etish;

xotin-qizlarning huquqlari va qonuniy manfaatlariga rioya etilishini ta’minlash uchun javob beradi.

6-bob. Qo‘mita rahbarlarining javobgarligi

21. Qo‘mita raisi:

mazkur Nizom va boshqa qonunchilik hujjatlari bilan Qo‘mitaga yuklangan vazifalarning sifatli va o‘z vaqtida bajarilishi, shuningdek, Qo‘mita ishidagi kamchiliklarni bartaraf etish bo‘yicha choralar ko‘rilishi;

amalga oshirilayotgan dasturlar, strategiya va konsepsiyalarda ko‘zlangan natijalarga erishilishi, ularning oila va xotin-qizlarni qo‘llab-quvvatlash, ularning huquqlari va qonuniy manfaatlarini himoya qilish sohasidagi davlat siyosatini amalga oshirishga ta’siri;

tegishli sohalar va tarmoqlarni rivojlantirish bo‘yicha belgilangan parametrlar va ko‘rsatkichlarga erishishga qaratilgan amaliy choralar ishlab chiqilishi va amalga oshirilishi;

Qo‘mita tizimida ijro intizomiga qat’iy rioya etilishi uchun javob beradi.

22. Qo‘mita raisining o‘rinbosarlari:

qonunchilik hujjatlari bilan yuklangan yo‘nalishlar va sohalar bo‘yicha vazifalar va funksiyalarning o‘z vaqtida bajarilishi hamda natijadorligi;

mutasaddilik qilinayotgan yo‘nalishlar bo‘yicha sohalarning barqaror rivojlanishini ta’minlashga oid chora-tadbirlarning samaradorligi va natijadorligi uchun javob beradi.

23. Qo‘mita markaziy apparati tarkibiy bo‘linmalari rahbarlari:

tegishli tarkibiy bo‘linmalarga yuklangan vazifalar va funksiyalarning o‘z vaqtida bajarilishi hamda natijadorligi;

faoliyat yo‘nalishlariga oid qonunchilik hujjatlari, Qo‘mita rahbarlarining topshiriqlari bajarilishining holati to‘g‘risida Qo‘mitaga haqqoniy tahliliy va boshqa axborotlarni sifatli tayyorlash va o‘z vaqtida taqdim etish yuzasidan javob beradi.

24. Qo‘mita hududiy bo‘linmalarining boshliqlari:

yuklangan vazifalar va funksiyalarning sifatli bajarilishini tashkil etish;

tegishli hududda oila va xotin-qizlarni qo‘llab-quvvatlash, ularning huquqlari va qonuniy manfaatlarini himoya qilish sohasidagi davlat siyosati sohasidagi qonunchilik hujjatlari, Qo‘mita rahbarlarining topshiriqlari o‘z vaqtida va sifatli bajarilishi bo‘yicha ta’sirchan nazoratni amalga oshirish;

tegishli hududda oila va xotin-qizlarni qo‘llab-quvvatlash, ularning huquqlari va qonuniy manfaatlarini himoya qilish sohasidagi davlat siyosatini amalga oshirish holati to‘g‘risida Qo‘mitaga haqqoniy tahliliy va boshqa axborotlarni o‘z vaqtida taqdim etish yuzasidan javob beradi.

7-bob. Qo‘mita faoliyatini tashkil etish

1-§. Qo‘mita rahbariyati

25. Qo‘mitaga O‘zbekiston Respublikasi Bosh vazirining O‘zbekiston Respublikasi Oliy Majlisi Qonunchilik palatasi ma’qullaganidan keyin kiritilgan takdimnomasiga binoan O‘zbekiston Respublikasi Prezidenti tomonidan lavozimga tasdiqlanadigan va lavozimdan ozod qilinadigan Bosh vazir o‘rinbosari — Qo‘mita raisi rahbarlik qiladi.

Qo‘mita raisi o‘z maqomiga ko‘ra Vazirlar Mahkamasi a’zosi hisoblanadi.

26. Qo‘mita raisining O‘zbekiston Respublikasi Bosh vazirining taqdimnomasiga asosan O‘zbekiston Respublikasi Prezidenti tomonidan lavozimga tayinlanadigan va lavozimdan ozod qilinadigan ikki nafar o‘rinbosari bo‘ladi.

Qo‘mita raisi bo‘lmagan vaqtda uning vakolatlari vazifalar taqsimotiga muvofiq rais o‘rinbosarlaridan biri tomonidan amalga oshiriladi.

Qo‘mita raisining o‘rinbosarlari maqomi, mehnatga haq to‘lash, moddiy rag‘batlantirish va tibbiy xizmat ko‘rsatish shartlariga ko‘ra — tegishli ravishda vazir o‘rinbosarlariga, Qo‘mita markaziy apparati xodimlari — Kambag‘allikni qisqartirish va bandlik vazirligining markaziy apparati xodimlariga, Qoraqalpog‘iston Respublikasi Oila va xotin-qizlar qo‘mitasi, viloyatlar va Toshkent shahar oila va xotin-qizlar boshqarmalari rahbarlari — Qoraqalpog‘iston Respublikasi Vazirlar Kengashi Raisining, viloyatlar va Toshkent shahar hokimlarining o‘rinbosarlariga, tuman (shahar) oila va xotin-qizlar bo‘limlari rahbarlari — tuman va shahar hokimlarining o‘rinbosarlariga, Qoraqalpog‘iston Respublikasi Oila va xotin-qizlar qo‘mitasi, viloyatlar va Toshkent shahar oila va xotin-qizlar boshqarmalari xodimlari — Qoraqalpog‘iston Respublikasi Kambag‘allikni qisqartirish va bandlik vazirligi, viloyatlar va Toshkent shahar kambag‘allikni qisqartirish va bandlik boshqarmalari xodimlariga tenglashtiriladi.

27. Qo‘mita markaziy apparatining tarkibiy (boshqarma, bo‘lim, bo‘linma va xizmatlar) bo‘linmalari, shuningdek, tarkibiy bo‘linmalar rahbarlari tegishlicha Qo‘mita raisining o‘rinbosarlari taqdimnomasi bo‘yicha Qo‘mita raisi tomonidan lavozimga tayinlanadi va lavozimdan ozod etiladi.

28. Qoraqalpog‘iston Respublikasi Vazirlar Kengashi Raisining o‘rinbosari — Oila va xotin-qizlar qo‘mitasi raisi, viloyatlar va Toshkent shahar hokimlarining o‘rinbosarlari — Oila va xotin-qizlar boshqarmalari boshliqlari tegishlicha Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlari tomonidan O‘zbekiston Respublikasi Bosh vazirining o‘rinbosari — Oila va xotin-qizlar qo‘mitasi raisi bilan kelishgan holda lavozimga tayinlanadi va lavozimdan ozod etiladi.

29. Tuman (shahar)lar hokimlarining o‘rinbosarlari — oila va xotin-qizlar bo‘limlari boshliqlari tegishlicha Qoraqalpog‘iston Respublikasi Vazirlar Kengashi Raisining o‘rinbosari — Oila va xotin-qizlar qo‘mitasi raisi, viloyatlar va Toshkent shahar hokimlarining o‘rinbosarlari — Oila va xotin-qizlar boshqarmalari boshliqlarining taqdimnomasiga binoan O‘zbekiston Respublikasi Bosh vazirining o‘rinbosari — Oila va xotin-qizlar qo‘mitasi raisi bilan kelishgan holda tuman (shahar)lar hokimlari tomonidan lavozimga tayinlanadi va lavozimdan ozod etiladi.

30. Qoraqalpog‘iston Respublikasi Oila va xotin-qizlar qo‘mitasi, viloyatlar va Toshkent shahar Oila va xotin-qizlar boshqarmalari tarkibidagi bo‘limlar va tuman (shahar)lar Oila va xotin-qizlar bo‘limlari mutaxassislari lavozimga O‘zbekiston Respublikasi Oila va xotin-qizlar qo‘mitasi markaziy apparatining mutasaddi boshqarma va bo‘limlari boshliqlarining xulosalariga muvofiq tegishlicha Qoraqalpog‘iston Respublikasi Vazirlar Kengashi Raisining o‘rinbosari — Oila va xotin-qizlar qo‘mitasi raisining, viloyatlar va Toshkent shahar hokimlarining o‘rinbosarlari — Oila va xotin-qizlar boshqarmalari boshliqlarining buyrug‘iga binoan lavozimga tayinlanadi va lavozimdan ozod etiladi.

Qoraqalpog‘iston Respublikasi Vazirlar Kengashi Raisi o‘rinbosari — Qoraqalpog‘iston Respublikasi Oila va xotin-qizlar qo‘mitasi raisi, viloyatlar va Toshkent shahar hokimlari o‘rinbosarlari — viloyatlar va Toshkent shahar oila va xotin-qizlar boshqarmalari boshliqlari hamda tuman (shahar) hokimlarining o‘rinbosarlari — tuman (shahar) oila va xotin-qizlar bo‘limlari boshliqlariga 1 nafardan avtomobil haydovchisi va rahbar kotibasi (yordamchi xodimlar) ajratiladi.

2-§. Qo‘mita markaziy apparati tarkibiy bo‘linmalarining hududiy boshqarmalar va idoraviy mansub tashkilotlar bilan o‘zaro hamkorligi

31. Qo‘mita markaziy apparati tarkibiy bo‘linmalarining hududiy boshqarmalar va idoraviy mansub tashkilotlar bilan o‘zaro hamkorligi markaziy apparat tarkibiy bo‘linmalarining rahbarlari tomonidan ta’minlanadi.

32. Qo‘mita markaziy apparatining tarkibiy bo‘linmalari Qo‘mitaning hududiy boshqarmalari bilan o‘z faoliyati yo‘nalishlari bo‘yicha:

topshiriqlarni hududiy boshqarmalar va idoraviy mansub tashkilotlarga yetkazadi hamda ularning bajarilishini nazorat qiladi;

Qo‘mitaning hududiy boshqarmalari va idoraviy mansub tashkilotlariga tarkibiy bo‘linmalarning bevosita faoliyati masalalari bo‘yicha so‘rovlar yuboradi hamda ularning ijro etilishini nazorat qiladi;

Qo‘mitaning hududiy boshqarmalari va idoraviy mansub tashkilotlari faoliyatini o‘rganadi, umumlashtiradi, uni takomillashtirishga qaratilgan chora-tadbirlarni ishlab chiqadi va Qo‘mita rahbariyatiga kiritadi;

Qo‘mitaning hududiy boshqarmalari va idoraviy mansub tashkilotlari faoliyatini tashkil etish va faoliyati natijalari to‘g‘risida hisobot va axborot materiallari, statistika va boshqa ma’lumotlar o‘rganilishi va umumlashtirilishini tashkil etadi;

Qo‘mitaning hududiy boshqarmalari va idoraviy mansub tashkilotlarining ish rejalarini tahlil qiladi, ularning faoliyatini takomillashtirishga doir choralar ko‘radi;

Qo‘mitaning hududiy boshqarmalari va idoraviy mansub tashkilotlaridan tushgan takliflarni ko‘rib chiqadi;

normativ-huquqiy hujjatlar loyihalarini tayyorlashda Qo‘mitaning hududiy boshqarmalari va idoraviy mansub tashkilotlari ishtirokini tashkil etadi, qonunchilik hujjatlarini takomillashtirish bo‘yicha ulardan tushgan takliflarni ko‘rib chiqadi.

33. Qo‘mitaning hududiy boshqarmalari va idoraviy mansub tashkilotlari Qo‘mita markaziy apparatining tarkibiy bo‘linmalari bilan o‘zaro hamkorlik qiladi. Jumladan:

Qo‘mita rahbariyati topshiriqlari ijrosi haqida xabar beradi;

belgilangan faoliyat sohasida qonunchilik hujjatlarini amalga oshirish bo‘yicha faoliyat natijalari to‘g‘risida Qo‘mitaning markaziy apparatiga axborot taqdim etadi;

ularning faoliyatini tekshirish va o‘rganish natijasida ishda aniqlangan kamchiliklar va qoidabuzarliklarni bartaraf etish natijalari to‘g‘risida xabar beradi;

o‘z faoliyati natijalari to‘g‘risidagi hisobotlarni belgilangan muddatlarda Qo‘mitaning markaziy apparatiga taqdim etadi;

Qo‘mita vakolatiga taalluqli sohalardagi muammolarni hal qilishga qaratilgan takliflarni Qo‘mitaning markaziy apparatiga yuboradi;

mahalliy ijro etuvchi hokimiyat organlari, hududiy davlat organlari, kompleks ijtimoiy-iqtisodiy rivojlantirish bo‘yicha sektorlar bilan o‘zaro hamkorlik natijalari to‘g‘risida xabar beradi;

vakolatli organlar tomonidan o‘tkazilgan o‘z faoliyatini tekshirish natijalari to‘g‘risida ma’lumot beradi;

joylarda Qo‘mita hay’ati yig‘ilishi, seminar, konferensiya, tanlov, ko‘rik va boshqa tashkiliy tadbirlar o‘tkazish to‘g‘risida takliflar kiritadi.

3-§. Qo‘mitaning davlat boshqaruvining boshqa organlari, mahalliy ijro etuvchi hokimiyat organlari, xo‘jalik birlashmalari va boshqa tashkilotlar bilan o‘zaro hamkorligi

34. Qo‘mita o‘z vazifalari va funksiyalarini amalga oshirishda davlat boshqaruvining boshqa organlari, mahalliy ijro etuvchi hokimiyat organlari, xo‘jalik birlashmalari va boshqa tashkilotlar bilan o‘zaro hamkorlik qiladi.

35. Qo‘mitaning hududiy boshqarmalari o‘z vakolatlari doirasida davlat boshqaruvining boshqa organlari, mahalliy ijro etuvchi hokimiyat organlari, xo‘jalik birlashmalari, hududlarni kompleks ijtimoiy-iqtisodiy rivojlantirish bo‘yicha sektorlar va boshqa tashkilotlar bilan o‘zaro hamkorlik qiladi.

4-§. Qo‘mita hay’ati, boshqa maslahat, konsultativ va ekspert organlari

36. Qo‘mitada rais (hay’at raisi), uning o‘rinbosarlari (lavozimi bo‘yicha), shuningdek, uning faoliyatining asosiy yo‘nalishlarini muvofiqlashtiruvchi tarkibiy bo‘linmalar hamda hududiy bo‘linma va idoraviy mansub tashkilotlar rahbarlaridan iborat tarkibda hay’at tuziladi.

Hay’at tarkibining soni va shaxsiy tarkibi Qo‘mita raisining taqdimnomasiga binoan Vazirlar Mahkamasi tomonidan tasdiqlanadi.

37. Hay’atga quyidagi vazifalar yuklanadi:

Qo‘mita faoliyatining ushbu Nizomda belgilangan asosiy yo‘nalishlarini ishlab chiqish va amalga oshirish;

qonunchilik hujjatlarida, O‘zbekiston Respublikasi Prezidentining hujjatlari va O‘zbekiston Respublikasi Hukumatining qarorlarida belgilangan vazifalar o‘z vaqtida va sifatli amalga oshirilishini ta’minlash uchun Qo‘mita tizimi xodimlari va rahbarlarining shaxsiy javobgarligini oshirish choralarini ko‘rgan holda, tarkibiy va hududiy bo‘linmalar hamda idoraviy mansub tashkilotlar rahbarlarining hisobotlari muntazam ravishda eshitilishini tashkil etish;

tizimli ravishda Qo‘mita faoliyati sohasidagi hududiy va tarmoq dasturlari amalga oshirilishining natijadorligini har chorakda va muntazam ko‘rib chiqish;

Qo‘mita faoliyati doirasidagi dolzarb masalalarni muhokama qilishni ta’minlagan holda hay’atning kengaytirilgan, shu jumladan, joylarda sayyor majlislarini o‘tkazishni tashkil etish, shuningdek, yuzaga kelgan muammolarni bartaraf etish bo‘yicha tegishli qarorlarni ishlab chiqish va qabul qilish;

Qo‘mita markaziy apparati va uning tizimiga kiradigan lavozimlar nomenklaturasini ko‘rib chiqish va tasdiqlash;

Qo‘mita nomenklaturasiga kiradigan lavozimlarga kadrlarni tanlash, joy-joyiga qo‘yish masalalarini ko‘rib chiqish;

O‘zbekiston Respublikasi Prezidenti va Vazirlar Mahkamasining qarorlari va topshiriqlari bilan belgilangan vazifalar o‘z vaqtida va sifatli bajarilishini ta’minlash uchun Qo‘mita rahbarlari va xodimlarining ijro intizomini mustahkamlash va shaxsiy javobgarligini oshirish.

Hay’at Qo‘mita vakolatiga kiritilgan boshqa masalalarni ham ko‘rib chiqishi mumkin.

38. Hay’at majlisiga respublika ijro etuvchi hokimiyat organlari, xo‘jalik birlashmalari va boshqa tashkilotlar rahbarlari ularning vakolatiga kiradigan masalalar yuzasidan taklif etilishi mumkin.

39. Hay’at, agar uning majlisida hay’at tarkibining yarmidan ko‘pi qatnashsa, vakolatli hisoblanadi. Ko‘rib chiqilayotgan masalalar yuzasidan qarorlar ko‘pchilik ovoz bilan qabul qilinadi.

40. Hay’at qarorlari Qo‘mita raisining buyruqlari bilan amalga oshiriladi.

41. Qo‘mita raisi va hay’at a’zolari o‘rtasida kelishmovchiliklar yuzaga kelgan taqdirda, Qo‘mita raisi yuzaga kelgan kelishmovchiliklar haqida Vazirlar Mahkamasiga axborot bergan holda mustaqil ravishda qaror qabul qiladi. Hay’at a’zolari ham Vazirlar Mahkamasiga o‘z fikrini xabar qilishi mumkin.

42. Hay’at faoliyatining tartibi uning hay’at tomonidan tasdiqlanadigan reglamenti bilan belgilanadi.

8-bob. Qo‘mita faoliyatining samaradorligi va natijadorligini baholash mezonlari va ish indikatorlari

43. Qo‘mita faoliyatining samaradorligi muntazam baholanadi.

44. Qo‘mita faoliyatining samaradorligi va natijadorligini baholash tegishli mezonlar va ishchi indikatorlarga asoslanadi.

45. Qo‘mita faoliyati samaradorligi va natijadorligini baholash yakunlari bo‘yicha:

Qo‘mita rahbarlari va xodimlarini rag‘batlantirish (mukofotlash) yoki ularga nisbatan intizomiy jazo choralari;

Qo‘mita faoliyatida aniqlangan kamchiliklarni bartaraf etish va uning faoliyatini yanada takomillashtirish choralari ko‘riladi.

46. Qo‘mita faoliyatining samaradorligi va natijadorligini baholash tartibi qonunchilik hujjatlarida belgilanadi.

9-bob. Qo‘mita faoliyatini moliyalashtirish va moddiy-texnik ta’minlash, uning xodimlari mehnatiga haq to‘lash va moddiy rag‘batlantirish

47. Quyidagilar Qo‘mita faoliyatini moliyalashtirishning asosiy manbalari hisoblanadi:

O‘zbekiston Respublikasi Davlat budjeti mablag‘lari;

O‘zbekiston Respublikasi Oila va xotin-qizlar qo‘mitasini rivojlantirish va xodimlarini moddiy rag‘batlantirish jamg‘armasi mablag‘lari;

Oila va xotin-qizlarni qo‘llab-quvvatlash davlat maqsadli jamg‘armasi mablag‘lari;

qonunchilik hujjatlarida taqiqlanmagan boshqa manbalar.

48. Qo‘mitaning markaziy apparati, hududiy boshqarmalari va tuman (shahar) bo‘limlari xodimlarining ish haqi lavozim maoshi, mukofotlar, qo‘shimcha haq, ustamalar va qonunchilikda nazarda tutilgan boshqa rag‘batlantiruvchi to‘lovlardan iborat.

49. Qo‘mita boshqaruv xodimlarining Yagona tarif setkasi bo‘yicha mehnatga haq to‘lashning tasdiqlangan razryadlariga muvofiq lavozim maoshini belgilashda tarif koeffitsiyenti markaziy apparatda — 1,8 baravarga oshirilgan miqdorda qo‘llaniladi.

Qo‘mita markaziy apparati, uning hududiy va idoraviy mansub tashkilotlari xodimlarining lavozim maoshi Yagona tarif setkasining tasdiqlangan razryadlari bo‘yicha belgilanadi.

Qo‘mita xodimlarining ish haqi lavozim maoshi, mukofotlar, qo‘shimcha haqlar, ustamalardan va qonunchilikda nazarda tutilgan boshqa to‘lovlardan iborat bo‘ladi.

50. Qo‘mita markaziy apparati, Qoraqalpog‘iston Respublikasi Oila va xotin-qizlar qo‘mitasi, viloyatlar va Toshkent shahar oila va xotin-qizlar boshqarmalari, tuman (shahar) oila va xotin-qizlar bo‘limlari xodimlarining umumiy ish stajidan kelib chiqib, O‘zbekiston Respublikasining Davlat budjeti mablag‘lari hisobidan quyidagi miqdorda ko‘p yillik ishlaganlik uchun har oylik ustama to‘lanadi (rag‘batlantirish koeffitsiyentini inobatga olgan holda lavozim maoshiga nisbatan koeffitsiyentlarda):

1 dan 3 yilgacha — 0,3;

3 dan 5 yilgacha — 0,6;

5 dan 10 yilgacha — 0,8;

10 dan 15 yilgacha— 1,0;

15 dan 20 yilgacha — 1,2;

20 dan yuqori — 1,5.

Qo‘mita huzuridagi budjetdan tashqari jamg‘arma mablag‘lari hisobidan qonunchilikda belgilangan ishlamaydigan bayram kunlarida va boshqa muhim sanalarda mukofotlash, shuningdek, ustama, rag‘batlantirish va qo‘shimcha haq, mukofotlar va ish haqiga boshqa to‘lovlar miqdori Qo‘mita raisi tomonidan belgilanadi.

Shuningdek, Qo‘mita huzuridagi budjetdan tashqari O‘zbekiston Respublikasi Oila va xotin-qizlar qo‘mitasini rivojlantirish va xodimlarini moddiy rag‘batlantirish jamg‘armasi hisobidan:

a) eng tashabbuskor va samarali ishlagan Qo‘mitaning markaziy apparati xodimlariga lavozim maoshining ikki yuz foizigacha, Qoraqalpog‘iston Respublikasi Oila va xotin-qizlar qo‘mitasi, viloyatlar va Toshkent shahar oila va xotin-qizlar boshqarmalarining xodimlariga lavozim maoshining yuz foizigacha, tuman (shahar) oila va xotin-qizlar bo‘limlarining xodimlariga lavozim maoshining yetmish besh foizigacha oylik qo‘shimcha haqlar va ustamalar;

b) nufuzli xalqaro reyting tashkilotlarining yuqori 500 talik ro‘yxatiga kiritilgan xorijiy oliy ta’lim muassasalarini (bakalavriat, magistratura) tamomlagan yoki ularda ilmiy daraja (PhD va unga tenglashtirilgan boshqa ilmiy daraja) olgan yosh mutaxassis xodimlarga — O‘zbekiston Respublikasi Prezidentining “Yoshlarni har tomonlama qo‘llab-quvvatlash va ularning ijtimoiy faolligini yanada oshirishga oid qo‘shimcha chora-tadbirlar to‘g‘risida” 2021-yil 13-iyuldagi PF-6260-son Farmonida belgilangan tartib va miqdorlarda to‘lab beriladigan qo‘shimcha ustamalar;

v) ilmiy darajaga (PhD, DSc) ega xodimlarga — lavozim maoshining 60 foizigacha (PhD — 30 foiz, DSc — 60 foiz) miqdorida qo‘shimcha ustama.

Xodimlarni qo‘shimcha moddiy rag‘batlantirish to‘g‘risidagi nizom O‘zbekiston Respublikasi Iqtisodiyot va moliya vazirligi bilan kelishgan holda Qo‘mita raisi tomonidan tasdiqlanadi.

Qo‘mita huzuridagi budjetdan tashqari O‘zbekiston Respublikasi Oila va xotin-qizlar qo‘mitasini rivojlantirish va xodimlarini moddiy rag‘batlantirish jamg‘armasi mablag‘lari hisobidan xodimlarga qonunchilikda taqiqlanmagan boshqa to‘lovlar ham to‘lanishi mumkin.

Qo‘mita markaziy apparatining moddiy-texnik bazasini mustahkamlash bo‘yicha to‘lovlar jamg‘arma hisobidan amalga oshiriladi.

Bunda ushbu bandda nazarda tutilgan to‘lovlar jamg‘arma moliyaviy holatidan kelib chiqib to‘lanadi.

51. Qo‘mita markaziy apparati, hududiy boshqarmalar va tuman (shahar) bo‘limlari xodimlariga oylik ustamalar, moddiy va ko‘p yillik mehnati uchun rag‘batlantirishlar tarzidagi lavozim maoshlariga qo‘shimcha to‘lovlar qonunchilik hujjatlariga muvofiq amalga oshiriladi, shuningdek, Qo‘mita hay’ati tomonidan tasdiqlanadi.

10-bob. Qo‘mitaning O‘zbekiston Respublikasi Oliy Majlisi, O‘zbekiston Respublikasi Prezidenti, O‘zbekiston Respublikasi Prezidenti Administratsiyasi hamda Vazirlar Mahkamasiga hisobot berishi

52. Qo‘mita rahbarlari o‘z faoliyati to‘g‘risida O‘zbekiston Respublikasi Prezidentiga, O‘zbekiston Respublikasi Prezidenti Administratsiyasining tegishli tarkibiy bo‘linmalariga va Vazirlar Mahkamasiga hisobot beradi.

53. Qo‘mita raisi har yili Xotin-qizlarning jamiyatdagi rolini oshirish, gender tenglik va oila masalalari bo‘yicha respublika komissiyasiga Qo‘mita faoliyati yuzasidan hamda sohadagi tizimli muammolar va ularning yechimi to‘g‘risida axborot berib boradi.

Qo‘mitaning hududiy bo‘linmalari boshliqlari har yarim yilda Xotin-qizlarning jamiyatdagi rolini oshirish, gender tenglik va oila masalalari bo‘yicha hududiy komissiyalarga Qo‘mita hududiy bo‘linmalari faoliyati yuzasidan hamda sohada uchrayotgan dolzarb muammo va kamchiliklar hamda ularning yechimi bo‘yicha axborot beradi.

54. Qo‘mita O‘zbekiston Respublikasi Prezidenti Administratsiyasi va Vazirlar Mahkamasi bilan o‘zaro hamkorlik qilish doirasida:

o‘ziga yuklangan vazifalar va funksiyalarni bajarish bilan bog‘liq normativ-huquqiy hujjatlar hamda boshqa hujjatlar loyihalarini belgilangan tartibda kiritadi;

O‘zbekiston Respublikasi Prezidenti Administratsiyasi va Vazirlar Mahkamasiga taqdim etish uchun respublika ijro etuvchi hokimiyat organlari, xo‘jalik birlashmalari bilan birgalikda o‘z faoliyati sohasidagi muammolarni hal etish, davlat boshqaruvi tizimini maqbullashtirishga qaratilgan taklif, tavsiya va tahliliy ma’lumotlar tayyorlanishini ta’minlaydi;

oilalarni mustahkamlash va xotin-qizlarni qo‘llab-quvvatlashning eng muhim yo‘nalishlari hamda vazifalarni amalga oshirishda mavjud tizimli muammo va kamchiliklarning muntazam ravishda ko‘rib chiqilishini tashkil qiladi;

belgilangan tartibda boshqa funksiyalarni ham amalga oshiradi.

55. Vazirlar Mahkamasi rahbariyati Qo‘mita rahbarlarining faoliyatini yuklangan vazifalarning ular tomonidan samarali bajarilishi bo‘yicha doimiy monitoring qilib boradi, Qo‘mita faoliyati samaradorligini xolisona baholaydi.

56. Monitoring va baholash natijalariga ko‘ra Qo‘mitaning alohida o‘rnak ko‘rsatgan xodimlarini rag‘batlantirish choralari ko‘riladi, jiddiy kamchiliklarga yo‘l qo‘ygan xodimlarga nisbatan esa tegishli javobgarlik choralari qo‘llaniladi.

11-bob. Yakunlovchi qoida

57. Qo‘mita qonunchilik hujjatlarida belgilangan tartibda qayta tashkil etiladi va tugatiladi.

Vazirlar Mahkamasining 2024-yil 12-avgustdagi 500-son qaroriga

2-ILOVA

O‘zbekiston Respublikasi Oila va xotin-qizlar qo‘mitasini rivojlantirish va xodimlarini moddiy rag‘batlantirish jamg‘armasi to‘g‘risida

NIZOM

1-bob. Umumiy qoidalar

1. Mazkur Nizom O‘zbekiston Respublikasi Oila va xotin-qizlar qo‘mitasini rivojlantirish va xodimlarini moddiy rag‘batlantirish jamg‘armasi (keyingi o‘rinlarda — Jamg‘arma) mablag‘larini shakllantirish va ulardan foydalanish tartibini belgilaydi.

2. Jamg‘arma o‘z faoliyatini O‘zbekiston Respublikasi Konstitutsiyasi va qonunlariga, O‘zbekiston Respublikasi Oliy Majlisi palatalarining qarorlariga, O‘zbekiston Respublikasi Prezidentining farmonlari, qarorlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga, boshqa qonunchilik hujjatlariga, shuningdek, mazkur Nizomga muvofiq amalga oshiradi.

3. Jamg‘arma O‘zbekiston Respublikasi Oila va xotin-qizlar qo‘mitasida (keyingi o‘rinlarda — Qo‘mita) yuridik shaxs tashkil etmagan holda tuziladi.

4. Jamg‘arma mablag‘lari O‘zbekiston Respublikasi Iqtisodiyot va moliya vazirligi huzuridagi G‘aznachilik xizmati qo‘mitasida ochilgan Qo‘mitaning shaxsiy g‘azna hisobvarag‘ida yig‘iladi.

5. Jamg‘arma mablag‘lari Qo‘mitaning budjetdan tashqari maxsus hisobvarag‘ida jamlanadi.

2-bob. Jamg‘arma mablag‘larini shakllantirish tartibi

6. Quyidagilar Jamg‘arma mablag‘larini shakllantirish manbalari hisoblanadi:

2024-yildan boshlab har yili Davlat budjeti parametrlarida Jamg‘arma uchun 15 mlrdgacha miqdorda nazarda tutiladigan mablag‘lar;

vaqtincha bo‘sh turgan mablag‘larni tijorat banklarining depozitlariga joylashtirishdan tushadigan daromadlar;

xalqaro moliya institutlari va xorijiy tashkilotlarning grantlari;

jismoniy va yuridik shaxslarning homiylik xayriyalari;

qonunchilik hujjatlari bilan taqiqlanmagan boshqa manbalar.

7. Qo‘mita Jamg‘armaga mablag‘lar tushishining to‘liqligini nazorat qiladi.

3-bob. Jamg‘arma mablag‘laridan foydalanish tartibi

8. Jamg‘arma mablag‘lari quyidagi maqsadlarga yo‘naltiriladi:

Qo‘mitaning vazifalarini samarali amalga oshirish;

Qo‘mitaning kommunal, aloqa, qo‘riqlash xarajatlarini qoplash, avtotransport xarajatlari, ularning moddiy-texnik holatini yaxshilash, ta’mirlash hamda saqlash, shu jumladan, zarur zamonaviy uskunalar, mebel, inventarlar bilan jihozlash, avtotransport vositalari va qurilmalarini xarid qilish va ularni ta’mirlash hamda boshqa tovar-moddiy qimmatliklarni xarid qilish;

axborot-kommunikatsiya, multimedia va tarmoq qurilmalari, texnika vositalari hamda dasturiy ta’minotlarni xarid qilish, zamonaviy texnologiyalarni joriy etish va saqlash, pochta xizmatlari ma’lumotlar bazasini shakllantirish;

Qo‘mita xodimlarini tayyorlash, qayta tayyorlash va ularning malakasini oshirish;

o‘z xizmat faoliyatida yuqori natijalarga erishgan Qo‘mita xodimlarini moddiy rag‘batlantirish va ijtimoiy muhofaza qilish, shu jumladan, sanatoriy-kurort va tibbiy xizmat ko‘rsatish, yuqori kasb mahorati hamda alohida o‘rnak ko‘rsatgan Qo‘mita xodimlariga lavozim maoshining 2 baravarigacha miqdorda har oylik ustamalar belgilagan holda ularni moddiy rag‘batlantirish yoki bir yo‘la mukofotlash;

bayramlar, yubiley munosabati bilan hamda davlat nishonlari va unvonlari berilganligi munosabati bilan lavozim maoshining 1 baravarigacha miqdorda mukofot pullari berish;

O‘zbekiston Respublikasi Hukumati qarorlari bilan belgilangan ilmiy unvonlar uchun belgilangan ustamalar va boshqa turdagi ustamalarni to‘lash;

xodimlarga moddiy yordam ko‘rsatish (xodimning nikoh va farzand to‘ylarini o‘tkazish, yaqin qarindoshlarining vafot etishi, sog‘lig‘ini tiklash bilan bog‘liq holatlar);

Qo‘mita rahbar va xodimlarini xorijiy boshqaruv idoralari, ta’lim muassasalari va boshqa tashkilotlarga tajriba o‘rganish va hamkorlik o‘rnatish maqsadlarida xorijiy xizmat safariga yuborish;

O‘zbekiston Respublikasi Prezidenti va Vazirlar Mahkamasining hujjatlari va topshiriqlarida belgilangan vazifalarni amalga oshirish;

Qo‘mita tomonidan o‘tkaziladigan tadbirlarni tashkil etish bilan bog‘liq xarajatlarini qoplash;

uy-joy bilan ta’minlanmagan Qo‘mita markaziy apparati xodimlariga amaldagi sarf-xarajatlar doirasida uy-joyni ijaraga berish shartnomasiga muvofiq uy-joylarni ijaraga olganlik (ijarada turganlik) uchun belgilangan tartibda har oylik kompensatsiya to‘lash;

Qo‘mita xodimlariga ustama to‘lovlari kundalik ovqatlanish va transport xarajati uchun kompensatsiya to‘lovlari xodimga haqiqatda ishlagan davri (ish kunlari) uchun to‘lash;

xodim vafot etganda, xodimning oylik lavozim maoshining o‘n baravaridan oshmagan miqdorda bir yo‘la moddiy yordam berish. Bunda moddiy yordam turmush o‘rtog‘iga to‘lab beriladi, agar xodimning turmush o‘rtog‘i bo‘lmasa, moddiy yordam farzandlariga yoki qonuniy vakillariga (vasiylari va homiylariga) yoxud ularning voyaga yetmagan farzandlarini asrab olgan shaxslarga to‘lanadi, shuningdek, xodim turmush qurmagan bo‘lsa, moddiy yordam uning ota-onasi yoki boqimandalari o‘rtasida teng ulushlarda taqsimlanadi;

qonunchilik hujjatlariga muvofiq Qo‘mita faoliyatini rivojlantirishga yo‘naltirilgan boshqa tadbirlar.

Mazkur bandda nazarda tutilgan qo‘shimcha to‘lovlarning joriy yil uchun Jamg‘armaning daromadlar va xarajatlar smetasida tasdiqlangan parametrlardan ortib ketmasligiga Qo‘mita raisi shaxsan mas’ul hisoblanadi.

9. Jamg‘arma mablag‘lari Qo‘mita raisi tomonidan tasdiqlangan hamda belgilangan tartibda ro‘yxatdan o‘tkazilgan daromadlar va xarajatlar smetasiga muvofiq tegishli g‘azna hisobvaraqlaridan sarflanadi.

10. Jamg‘armaning daromadlar va xarajatlar smetasi kelgusi yilda moliyaviy mablag‘lar tushishining kutilayotgan prognozi va amalga oshirilishi belgilangan tadbirlarni o‘tkazishdan kelib chiqqan holda tuziladi.

11. Jamg‘armaning joriy yilda foydalanilmagan mablag‘lari O‘zbekiston Respublikasi Davlat budjetiga olib qo‘yilmaydi va ulardan keyingi yilda foydalaniladi.

12. Jamg‘arma mablag‘lari Qo‘mita raisi tomonidan boshqariladi va taqsimlanadi.

13. Jamg‘arma mablag‘laridan qonunchilik hujjatlarida taqiqlanmagan boshqa maqsadlarda Vazirlar Mahkamasining hujjatlariga muvofiq foydalanilishi mumkin.

14. Jamg‘armaning hisobot yilida foydalanilmagan mablag‘lari (qoldiq mablag‘lar) keyingi hisobot yiliga o‘tadi va mazkur Nizomda nazarda tutilgan tartibda foydalaniladi.

4-bob. Yakunlovchi qoidalar

15. Jamg‘arma mablag‘larining hisobi va hisoboti qonunchilik hujjatlarida belgilangan tartibda yuritiladi va taqdim etiladi.

16. Jamg‘arma mablag‘laridan oqilona va maqsadli foydalanish qonunchilik hujjatlarida belgilangan tartibda nazorat qilinadi.

17. Ushbu Nizom talablari buzilishida aybdor bo‘lgan shaxslar qonunchilik hujjatlariga muvofiq javob beradilar.

18. Ushbu Nizomni amalga oshirishda yuzaga keladigan nizolar qonunchilik hujjatlarida belgilangan tartibda hal qilinadi.