Болалар саратонига қарши кураш: 2035-йилгача мўлжалланган Миллий режа тасдиқланди
2026-10-06 17:05:00 / Янгиликлар
Албатта, ушбу глобал муаммони ҳал этиш бўйича тизимли чоралар кўрилмоқда. Президентимизнинг 2025-йил 19-майдаги "2025-2030-йилларда болалар саратонига қарши курашиш бўйича Ўзбекистон Республикаси миллий дастурини амалга ошириш чора-тадбирлари тўғрисида"ги қарори айни шу мақсадни кўзлаб қабул қилинган.
Қарор ижроси доирасида Онкологик ва гематологик касалликларга чалинган болалар ва ўсмирларга тиббий ёрдам кўрсатиш бўйича 2035-йилгача мўлжалланган Миллий режа ишлаб чиқилиб, тасдиқланди.
Ушбу ҳужжат Жаҳон соғлиқни сақлаш ташкилотининг Болалар саратонига қарши кураш глобал ташаббуси билан уйғунлаштирилди.
Миллий режага кўра, Ўзбекистонда онкологик касалликка чалинган ҳар бир болани, географик жойлашуви ва иқтисодий ҳолатидан қатъи назар, ўз вақтида ташхислаш ва унинг самарали даволаниш имкониятини таъминлаш мақсад қилинган.
Шунингдек, болалар саратонини эрта босқичларда аниқлаш ҳолатлари улушини 65 фоизгача ошириш, бундай бемор ўғил-қизларни 100 фоиз ихтисослаштирилган тиббий ёрдам билан қамраб олиш белгиланган.
Жумладан, ана шу ислоҳотлар натижасида:
болаларда онкологик ва гематологик касалликларни ерта аниқлаш тизими такомиллаштирилади;
ҳудудларда ҳам диагностика хизматлари қамрови оширилиб, замонавий лаборатория ҳамда instrumental текширувлардан фойдаланиш имконияти кенгайтирилади;
даволашнинг барча илғор усуллари, жумладан, таргет ва иммунотерапиядан фойдаланиш имкониятлари оширилади;
соҳа учун малакали тиббий кадрлар тайёрлаш ва уларнинг касбий салоҳиятини ошириш чоралари кўрилади;
болалар кансер-регистри, электрон тиббий карта ва телетиббиёт каби рақамли технологиялар жорий этилади;
паллиатив ёрдам, психологик ва ижтимоий қўллаб-қувватлаш ҳамда реабилитация хизматлари ривожлантирилади.
Умуман олганда, Миллий режа фақат даволаш жараёнини эмас, балки ерта ташхисдан тортиб, боланинг тўлиқ реабилитацияси ва одатий соғлом ҳаётга қайтишигача бўлган бутун тизимни қамраб олади.
ССВ Матбуот хизмати.