Маданий бойликларни ноқонуний олиб чиқишга уринишлар тўхтатилди
2026-05-26 12:10:00 / Янгиликлар
Жорий йилнинг апрель–май ойларида Маданий мерос агентлиги ҳамда Давлат божхона қўмитаси билан ҳамкорликда республиканинг чегара божхона постларида маданий бойликларни ноқонуний равишда олиб чиқишга бўлган бир қатор уринишлар аниқланиб, белгиланган тартибда бартараф этилди.
Хусусан, 2026 йил 26 апрель куни Бухоро шаҳридаги “Бухоро аэропорти” чегара божхона постида “Бухоро–Истанбул” авиарейси орқали учиб кетаётган АҚШ фуқароси божхона назоратидан ўтказилганда унинг юклари орасидан оғзаки сўровда маълум қилинмаган 1 дона ёғоч муҳр ва 2 дона фотоаппарат аниқланган.
Шунингдек, жорий йилнинг 14 май куни Тошкент шаҳридаги “Келес” темир йўл чегара божхона постида “Тошкент–Москва” йўналишидаги поезд йўловчисининг юклари орасидан 1 дона чойнак ва 2 дона қадимий лаган топилган. Бундан ташқари, 2026 йил 8 май куни “Тошкент–Алмата” йўналишидаги поездда ҳаракатланган Россия Федерацияси фуқаросининг юклари орасидан 3 дона ликобча ва 1 дона гулдон аниқланиб, экспертизага юборилган.
Тўхтатиб қолинган ашёлар Маданий мерос агентлиги Бадиий экспертиза бошқармаси мутахассислари томонидан экспертизадан ўтказилиб, уларнинг маданий бойликларга тааллуқли экани ҳамда тарихий аҳамиятга эгалиги аниқланган. Экспертиза хулосаларига кўра, аниқланган буюмларнинг бир қисми XIX асрга оид бўлиб, айримлари асрда (1950–1983 йилларида) ишлаб чиқарилганлиги аниқланди.
Маълумот учун, “Маданий бойликларнинг олиб чиқилиши ва олиб кирилиши тўғрисида”ги Қонуннинг 8-моддасига мувофиқ мазкур маданий бойликларни Ўзбекистон Республикасидан олиб чиқиш тақиқланади.