Фарғона шаҳридаги ҳарбий қисмда "Жасорат мактаби" учун ўқув бино ва ётоқхона ҳамда “Фарғона” дала-ўқув майдони ҳудудида ҳарбий хизматчилар учун янги ошхона фойдаланишга топширилди
2025-04-04 19:30:00 / Янгиликлар
Тадбирда сўз олган вилоят ҳокими Қуролли кучлар тизимида амалга оширилаётган ислоҳотлар, ҳарбий-маъмурий сектор фаолияти ҳақида сўз юритиб, бугунги кунда ёшларни ҳарбий- ватанпарварлик руҳида тарбиялаш муҳим вазифа эканлигини, бунда армия муҳим ўрин тутишлигини билдирди. "Жасорат мактаби" ҳарбий-ўқув йиғинида иштирок этадиган ёшлар учун яратилган шароитлар уларни ҳар томонлама чиниқтиришга, ҳаётни ўргатишга хизмат қилишини таъкидлади.
- Бу ерда бўлиб, армияни ўз кўзи билан кўрган ҳар бир ёшда албатта, ватанга, оилага бўлган меҳр пайдо бўлади, - деди вилоят раҳбари.
Мазкур объектда “Grand global gigant servis” МЧЖ томонидан мукаммал таъмирлаш ишлари бажарилиб, бунинг учун 1 млрд 675 млн. сўм маблағ йўналтирилди. Биринчи қаватда 100 ўринга мўлжалланган ўқув синфлари, иккинчи қаватда эса аскарлар учун ётоқхона ва маиший хизмат кўрсатиш хонаси ташкил этилди.
Шарқий ҳарбий округ қўшинларининг “Фарғона” дала-ўқув майдони ҳудудида замон талаблари даражасида қурилган янги ошхона ҳарбий хизматчилар учун муносиб туҳфа бўлди. Тадбирда сўзга чиққанлар томонидан бу алоҳида эътироф этилди.
“Тараққиёт қурилиш монтаж” МЧЖ томонидан 2 млрд 179 млн. сўм маблағ ҳисобига мукаммал таъмирлаш, ҳудудни ободонлаштириш ишлари амалга оширилди.
Ошхонада озиқ-овқат маҳсулотларини сақлаш ва ишлов беришга мўлжалланган алоҳида хоналар ташкил этилиб, замонавий технологик жиҳозлар билан таъминланди. Озода ва шинам маскан ҳарбий қисмда хизмат қилаётган ҳарбийлар учун нафақат қулайлик, балки уларга руҳий-маънавий кўтаринкилик улашишда ҳам муҳим аҳамият касб этади.
Рамзий лента қирқилиб, тадбир иштирокчилари ҳарбийлар учун яратилган шарт-шароитлар билан яқиндан танишдилар. Дуолар қилиниб, юртга тинчлик, элга фаровонлик тиладилар.