ССВ: Ўзбекистон вакили GHWP'нинг Регулятор органлари бўйича раис ўринбосари лавозимига сайланди
2025-12-05 14:10:00 / Янгиликлар
Ушбу йирик халқаро тадбирда Ўзбекистон Соғлиқни сақлаш вазирлиги ҳузуридаги Фармацевтика маҳсулотлари хавфсизлиги маркази директори Алишер Темиров ҳам иштирок этди.
Анжуманда тиббий жиҳозларни тартибга солишнинг янги глобал стандартлари, рўйхатдан ўтказиш ва сертификатлаш тартибларини такомиллаштириш, бозор назоратини самарали ташкил этиш ва техник регламентларни уйғунлаштириш каби стратегик масалалар муҳокама қилинди.
Эътиборлиси, GHWPнинг янги раҳбариятини шакллантириш жараёнида марказ директори А.Темиров мазкур ишчи гуруҳнинг Регулятор органлари бўйича раис ўринбосари лавозимига кўрсатилиб, бир овоздан маъқулланди.
Бу Ўзбекистоннинг давлатимиз раҳбари бошчилигида тиббиёт соҳасида амалга ошираётган ислоҳотлари халқаро ҳамжамият томонидан тан олинаётгани тасдиғидир.
Шунингдек, анжуманда 2026 йили бўлиб ўтадиган GHWP Техник қўмита раҳбарлари йиғилишига мезбонлик масаласи кўриб чиқилди. Мулоқот якунида ушбу нуфузли тадбирни Тошкент шаҳрида ўтказиш бўйича келишувга эришилди.
Эслатиб ўтамиз, GHWP — тиббий жиҳозларни рўйхатдан ўтказиш, хавфни баҳолаш, сертификатлаш, бозор назорати ва сифат менежменти бўйича ягона глобал ёндашувларни шакллантирувчи нуфузли платформа.
Унинг таркибига Япония, Жанубий Корея, Хитой, Сингапур, Малайзия каби 30 дан ортиқ мамлакатлар киради. Ўзбекистон 2024 йилда Куала-Лумпурда ўтказилган анжуманда ташкилотнинг тўлақонли аъзоси этиб қабул қилинган.
Соғлиқни сақлаш вазирлиги
Матбуот хизмати.