Ўзбекистон Республикаси Маданий мерос агентлиги

Жорий йилнинг 13 январь куни Олимпия ва Паралимпия шон-шуҳрати музейида Маданий мерос агентлиги томонидан 2025 йилда музейлар соҳасида амалга оширилган ишлар сарҳисобига бағишланган “Замонавий музейшунослик ва Янги Ўзбекистон музейлари: назария, амалиёт, истиқболлар” мавзусида республика семинари бўлиб ўтди. Унда Маданий мерос агентлиги директорининг биринчи ўринбосари Турсунали Кузиев, республиканинг йирик давлат музейлари, музей-қўриқхоналари ва уй-музейлари раҳбарлари ҳамда соҳа мутахассислари иштирок этди.

Семинар аввалида 2025 йилда музейлар соҳасида амалга оширилган ишлар юзасидан маъруза тингланди. Ҳисобот даврида Агентлик тизимидаги давлат музейлари томонидан жами 4 153 та тадбир ташкил этилган бўлиб, улардан 228 таси илмий-амалий анжуман ва семинар, 1 982 таси маданий-маърифий тадбир, 469 таси кўргазма, 193 таси кўчма кўргазма, 770 таси маҳорат дарси ҳамда 511 таси театрлаштирилган саҳна намойишларидан иборат бўлди.

Маълумотларга кўра, 2025 йил давомида музейларга 6 102 227 нафар маҳаллий ва хорижий сайёҳ ташриф буюрди ҳамда ушбу кўрсаткич ўтган йилга нисбатан 12,5 фоизга ошди. Шу билан бирга, давлат музейларида электрон идентификация қилинадиган музей ашёлари ва тўпламлар сони 500 минг донага етказилди ҳамда 100 нафар музей раҳбар ва ходимларининг малакаси  оширилди. Семинар давомида Ўзбекистон Республикаси Президенти Шавкат Мирзиёевнинг 2025 йил 26 декабрь куни Олий Мажлис ва Ўзбекистон халқига йўллаган Мурожаатномасида белгиланган устувор йўналишлардан келиб чиқиб, 2026–2030 йилларга мўлжалланган истиқболли режалар муҳокама қилинди. Хусусан, экспозицияларни замонавий талаблар асосида такомиллаштириш, инклюзив музей муҳитини шакллантириш ҳамда мультимедиа воситаларидан фойдаланиш орқали ташриф буюрувчилар учун интерфаол имкониятларни кенгайтириш масалаларига эътибор қаратилди. Музей ходимларининг илмий салоҳиятини ошириш, уларни замон талабларига мос рақобатбардош кадрлар сифатида тайёрлаш, маҳорат дарслари, тематик ва кўчма кўргазмалар ҳамда очиқ мулоқотлар орқали, айниқса, ёшлар орасида миллий меросга бўлган қизиқишни кучайтириш вазифалари белгилаб олинди.Тадбир доирасида семинар иштирокчилари учун Тошкент шаҳридаги қатор музейларга ташрифлар ташкил этилди, жумладан, Ўзбекистон тарихи давлат музейи, Давлат геология музейи ҳамда Ўзбекистондаги Ислом цивилизацияси марказининг янги экспозициялари билан танишилди.