Фарғона инвесторлар учун жозибадор ҳудудга айланмоқда
2026-09-04 17:15:00 / Янгиликлар
Бугунги кунда Хитой компаниялари томонидан Фарғона вилоятида қатор йирик инвестиция лойиҳалари амалга оширилмоқда. Самарали ҳамкорлик ва яратилган ўзаро ишонч натижасида вилоятимизга хитойлик тадбиркор ва инвесторларнинг бизнес юритишга бўлган қизиқиши кун сайин ортиб бормоқда.
Вилоят ҳокими Хайрулло Бозоровнинг Хитойнинг “Zhicheng Nonwovens (Jiangsu) Co., Ltd.”, “San Zheng International” ва “Sora Energy” компаниялари вакилларидан иборат делегация билан учрашувида инвестициявий ҳамкорликни янада кенгайтириш, истиқболли йўналишларда янги лойиҳаларни амалга ошириш масалалари хусусида фикр алмашилди.
Мулоқот давомида “Zhicheng Nonwovens Co., Ltd.” компаниясининг тиббиёт ва гигиена маҳсулотлари ишлаб чиқариш учун мўлжалланган нотўқима матолар, “San Zheng International” компаниясининг асфальт-бетон аралашмалари ва йўл қурилиши материаллари, “Sora Energy” компаниясининг нефть-кимё маҳсулотлари, жумладан, ёқилғи сифатини оширувчи махсус қўшимчалар ишлаб чиқариш йўналишидаги тажрибаси ва имкониятлари хусусида фикр алмашилди.
Хитойлик инвесторлар Фарғона вилоятида қатор янги инвестиция лойиҳаларини амалга оширишга қизиқиш билдириб, уларнинг йўналишлари ва истиқболлари юзасидан таклифларини тақдим этдилар.
Вилоят ҳокими инвесторларнинг ташаббусларини қўллаб-қувватлаш, лойиҳаларни амалга ошириш учун зарур шароит ва инфратузилма билан таъминлаш борасида вилоятда барча имкониятлар мавжудлигини таъкидлади.
Учрашув якунида ўзаро манфаатли янги инвестиция лойиҳаларини шакллантириш ва амалга ошириш бўйича ҳамкорликни давом эттиришга келишиб олинди.