ПФ-33 ижроси: қизлар таълими, эрта турмушнинг олдини олиш бўйича ота-оналар масъулияти ва идоралараро ҳамкорлик кучайтирилмоқда

Мазкур йиғилиш Бош вазир ўринбосари — Оила ва хотин-қизлар қўмитаси раиси Зулайҳо Махкамова раҳбарлигида, республика ва вилоят масъуллари, мутасадди идора ва ташкилотлар вакиллари иштирокида ўтказилди.

Тадбирда эрта никоҳнинг ҳар қандай кўринишига барҳам бериш, никоҳ ёшига етмаган шахслар билан никоҳ муносабатларига киришиш ҳолатларининг олдини олиш, мактаб битирувчи қизларининг кейинги таълим босқичларига ёки касб-ҳунарга йўналтириш масалалари муҳокама қилинди.

Алоҳида қайд этилганидек, эрта турмуш — фақат бир оила ёки бир маҳалла доирасидаги масала эмас. Бу қиз боланинг таълими, саломатлиги, руҳий камолоти, келажаги ва жамиятдаги муносиб ўрин эгаллашига бевосита таъсир қиладиган оғир ижтимоий муаммодир. Шу боис бундай ҳолатларга нисбатан бефарқлик, ҳар бир хавф омили ўз вақтида аниқланиб, манзилли чоралар кўрилиши зарурлиги таъкидланди.

Йиғилишда хавф гуруҳидаги оилалар билан ишлаш, фарзанд тақдири ва келажагига ота-оналарнинг шахсий масъулиятини кучайтириш, оилаларда соғлом маънавий муҳитни мустаҳкамлаш ҳамда маиший зўравонликка нисбатан муросасизлик кайфиятини шакллантириш бўйича вазифалар белгилаб олинди.

Шунингдек, мураккаб оилавий шароитда вояга етаётган, ижтимоий-ҳуқуқий ҳимояга эҳтиёжи юқори бўлган қизларнинг хавфсизлигини таъминлаш, уларни тазйиқ ва зўравонликдан ҳимоя қилиш, бундай хавф омилларини барвақт аниқлаш ва олдини олиш механизмларини кучайтириш масаласига алоҳида эътибор қаратилди.

Муҳокама давомида Чироқчи, Кўкдала ва Косон туманларида эрта никоҳ ҳолатлари билан боғлиқ вазиятни барқарорлаштириш юзасидан ҳудудий масъулларга тезкор ва кечиктириб бўлмайдиган чоралар кўриш вазифаси юклатилди.

Шу билан бирга, маҳалла, таълим, соғлиқни сақлаш, ички ишлар, адлия, ФҲДЁ, ижтимоий ҳимоя, диний соҳа вакиллари ҳамда оила ва хотин-қизлар тизими ўртасида ахборот алмашинуви, мувофиқлаштирилган ҳаракат ва натижадорликни кучайтириш зарурлиги таъкидланди.

Йиғилишда ота-оналар, кенг жамоатчилик вакиллари ва халқимизга қаратилган, эрта турмушнинг олдини олиш ҳамда фарзандлар келажаги олдидаги масъулиятни оширишга даъват этувчи Идоралараро мурожаат келишиб олинди.

Мазкур йиғилиш ПФ-33-сон Фармонда белгиланган вазифаларнинг жойлардаги ижросини кучайтириш, қизларнинг таълими, соғлиғи, шаъни ва хавфсизлигини ҳимоя қилиш ҳамда жамиятда соғлом, масъулиятли ва зўравонликдан холи оилавий муҳитни қарор топтиришга қаратилди.