Хива шаҳрида фуқаролар мурожаатлари юзасидан сайёр йиғилиш ўтказилди
2026-02-20 14:50:00 / Янгиликлар
2026 йил 17 февраль куни Хива шаҳрида Маданий мерос агентлиги директорининг биринчи ўринбосари Турсунали Кузиев иштирокида жисмоний ва юридик шахслар мурожаатларини кўриб чиқиш мақсадида сайёр йиғилиш ташкил этилди. Тадбирда Хоразм вилояти Маданий мерос бошқармаси директори Фурқат Мадиримов, “Ичан-Қалъа” давлат музей-қўриқхонаси раҳбарияти, Агентлик масъул ходимлари ҳамда сурдотаржимон иштирок этди.
Сайёр йиғилиш аввалида Турсунали Кузиев ўз чиқишида фуқаролар ва юридик шахсларнинг мурожаатларини кўриб чиқиш масаласи Маданий мерос агентлиги фаолиятининг устувор йўналишларидан бири эканлигини таъкидлади. Шунингдек, барча мурожаатлар амалдаги қонунчилик талабларига мувофиқ, белгиланган тартиб ва муддатларда кўриб чиқилиб, улар юзасидан тегишли чоралар кўрилишини маълум қилди.
Йиғилиш давомида фуқаролар томонидан қуйидаги масалалар кўтарилди:
- музей-қўриқхона ҳудудида ижара шартномасиз фаолият юритаётган тадбиркорлар фаолиятини тартибга солиш;
- маданий мерос объектларининг кичик таъмирталаб қисмларини музей томонидан таъмирлашга рухсат бериш;
- авария ҳолатига келган турар жойни қайта қуриш бўйича амалий кўмак кўрсатиш;
- музей-қўриқхона маъмурияти ва фонди учун замонавий бино қуриш мақсадида ер майдони ажратиш;
- туризм йўналишида тарғибот материаллари, илмий тўпламлар ва фотоальбомларни нашр этиш учун музей ҳудудида босмахона ташкил этиш.
Йиғилиш якунида барча мурожаатлар маълумот сифатида қабул қилиниб, тегишли бошқарма ва бўлим раҳбарларига уларни белгиланган тартибда кўриб чиқиш ва ижросини таъминлаш бўйича аниқ топшириқлар берилди.
Мазкур сайёр йиғилиш фуқаролар мурожаатлари билан ишлаш тизимини янада такомиллаштириш, маданий мерос объектларини асраш ва ривожлантириш бўйича ишларни самарали ташкил этишга хизмат қилади.