Ўзбекистон Республикаси Соғлиқни сақлаш вазирлиги

Бирламчи тиббий-санитария муассасалари — соҳанинг юраги. Айни пайтда бу бўғинда 1264 та оилавий шифокорлик пункти, 1084 та оилавий поликлиника, 209 та кўп тармоқли марказий поликлиника ва ана шу муассасаларнинг 1957 та филиали фаолият юритмоқда.

Поёнига етаётган йилда бу йўналишда касалликлар оқибати билан эмас, кўпроқ сабаблари билан курашиладиган янгича механизмларни жорий этишга киришилди. 

Давлатимиз раҳбари топшириғига кўра, аҳолининг эҳтиёжманд қатламига юқори малакали тиббий ёрдам кўрсатишни маҳаллабай, манзилли ва мақсадли таъминлаш бўйича “Сурхондарё тажрибаси” йўлга қўйиляпти. Намунавий ҳудуд сифатида танланган Ангор туманида тиббиёт бригадалари фаолияти тубдан такомиллаштирилмоқда. 

Таҳлилларга кўра, агар бирламчи бўғинда тиббий бригадалар самарали фаолият кўрсатса, ихтисослашган тиббиёт марказлари ҳамда стационарларга мурожаатлар сони кескин камайишига эришилади. Ангорда бу амалиёт ўз самарасини бермоқда. Бунинг натижасида қисқа муддатда туман аҳолиси томонидан тез тиббий ёрдамга чақириқлар ва сурункали касалликларга чақириқлар сезиларли  камайди.

Соҳада такомиллаштирилган тиббий профилактика ва патронаж хизматини жорий қилиш тажрибаси ўзини тўлиқ оқлади. Саломатлик ва физиологик ҳолатидан келиб чиқиб, аҳоли – таянч, паст хавф, ўрта хавф, юқори хавф гуруҳларига бўлинди. 

Уларни гуруҳ мансублигидан келиб чиққан ҳолда белгиланган муддатларда тиббий кўриклардан ўтказиш ва саломатлигини даврий кузатиб бориш механизмлари амалиётга татбиқ қилинди. 

Шу ўринда яна бир муаммоли масала ечими ҳақида тўхталсак. Хўш, бирламчи тиббиёт муассасалари, айниқса, оилавий поликлиникаларда беморларни энг кўп қийнайдиган масала нима? 

Шифокор қабулига узундан узоқ навбат кутиш, албатта. Бу ҳолат, айниқса, ёш болали аёллар, ҳомиладорлар ва оғир беморларга қийинчилик туғдириши бор гап. Бу муаммога оқилона ечим топиш мақсадида бирламчи тиббий-санитария ёрдами муассасаларида автоматлаштирилган ахборот тизимини жорий этишга киришилган. 

Хусусан, Президентимизнинг тегишли қарорларига асосан бирламчи бўғинда “Электрон поликлиника” ахборот тизимининг босқичма-босқич йўлга қўйилиши соҳа ходимлари ва беморлар учун айни муддао бўлмоқда.

Тизимни рақамлаштиришдаги бундай янгиликлар мамлакатимизда давлат тиббий суғуртаси механизмлари босқичма-босқич жорий этилишида қўл келмоқда. Бунда Президентимиз томонидан шу йил 5 сентябрда имзоланган тегишли қарорга кўра:

2024 йил 1 октябрдан Тошкент шаҳри, Сирдарё вилояти ҳамда 2025 йил 1 январдан Қорақалпоғистон Республикасида давлат тиббий суғуртаси механизмларининг амалиётга татбиқ этилиши муҳим аҳамият касб этмоқда. 

Ушбу ҳужжатга мувофиқ, "Электрон поликлиника" ва "Электрон шифохона" ахборот тизимлари жорий қилинмоқда. Тиббиёт ходимлари улардан фойдаланиш йўналиши бўйича ўқитилиб, муассасалар зарур техника ва тармоқ қурилмалари билан жиҳозланяпти.

Президентимиз қўйган талаб ва вазифалар аниқ. Бунга қадамба-қадам эришиляпти. Тиббиёт халққа яқинлашмоқда. Касалликлар эса одамлардан узоқлашмоқда... Бирламчи тиббий хизматдан кутилган пировард мақсад — аслида шу! 

Соғлиқни сақлаш вазирлиги
Матбуот хизмати.