Аллергик касалликлардан қандай халос бўлиш мумкин?
2024-11-19 15:25:00 / Янгиликлар
Мутахассислар буни ноябрь ойи мавсумий аллергик касалликларни даволашни бошлаш учун энг яхши вақт эканлиги билан изоҳлайди. Чунки ўсимликлар гуллаганида аллергиядан азият чекмасалик учун беморларга айни шу даврда аллерген специфик иммунотерапия (АСИТ) усули ёрдамида муолажа олиш тавсия этилади.
— Соҳамизда янгидан-янги диагностика ва даволаш усуллари жорий этилмоқда, — дейди марказ директори, тиббиёт фанлари доктори, профессор Илмира Разикова. — Шулардан бири аллерген специфик иммунотерапия (АИСТ) деб номланади.
Ушбу муолажа турида аллергенларнинг тузли-сувли эритмаси бемор организмига кичик дозаларда титрлаб юборилади. Шундан сўнг специфик антитана миқдори камайиши, яъни аллергенга нисбатан жавоб реакцияси пасайиши кузатилади.
Натижада қондаги умумий IgE миқдори озайиб, блокловчи антитана — IgG4 кўпаяди. Шу тариқа касаллик симптомлари камайиб, ҳатто хасталик беморни умуман безовта қилмайди.
Мутахассиснинг қайд этишича, АСИТ аллергик ринит ва бронхиал астманинг енгил ҳамда ўрта шаклларидан азият чекаётган 5 ёшдан ошган болалар ва катталарни даволашга мўлжалланган. Бироқ бу усул атопик дерматит, озиқ-овқат аллергияси муолажасида самара бермайди. Иммунитетни ўзгартирмайди.
Даволаш курси — 3 йилдан 5 йилгача. Муолажалар икки — инъекция ёки сублингуал усулда амалга оширилади. Иккинчи шакл таблетка ёки томизғи дориларни ўз ичига олади. Аммо ҳар иккисининг самарадорлиги бир хил.
Даволаш жараёнини бошлаш вақти беморнинг айнан нимага аллергияси борлиги билан боғлиқ. Масалан, дарахт гулчанглари хасталик қўзғатувчиси бўлса, кеч куз, қиш мавсуми ва май ойигача бўлган давр мақбул. Инъекция шаклида муолажани йил бўйи давом эттирса бўлади.
Уй чангларига аллергияси бўлганларни даволаш ҳам касалликнинг тинч даврида бошланади. Агар аломатлар мавжуд бўлмаса, муолажаларни йил бўйи қўллаш мумкин.
И.Разикованинг таъкидлашича, айни пайтда Республика илмий ихтисослаштирилган аллергология марказида қўлланилаётган аллерген специфик иммунотерапия орқали даволаш усули юқори самара бермоқда.
Соғлиқни сақлаш вазирлиги
Матбуот хизмати.