#расмий_муносабат
2026-06-01 18:50:00 / Янгиликлар
Ижтимоий тармоқларда Зурмала ступасида олиб борилаётган консерватсия асраш ишлари юзасидан билдирилаётган фикрлар муносабати билан қуйидагиларни маълум қиламиз.
Зурмала ступасидаги барча ишлар тасдиқланган лойиҳа-смета ҳужжатлари асосида амалга оширилмоқда. Лойиҳа Маданий мерос агентлиги Илмий-эксперт кенгаши томонидан маъқулланган.
Археолог Тухташ Аннаев раҳбарлигида олиб борилган қазишмалар давомида ступанинг платформа қисми ўрганилган.Тадқиқотлар жараёнида ёдгорликнинг тарихий ўзаги ва асосий конструктив қисмларига зарар етказилмаган.
Қазишма ишлари якунлангач, очилган қисмларни сақлаш мақсадида лойиҳа асосида консерватсия ишлари бажарилган. Ёдгорликнинг айрим қисмлари асл ҳолатда очиқ қолдирилган, қолган қисмлари эса табиий емирилишлардан ҳимоя қилиш учун махсус лой сувоқ билан қопланган.
Ёдгорлик атрофида ўрнатилган металл белбоғлар вақтинчалик муҳофаза чораси бўлиб, кучли шамол ва ёғингарчиликлар таъсирида юзага келиши мумкин бўлган хавфларнинг олдини олиш учун ўрнатилган. Ушбу ечим ҳам Илмий-эксперт кенгаши томонидан маъқулланган. Ҳозирда обектда консерватсия асраш ишлари якунланмаган бўлиб, белгиланган режа асосида давом эттирилмоқда.
Ёдгорликнинг техник ҳолати Маданий мерос агентлигининг Сурхондарё вилояти бошқармаси томонидан доимий мониторинг қилиб борилаётганлигини маълум қиламиз.