Фарғона вилояти ҳокимлиги

Нуфузли тадбирда икки мамлакат ҳукуматлари вакиллари, ҳудудлар раҳбарлари, вазирлик ва идоралар мутасаддилари, ишбилармон доиралар ҳамда бошқа расмий делегациялар иштирок этди.

Йиғилишда Ўзбекистон Республикаси Бош вазири ўринбосари Жамшид Хўжаев Ўзбекистон Республикаси Президенти Шавкат Мирзиёевнинг Кенгаш иштирокчиларига йўллаган табригини ўқиб эшиттирди.

Россия Федерацияси Ҳукумати Раисининг биринчи ўринбосари Денис Мантуров эса Россия Федерацияси Президенти Владимир Путиннинг тадбир иштирокчиларига йўллаган табригини етказди.

Йиғилишда Фарғона вилояти ҳокими Хайрулло Бозоров сўзга чиқиб, икки давлат раҳбарларининг сиёсий иродаси ва ишончли мулоқоти туфайли Ўзбекистон–Россия муносабатлари стратегик шериклик ва иттифоқчиликнинг юксак даражасига кўтарилганини таъкидлади.

Айни пайтда вилоятда Россия капитали иштирокидаги 114 та корхона фаолият юритмоқда. 2025 йилда Россия билан товар айланмаси 809 миллион долларга етган, Фарғона маҳсулотларининг Россия бозорига экспорти қарийб 40 фоизга ошган.

Фарғона вилоятининг инвестициявий жозибадорлиги халқаро рейтинглар билан ҳам эътироф этилмоқда. Вилоят икки етакчи халқаро рейтинг агентлиги — «Fitch Ratings» ва «S&P Global Ratings» томонидан баҳоланган бўлиб, бу натижа ҳудуднинг молиявий барқарорлиги ва инвестициявий ишончини ифодалайди.

Хайрулло Бозоров ҳудудлараро ҳамкорликни янги босқичга олиб чиқиш бўйича қатор ташаббусларни илгари сурди. Жумладан, саноат кооперациясини кенгайтириш ва қўшма инвестиция лойиҳаларини шакллантириш, рақамли технологиялар ва сунъий интеллект соҳасида Фарғонада қўшма майдон ташкил этиш, Ўзбекистон ва Россия ҳудудларини боғловчи агрологистика марказлари тармоғини ривожлантириш таклиф қилинди.

Шунингдек, икки мамлакат ҳудудлари ўртасида янги туристик дастурларни йўлга қўйиш, маданий-гуманитар ва таълим соҳасидаги ҳамкорликни кенгайтириш ташаббуслари билдирилди. Келгуси йили Россияда Фарғона вилояти ва мамлакатимизнинг бошқа ҳудудлари иштирокида Ўзбекистон кунларини ўтказиш таклиф этилди.

Вилоят ҳокими ҳар бир йирик ҳудудлараро келишув бўйича аниқ лойиҳалар, масъуллар, муддатлар ва натижалар белгиланган қўшма «йўл хариталари»ни ишлаб чиқиш зарурлигини таъкидлади.

Фарғона вилояти Россия ҳудудлари ва инвесторлари билан саноат, инвестиция, технология, туризм, таълим ва маданий-гуманитар йўналишларда амалий ҳамкорликни янада кенгайтиришга тайёр экани билдирилди.

Йиғилишда сўзга чиққанлар Ўзбекистон ва Россия ўртасидаги стратегик шериклик ва иттифоқчилик муносабатларида ҳудудлараро ҳамкорлик муҳим ўрин тутиши, уни янада кенгайтириш икки мамлакат учун ҳам янги иқтисодий имкониятлар яратиши таъкидланди.

Кенгаш доирасида ҳудудлар ўртасидаги савдо-иқтисодий ва инвестициявий алоқаларни янада ривожлантириш, саноат кооперациясини кенгайтириш, янги қўшма лойиҳаларни амалга ошириш, шунингдек, таълим, инновациялар, рақамли технологиялар, туризм ва маданий-гуманитар соҳаларда ҳамкорликни мустаҳкамлаш масалалари муҳокама қилинди.

Шунингдек, ҳудудлар ўртасида эришилган келишувларни аниқ амалий лойиҳаларга айлантириш, ишбилармон доиралар ўртасидаги тўғридан-тўғри алоқаларни кенгайтиришга алоҳида эътибор қаратилди.

Йиғилиш якунида ҳамкорликка оид ҳужжатларни алмашиш маросими бўлиб ўтди.

Жумладан, Фарғона вилояти ҳокими Хайрулло Бозоров ва Омск вилояти губернатори Виталий Хоценко томонидан саноат соҳасида ҳамкорлик тўғрисидаги келишув алмашилди.