Фарғона вилояти ҳокимлиги

Мазкур корхона чорвачилик ва деҳқончиликка ихтисослашган бўлиб, сут ва гўшт етиштириш, донли ҳамда ем-хашак экинларини парваришлаш йўналишларида фаолият олиб боради.

Корхона тасарруфида 8 минг 333 гектар қишлоқ хўжалиги ерлари мавжуд. Экин майдонлари 4 минг 150 гектарни ташкил этиб, уларнинг 2 минг 36 гектарида донли ва дуккакли дон экинлари, 300 гектарида техник экинлар, 1 минг 814 гектарида эса ем-хашак экинлари етиштирилади.

Хўжаликда 2 минг 569 бош қорамол, жумладан, 1 минг 25 бош сигир парваришланмоқда.

Фарғона вилояти Данғара туманидаги "Велтерра Агро“ масъулияти чекланган жамияти томонидан мазкур қишлоқ хўжалиги корхонасини ривожлантириш бўйича инвестиция лойиҳаси бошланмоқда.

Вилоят ҳокими Хайрулло Бозоров корхонанинг мавжуд имкониятлари, ер ресурслари, чорвачилик тармоғи ва ишлаб чиқариш жараёнлари билан яқиндан танишди.

Мулоқотда фарғоналик тадбиркорнинг қишлоқ хўжалиги маҳсулотлари етиштириш ҳажмини ошириш, чорвачиликда замонавий технологияларни жорий этиш, сут ва гўшт ишлаб чиқаришни кенгайтириш ҳамда маҳсулотларни қайта ишлаш бўйича истиқболли режалари кўриб чиқилди. Мазкур инвестиция лойиҳаси ҳамкорлик йўлидаги муҳим қадам эканлиги қайд этилди.

Учрашув якунида Минск вилоятининг Вилейка тумани ҳамда "Велтерра Агро“ масъулияти чекланган жамияти ўртасида келишув имзоланди.