Сентябр ойида юртимиз бўйлаб 500 дан ортиқ маданий тадбирлар ўтказилади
2025-08-19 13:45:00 / Янгиликлар
Жорий йилнинг сентябрь ойида мамлакатимизнинг барча ҳудудларида жами 300 дан ортиқ концерт дастурлари, 100 да зиёд спектакллар ва 200 дан ортиқ турли маданий тадбирлар ўтказилиши режалаштирилган. Улар орасида Ўзбекистон Миллий симфоник оркестри иштирокидаги концерт дастурлари, маданият кунлари, театр томошалари, мақом кечалари, гала концертлар ҳамда ҳудудлардаги маданият ва истироҳат боғларида ўтказилиши режалаштирилган кўнгилочар тадбирлар ўрин олган.
Маълумки, Ўзбекистон Республикаси Президентининг 2024 йил 22 ноябрдаги “Ўзбекистон Миллий симфоник оркестри фаолиятини қўллаб-қувватлаш ҳамда миллий ва жаҳон мумтоз мусиқа санъатидан аҳолини янада кенгроқ баҳраманд этиш чора-тадбирлари тўғрисида”ги 401 сон қарори қабул қилинган.
Ушбу қарор мамлакатимизда миллий ва жаҳон мумтоз мусиқа санъати асарларини янада оммалаштириш ҳамда оркестр ижрочилигини ривожлантириш, соҳа вакилларининг касб маҳоратини ошириш, ушбу йўналишда иқтидорли ёшлар учун зарур шарт-шароитлар ва имкониятлар яратиш, мусиқа ижрочилари ва оркестр жамоалари ходимларини моддий жиҳатдан қўллаб-қувватлашни янада кенгайтириш мақсадида ҳар ойнинг 20-санасига қадар давлат бошқаруви органлари, муассасалар, корхоналар ва хўжалик жамиятларини, шунингдек, аҳолини келгуси ойда ташкил этиладиган оммавий-маданий ва концерт-томоша тадбирлари дастурлари, шу жумладан, Ўзбекистон Миллий симфоник оркестри жамоасининг концерт дастурлари тўғрисида хабардор қилиб бориш назарда тутилган.
Шу муносабат билан Маданий мерос агентлигининг расмий веб-сайтига ушбу кенг тадбирлар дастури жойлаштирилди. Эслатиб ўтамиз, Тошкент шаҳридаги тадбирлар ва ҳудудларидаги театрларга кириш пуллик бўлиб, қолган тадбирлар бепул этиб белгиланган. Тадбирларнинг куни, жойи ва вақти ўзгариши мумкин. Барчангизни маданият ва санъат кечаларига таклиф этамиз!