Илмий-эксперт кенгашининг навбатдаги йиғилиши Наманган шаҳрида бўлиб ўтади
2025-07-14 13:40:00 / Янгиликлар
2025-йил 15–17 июл кунлари Маданий мерос агентлиги ҳузуридаги Илмий-эксперт кенгашининг навбатдаги сайёр йиғилиши Наманган вилоятида бўлиб ўтади. Йиғилиш кун тартибига Ўзбекистоннинг бир қатор ҳудудларида жойлашган маданий мерос объектларида реставрация, ободонлаштириш, жорий ва мукаммал таъмирлаш ҳамда янги бинолар қурилиши юзасидан жами 67 та лойиҳа кўриб чиқилиши режалаштирилган.
Кенгаш кун тартибидан Жиззах вилоятида жойлашган “Малик Аждар” зиёратгоҳида ободонлаштириш, қўшимча бинолар қуриш лойиҳаси ва Тошкент вилоятининг Бўстонлиқ туманида жойлашган “Ансор бобо”, “Жауджуректепа” ва “Кайгактепа” археология ёдгорликларининг туташ қисмидан автомобил йўли қуриш бўйича таклиф лойиҳалари ўрин олган. Шунингдек, Кенгаш Тошкент шаҳрида жойлашган “Ўзсаноатқурилишбанк”нинг Мирзо Улуғбек тумани бўлими биносининг ички ва ташқи фасад қисмларини асл ҳолати ва рангини сақлаган ҳолда жорий таъмирлаш ва “Сергей Есенин” уй-музейини мукаммал таъмирлаш лойиҳаларини кўриб чиқади. Илмий-эксперт кенгаши кун тартибидаги масалалар билан Маданий мерос агентлигининг расмий сайтида танишиб чиқиш мумкин.
Маълумот учун, 2024 йилнинг 20 май куни Вазирлар Маҳкамасининг "Ўзбекистон Республикаси Маданий мерос агентлигининг Илмий-эксперт кенгаши фаолиятини янада такомиллаштириш чора-тадбирлари тўғрисида"ги қарори қабул қилинган. Қарорга мувофиқ Кенгаш зиммасига моддий маданий мероснинг кўчмас мулк объектларини асрашга доир ишларнинг лойиҳаолди ва лойиҳа-смета ҳужжатлари, уларда режалаштирилган асрашга доир ишларни объектнинг тарихий-маданий аҳамияти ҳамда ноёблигига путур етказмаган ҳолда технология ва материалларнинг қўлланилиши бўйича тегишли хулоса беришга доир қатор вазифалар белгиланган.