Ғафур Ғулом ва Ойбек уй-музейларида мукаммал таъмирлаш ишлари олиб борилади
2025-07-04 13:55:00 / Янгиликлар
Хабарингиз бор, жорий йилнинг 26-июн куни Маданий мерос агентлиги ҳузуридаги Илмий-эксперт кенгашининг навбатдан ташқари йиғилиши Тошкент шаҳрида бўлиб ўтган эди. Ушбу мажлисда Кенгаш аъзолари томонидан 9 та долзарб лойиҳа бўйича якуний хулосалар берилди. Лойиҳалар Тошкент шаҳри ва Бухоро вилоятига тааллуқли бўлиб, Кенгаш томонидан айрим масалалар маъқулланди.
Жумладан, Тошкент шаҳрида жойлашган Ғафур Ғулом ва Ойбек уй-музейларининг биноларини мукаммал таъмирлаш ва биноларда муҳандислик коммуникация ишларини олиб бориш лойиҳалари маъқулланди. Ундан ташқари, Бухоро вилоятининг “Эски шаҳар” қисмида жойлашган “Пассаж-1” маданий мерос объектини музейлаштириш лойиҳаси тарихий ёдгорликка зиён етказмаслик шарти билан тасдиқланди.
Шунингдек, Бухоро шаҳрида жойлашган “Қадимий ҳовли” (Ҳовли Поён) маданий мерос объектини Бухоро шаҳридаги Жадидлар мероси давлат музейига мослаштириш, реставрация қилиш ишлари бўйича лойиҳаси Кенгаш аъзолари томонидан жойига чиққан ҳолда ўрганилиб якуний хулоса берилиши тавсия этилди.
Юқоридаги лойиҳалар тавфсилотлари билан Агентликнинг расмий веб-сайтида танишишингиз мумкин.