Маданий бойликларнинг ноқонуний олиб чиқилишига чек қўйилди
2026-05-21 12:10:00 / Янгиликлар
2026 йил 23 апрель куни Тошкент шаҳар Ислом Каримов номидаги “Тошкент-Аэро” ихтисослаштирилган чегара божхона постида маданий бойликларни ноқонуний олиб чиқишга уриниш ҳолати аниқланган. “Тошкент–Баку” рейси орқали учиб кетаётган Ўзбекистон Республикаси фуқароси божхона назоратидан ўтказилган вақтида унинг қўл юклари орасидан оғзаки сўровда маълум қилинмаган 24 дона тилла тангалар топилган.
Ушбу ашёларнинг тарихий ва маданий қийматини аниқлаш мақсадида улар белгиланган тартибда Маданий мерос агентлиги Бадиий экспертиза бошқармаси мутахассислари томонидан экспертизадан ўтказилган. Экспертиза хулосасига кўра, ушбу 24 дона тилла тангалар Вазирлар Маҳкамасининг 1999 йил 23 мартдаги 131-сон қарори билан тасдиқланган Низом талабларига мувофиқ маданий бойликлар тоифасига кириши ҳамда тарихий аҳамиятга эга эканлиги аниқланди.
Шунингдек, тангаларнинг 1897–1911 йилларда зарб этилгани ва уларнинг тахминий қиймати 219 миллион сўмни ташкил қилиши маълум бўлди. Мутахассислар томонидан ашёвий далилларни Ўзбекистон Республикаси Марказий банки ҳузуридаги Қимматбаҳо металлар агентлигига топшириш тавсия этилди.
Маълумот учун, “Маданий бойликларнинг олиб чиқилиши ва олиб кирилиши тўғрисида”ги Қонуннинг 8-моддасига мувофиқ мазкур маданий бойликларни Ўзбекистон Республикасидан олиб чиқиш тақиқланади.