Фарғона вилояти ҳокимлиги

Мулоқотда ипакчилик саноати йўналишида янги лойиҳани амалга ошириш, ишлаб чиқаришни йўлга қўйиш ва соҳада ҳамкорликни ривожлантириш масалаларига эътибор қаратилди.

Япониялик меҳмонлар мамлакатда анъанавий ипакчилик саноатини қайта тиклаш мақсадида Ўзбекистонда, хусусан, Фарғонада иш бошлашга қизиқиш билдириб, ипакчилик йўналишида ишлаб чиқаришни йўлга қўйиш бўйича таклифларини билдирдилар.

Фарғона водийси қадимдан Буюк Ипак йўли чорраҳасида жойлашгани, ҳудудда ипакчилик ва ипак маҳсулотлари ишлаб чиқариш анъаналари яхши шакллангани таъкидланди. Бугун ҳам вилоятда ипакчиликни ривожлантириш, тармоқда янги ишлаб чиқариш қувватларини яратиш бўйича қатор истиқболли лойиҳалар амалга оширилмоқда.

Вилоят ҳокими Фарғонанинг ушбу соҳадаги тажрибаси ва мавжуд имкониятлари япон инвесторлари учун ҳам манфаатли бўлиши мумкинлигини қайд этиб, янги лойиҳани амалга оширишда яқиндан кўмак кўрсатишга тайёр эканини билдирди. Ҳамкорликни давлат-хусусий шериклик асосида йўлга қўйиш имкониятлари ҳам кўриб чиқилди.

Учрашувда ҳудудни чуқур ўрганиш, “йўл харитаси” ишлаб чиқиш ва лойиҳани босқичма-босқич амалга ошириш бўйича фикр алмашилди.