Зарафшон шаҳрида яна бир янги замонавий спорт майдончаси фойдаланишга топширилди.
2026-10-13 16:50:00 / Янгиликлар
Бугун Зарафшон шаҳар Қурувчи маҳалласида замонавий ворк-аут спорт майдончасининг тантанали очилиш маросими бўлиб ўтди.
Тадбирда шаҳар ҳокими ўринбосари Мавлуда Турсунова, нуронийлар, маҳалла еттилиги аъзолари, мутасаддилар, мураббийлар, спортчи ёшлар ва фуқаролар иштирок этишди. М.Турсунова сўзга чиқиб Президентимиз томонидан спортни, айниқса ёшлар спортини ривожлантиришга, аҳолимизни соғлом турмуш тарзи ва спортга жалб этиш бўйича яратиб берилаётган имкониятлар ҳақида маълумот берди ва барча тадбир иштирокчиларини ушбу спорт майдончасининг очилиши билан самимий табриклади.
Шундан сўнг, нуронийлар томонидан рамзий қизил тасма кесилиб, спорт майдончаси расман фойдаланишга топширилди.