Ўзбекистон Республикаси Соғлиқни сақлаш вазирлиги

 2-10 ёшли болаларда гельминтоз касалликлари скрининги:

Ҳудуддаги 2-10 ёшдаги болаларнинг электрон рўйхатини шакллантиради. Ушбу рўйхатдан гельминтоз касаллиги билан диспансер назоратида турганларни ажратади. Қолган болаларни скринингдан ўтказиш тармоқ режасини кунлик, ҳафталик, ойлик ва йиллик кўринишда тузади ва режа асосида болаларни скринингга таклиф қилади.

  3-18 ёшли болаларда онкогематологик касалликлар скрининги:

Ҳудуддаги 3-18 ёшлардаги болалар рўйхатини бир йилда бир марта скринингдан ўтказиш мақсадида шакллантиради, улардан онкогематологик касаллиги билан диспансер назоратида турганларни ажратади. Қолган болаларни скринингдан ўтказиш тармоқ режасини тузиб, уларни режа асосида скринингга таклиф қилади.

  40 ва ундан юқори ёшдаги аҳолида юрак-қон томир касалликлари ҳамда қандли диабет скрининги:

 Ушбу ёш тоифасидаги аҳоли рўйхатидан гипертония, юрак-ишемик касаллиги, сурункали юрак етишмовчилиги ва қандли диабет билан назоратда турганларни ажратади. Касалликларни эрта аниқлаш бўйича скринингдан ўтиши керак бўлган аҳолининг электрон рўйхатини шакллантиради ва уларни тармоқ режаси асосида скринингга чақиради.

35-55 ёшли аёлларда бачадон бўйни саратони ҳамда 45-65 ёшли аёлларда кўкрак бези саратони скрининги:

Ушбу ёш тоифасидаги аёллар рўйхати шакллантирилади, диспансер назоратида турганларни рўйхатдан ажратган ҳолда, скринингдан ўтиши лозим бўлган аҳолининг электрон рўйхатини тиббий бригада бошлиғи – оилавий шифокорга тақдим қилади. Режа асосида аҳоли контингентини текшируволди тартиб-қоидалар билан таништирган ҳолда текширувга чақиради. Хавф гуруҳларини аниқлайди, улар мавжуд бўлганда шифокоролди кўриги хонасига юборади.

Сурункали касаллиги бор беморларда сил касаллиги скрининги:

Патронаж ҳамширалари аҳоли орасида туберкулёз инфекцияси хавф гуруҳларини аниқлайди. Бунда сил касаллигининг барча турлари билан оғриган беморлар билан мулоқотда бўлган шахслар, сурункали касалликларга чалинганлар, ОИВ инфекцияси билан яшайдиган ва ижтимоий ҳимояга муҳтож шахсларга асосий эътиборни қаратади. Хавф гуруҳига мансуб аҳоли рўйхатини шакллантиради.

Флюрографиядан ўтиши зарур бўлганлар учун тармоқ режасини тузади ва уларни кўп тармоқли марказий поликлиникаларга текширув учун йўналтиради. Ҳаракатланиши чекланган шахсларнинг Республика ихтисослаштирилган фтизиатрия ва пульмонология илмий-амалий тиббиёт маркази мутахассислари билан мобиль ҳамда портатив флюгография кўрикларидан ўтказилишини таъминлайди.

Соғлиқни сақлаш вазирлиги
Матбуот хизмати