Ҳукумат томонидан маданий мерос соҳасига оид маъмурий регламентлар тасдиқланди
2025-08-15 12:25:00 / Янгиликлар
Ўзбекистон Республикаси Вазирлар Маҳкамаси 2025 йил 13 август куни “Маданий мерос соҳасига оид маъмурий регламентларни тасдиқлаш тўғрисида”ги 512 сонли қарорни қабул қилди. Қарор давлат раҳбарининг 2024 йил 24 майдаги “Маъмурий ислоҳотлар доирасида адлия органлари ва муассасаларининг масъулиятини янада ошириш ҳамда ихчам бошқарув тизимини шакллантириш тўғрисида”ги 80-сон фармон ижросини таъминлаш мақсадида ишлаб чиқилган.
Қарорга кўра, Ягона интерактив давлат хизматлари портали орқали миллий музей фондидаги экспонатлар ва тўпламлар давлат каталогида қайд этилганлиги тўғрисида гувоҳнома бериш, археология ашёлари давлат каталогига киритилган ёки киритилмаганлиги ҳақидаги маълумотлар бериш, моддий маданий мерос объектларини давлат кадастрига киритиш ва ундан чиқариш бўйича хизматлар кўрсатиш тартиби жорий этилди. Шунингдек, қарорда Маданий мерос агентлиги Рақамли технологиялар вазирлиги ҳамда Адлия вазирлиги билан ҳамкорликда икки ой муддатда регламентларни электрон хизматлар орқали ишга тушириш назарда тутилган.
Бундан ташқари, 2002-йил 29-июльдаги “Маданий мерос объектларини муҳофаза қилиш ва улардан фойдаланишни янада такомиллаштириш чора-тадбирлари тўғрисида”ги 269-сон қарорга ўзгартиришлар киритилиб, маданий мерос объектларини ҳисобга олиш ва улардан фойдаланиш тартиби такомиллаштирилади.
Қабул қилинган янги қарорнинг тўлиқ матни билан Ўзбекистон Республикаси Қонунчилик маълумотлари миллий базаси орқали танишиб чиқишингиз мумкин. Қабул қилинган тартиб-таомиллар маданий мерос ашё ва масканларини оқилона бошқариш, музейлар фаолиятини янада такомиллаштириш ҳамда бу борада давлат хизматларини кўрсатиш жараёнини рақамлаштиришга хизмат қилади.