Улсан тадбиркорлари Фарғонада янги лойиҳаларни амалга оширишга катта қизиқиш билдирмоқда
2026-09-15 16:10:00 / Янгиликлар
Мулоқотда саноат, енгил саноат, косметика, хизмат кўрсатиш ва кадрлар тайёрлаш каби истиқболли йўналишларда Фарғона вилоятида қўшма лойиҳаларни амалга ошириш бўйича қатор таклифлар билдирилди.
Хусусан, “KOLPING CO., LTD” компанияси билан ҳамкорлик истиқболлари муҳокама қилинди. Спорт, туризм ва табиат қўйнида фаол дам олиш учун мўлжалланган замонавий кийим-кечак ва жиҳозлар ишлаб чиқаришга ихтисослашган компания Фарғона вилоятида ушбу йўналишда ҳамкорликни йўлга қўйишга қизиқиш билдирди.
Шунингдек, “Ulsan Pipe Cleaning”, “Carpos” ва “HANKEI HOLDINGS” компаниялари вакиллари томонидан саноат, косметика ва бошқа йўналишлардаги лойиҳа таклифлари тақдим этилди. Уларни Фарғонада амалга ошириш имкониятлари, маҳаллий тадбиркорлар билан кооперация алоқаларини ўрнатиш ва ишлаб чиқаришни ташкил этиш масалалари юзасидан фикр алмашилди.
Учрашувда инсон капитали йўналишидаги ҳамкорликка ҳам алоҳида эътибор қаратилди. Фарғона вилоятида замонавий касбларга ўқитиш марказини ташкил этиш, ёшларни корейс тили ва талаб юқори бўлган мутахассисликларга тайёрлаш, тегишли малака ва кўникмаларга эга кадрларни Корея Республикасида қонуний меҳнат фаолиятига йўналтириш бўйича таклифлар билдирилди.
Вилоят ҳокими Хайрулло Бозоров билдирилган ташаббусларни қўллаб-қувватлаб, кореялик тадбиркорларни Фарғонага таклиф қилди. Учрашув давомида ҳар бир лойиҳанинг аниқ параметрларини ишлаб чиқиш, маҳаллий ҳамкорларни белгилаш ва келишувларни амалий босқичга олиб чиқиш бўйича ишларни бошлашга келишиб олинди.
Компаниялар билан ҳамкорлик меморандуми имзоланди.