Юксак мукофот соҳиблари. Ҳалол хизмат қилиб
2024-09-13 12:45:00 / Янгиликлар
Давлатобод тумани ИИБ ЖХХ Жамоат тартибини сақлаш бўлинмаси патруль-пост хизмати отряди бўлинма командири, сафдор Сайдуллохон Эшонхонов мустақиллигимизнинг 33 йиллиги арафасида Президент фармонига кўра, «Содиқ хизматлари учун» медали билан тақдирланди.
Чин дилдан қилинган хизмат бесамар кетмаслигини, айниқса, меҳнатлар роҳатга айланишини шу онларда яна бир бор ҳис қилдим, дейди қаҳрамонимиз. Зеро, бундай эътибор ва рағбат одамга куч беради. Ҳаётда армонсиз яшаб бўлмас эканда, менинг шу кунларга етишишимга сабабчи бўлган раҳматли отам ва онам бу мукофотни ўзгача қарши олган бўлардилар.
Сайдуллохон 1977 йилда Янгиқўрғон туманининг Исковот қишлоғида таваллуд топган. 2005 йилда ички ишлар органлари сафига қабул қилинган. Спортга ошно бўлган С. Эшонхонов қўл жанги билан мунтазам шуғулланди. Бир неча бор вилоят ИИБ ходимлари ўртасида ўтказилган мусобақаларда иштирок этиб, фахрли ўринларни қўлга киритди.
Жорий йилда ўтказилган профилактик тадбирлар давомида 168 нафар ҳуқуқбузарлик содир этган шахсни аниқлаб, тегишли чоралар кўрилишини таъминлаган С. Эшонхонов 468 нафар фуқаро билан профилактик суҳбатлар олиб борди. Шунингдек, 2 та ўғрилик жиноятини фош этган, 1 нафар бедарак йўқолган шахснинг яшаш манзилига қайтарилишига эришган. Март ойида муқаддам содир этган жинояти учун қидирувда бўлган фуқаронинг яширинган жойини аниқлаб, қўлга олишга эришган.
Юртимиз ва фуқароларимиз тинчлик-осойишталиги йўлидаги камтарона хизматларим муносиб эътироф этилганидан беҳад мамнунман, дейди лавҳамиз қаҳрамони.
Бунинг учун Президентимиз ҳамда вазирлик раҳбариятига миннатдорлик билдираман.
Дарҳақиқат, касбини эъзозлаган кам бўлмайди. Орзуга эришмоқ учун чин дилдан қилинган тилак ва ҳалол хизмат муҳим эканини Сайдуллохон сингари фидойи ходимлар тимсолида кўриш мумкин.
Гулчеҳра Бувамирзаева, ўз мухбиримиз. «Постда»
Наманган вилояти