ИИВ Тезкор-қидирув департаменти томонидан ҳамкорликда ўтказилган тадбирда Тошкент шаҳри ҳудудида синтетик гиёҳвандлик воситасини тарқатиш билан шуғулланиб келган шахс қўлга олинди
2024-09-12 15:00:00 / Янгиликлар
Айни вақтда Пойтахтимиз ҳудудида ёшлар орасида гиёҳвандлик воситалари, психотроп моддалар ва кучли таъсир қилувчи дори воситалари ноқонуний муомаласига қарши курашиш ҳамда уларни олдини олиш борасида тизимли профилактик-тарғибот ва тезкор-қидирув тадбирлари олиб борилмоқда.
ИИВ Тезкор қидирув департаменти, Тошкент шаҳар ИИББ ҳамда ДХХ томонидан ҳамкорликда олдиндан тезкор ишловга олинган, 2001 йилда туғилган шахснинг вақтинча яшаб келаётган Яккасарой туманидаги хонадони кўздан кечирилди.
Уйнинг меҳмонхонаси, ётоқхонаси ва ошхонасининг турли жойларида жами 500 грамм синтетик гиёҳвандлик воситаси, электрон тарози, гиёҳвандлик воситаси излари билан шиша идишлар, изоляция лентаси, зип пакетлар, ашёвий далил сифатида олинди.
Техник текширувлар давомида қўлга олинган шахс «Телеграм» мессенжеридаги интернет дўконида «кладмен» лавозимида ишлаши куратори топшириғига асосан тахминан 1 кг вазндаги синтетик гиёҳвандлик воситаларини кўмилган жойдан олиб, бир маротабалик истеъмол дозаларига қадоқлаб, сўнг «закладка» усулида тарқатиб келаётганлиги аниқланди. У мазкур моддаларни тарқатишда Тошкент шаҳрининг бир нечта ҳудудларида аҳоли яшаш жойлари атрофида чизган гиёҳвандлик воситаларига олиб борувчи манзил наркографитти ҳаволалари йўқ қилинди.
Ўтказилган тезкор-қидирув тадбирлари натижасида ноқонуний муомаладан чакана нархи 600 млн сўмга тенг 500 грамм синтетик гиёҳвандлик воситалари олиниб, тезкор-қидирув тадбирлари давом эттирилмоқда.
ИИВ Тезкор-қидирув департаменти