Фарғона вилояти ҳокимлиги

Очиқ ва самимий руҳда ўтган мулоқотда вилоят раҳбари ҳар бир даврнинг ўз талаблари, масъулият ва вазифаси борлигини алоҳида таъкидлади. Бугунги шиддат билан ўзгараётган замонда ёшлардан, аввало, билимли, изланувчан, ташаббускор ва ўз касбининг моҳир устаси бўлиш талаб этилаётганига эътибор қаратди.
Айниқса, хорижий тилларни пухта ўрганиш, замонавий касб-ҳунарларни эгаллаш, ўз устида тинимсиз ишлаш ҳар бир ёш учун катта имкониятлар эшигини очиши қайд этилди.
— Касб-ҳунар эгаллаган инсон ҳеч қачон кам бўлмайди. Ҳаётда ўз ўрнингизни топишни, эртага яхши яшашни, ота-онангизга муносиб фарзанд бўлишни истасангиз, бугун астойдил ўқишингиз, илм олишингиз, меҳнат қилишингиз керак. Ҳеч бир ютуқ ўз-ўзидан келмайди. Инсон орзуларига фақат ўзининг интилиши, ҳаракати ва ҳалол меҳнати билан эришади. Вақтингизни беҳуда ўтказманг. Бугунги ҳар бир кунингиз, ҳар бир самарали вақтингиз келажагингиз учун мустаҳкам пойдевор бўлсин, — дея таъкидлади вилоят ҳокими.
Мулоқот давомида ёшлик инсон ҳаётидаги энг бебаҳо давр экани, айнан шу йилларда олинган билим, эгалланган ҳунар ва шаклланган интилишлар бутун умрга хизмат қилиши алоҳида қайд этилди. Шунингдек, ёшлар мамлакатимизнинг энг катта бойлиги, эртанги тараққиётимизнинг ҳал қилувчи кучи экани таъкидланди. Шу боис юртимизда уларнинг сифатли таълим олиши, касб эгаллаши, хорижий тилларни ўрганиши ва ўз иқтидорини рўёбга чиқариши учун кенг имкониятлар яратилаётгани билдирилди.
Вилоят раҳбари ёшларни ана шу имкониятлардан унумли фойдаланишга, олдиларига катта мақсадлар қўйиб, уларга эришиш йўлида қатъият билан ҳаракат қилишга чақирди.
Учрашувда ёшлар ҳам сўз олиб, ўзларининг эришаётган ютуқлари ва режалари билан ўртоқлашди.