Фарғона жамоат саломатлиги тиббиёт институти битта лойиҳа орқали йилига 1 миллион доллардан инвестиция жалб қилади
2025-02-21 11:15:00 / Янгиликлар
Фарғона жамоат саломатлиги тиббиёт институти мазкур муассаса билан биргаликда “Doctor of medicine” (терапия) мутахассислиги бўйича магистратура йўналишида қўшма таълим дастурини ишга туширди.
Шу муносабат билан ўтказилган тадбирда Фарғонага ташриф буюрган Гульф тиббиёт университети ҳамда Тумбай университети президенти Тумбай Мўйдин бошчилигидаги делегация иштирок этди.
Мулоқотда халқаро стандартларга мос кадрлар тайёрлаш, илмий соҳадаги алоқаларни кенгайтириш, таълим жараёнига энг сўнгги инновацияларни жорий этиш истиқболлари муҳокама қилинди.
Шунингдек, учрашувда Фарғона жамоат саломатлиги тиббиёт институти ректори Акмал Сидиков бу ҳамкорлик юртимизда тиббий таълим ривожи учун катта аҳамиятга эгалиги ҳамда таълим экспорти орқали 5 йил давомида йилига қўшимча 1 миллион доллардан инвестиция жалб қилиш имконияти юзага келишини қайд этди.
Таъкидланганидек, мазкур қўшма таълим дастури доирасида магистратура босқичида таълим олувчи талабалар Буюк Британиянинг “QualityAssurance Agency” ташкилоти томонидан аккредитациядан ўтказиладиган халқаро дипломга эга бўлади. Бу эса уларга дунё миқёсда тиббий фаолият билан шуғулланиш имконини беради.
Таълим жараёни инглиз тилидаги замонавий ўқув дастурлари асосида олиб борилади. Бинобарин, келгусида талабалар алмашинуви йўлга қўйилиб, қўшма илмий лойиҳалар амалга оширилиши ҳамда халқаро конференциялар ўтказилиши режалаштирилган.
Соғлиқни сақлаш вазирлиги
Матбуот хизмати.