Юксак мукофот соҳиблари. Эл дуосин олган капитан
2024-09-16 10:50:00 / Янгиликлар
Профилактика катта инспектори Ғолиб Каримов ярим кечаси жиринглаган телефонни кўтариши билан аёлнинг йиғи аралаш овози эшитилди: «Собир акангиз яна ичиб келибди, жанжал қиляпти». Капитан зудлик билан низо юз берган хонадонга етиб борди. Яхшики, ҳеч кимга азият етмабди. Шундай бўлсада, турмуш ўртоғи, болалари ҳамда қўшниларни безовта қилаётган эркакни автоуловига чиқариб, ҳушёрхонага етказди.
Капитан хизмат уйи томон йўл оларкан, бир неча кишининг ташвишини аритганидан мамнун эди. Аммо Собир аканинг ўнгланмаётгани, ичмасликка ваъда бериб, сўзида турмаганлиги дилини хира қилди. Эртага маҳалла фуқаролар йиғинида ўтадиган йиғилишда шу масалани кўтаради, балки мажбурий даволатиш чораларини кўрар…
Профилактика катта инспектори, капитан Ғолиб Каримов шу тарзда Шароф Рашидов туманининг «Раваллиғ» маҳалласида истиқомат қилувчи 6 нафар оилавий жанжалкаш, 12 та низоли оила вакиллари, 11 нафар ичкиликка ружу қўйган шахс билан профилактик тадбирларни амалга оширади. Худди шундай, қонунбузарликларнинг олдини олиш мақсадида муқаддам судланган, пробация, ички ишлар органларида профилактик ҳисобда турган ва маъмурий назорат остига олинган шахслар билан тез-тез мулоқот қилиб туради.
Шу ўринда таъкидлаш керак, ҳалол, босиқ, доимо қонуний йўл тутадиган капитанни маҳалла аҳли ҳурмат қилади, қўллаб-қувватлайди. Айниқса, фуқаролар йиғини раиси, ички ишлар органлари фахрийси Убайдулла Хидиров билан ҳамкорлик ўз самарасини бермасдан қолмади. Чунончи, маҳаллада жорий йилнинг ўтган даврида бирорта ҳам жиноят қайд этилмади.
Ўрни келганда айтиш жоиз, Самарқанд вилояти Ургут тумани «Қуйи тегана» маҳалласида туғилиб ўсган Ғолиб Каримов Жиззах политехника институтини тамомлаган. Ҳарбий хизматдан қайтгач, 2007 йили ИИВ Академияси Сержантлар таркибини тайёрлаш олий курсларида таълим олди ва шу йили Жиззах вилояти ИИБ ЙҲХБ алоҳида ЙПХ отряди учинчи сафарбарлик гуруҳи ЙПХ катта инспектори лавозимига тайинланди. 2013-2017 йилларда вилоят ИИБ тизимида, 2017 йилдан бери профилактика инспектори лавозимида эл осойишталигини асраяпти.
Вазирликнинг олий ўқув юртига киришга имтиёз берувчи тавсияномаси асосида ўғли Жавоҳир Толибов ҳозирда Тошкент давлат иқтисодиёт университетининг 3-босқичида таълим олмоқда.
Бу йил истиқлол байрами арафасида Ғолиб Каримовнинг ҳаётида яна бир қувончли воқеа рўй берди. У давлатимиз раҳбарининг фармонига биноан, «Шуҳрат» медали билан тақдирланди.
Камтарона хизматларим юксак даражада эътироф этилгани учун Юртбошимиздан, вазирлик раҳбариятидан миннатдорман, дейди қаҳрамонимиз. Бу эътирофдан қўшимча куч ва ғайрат олиб, жиноятчилик ва ҳуқуқбузарликларни жиловлашда янада самарали хизмат қилишга ҳаракат қиламан.
Алижон Абдусатторов, ўз мухбиримиз. «Постда»
Жиззах вилояти